Thawhsalnak le Vancung ram (sim tu - Rev. Fr. Peter Zin), (September 18, 2020)

“Thawhsalnak le Vancungram”

Sim tu - Rev. Fr. Peter Lal Zin Thang

September 18, 2020 

Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. Tuni September 18, 2020 (Tlawngkai ninga) ni ah kan thei cia ṭheu mi kan thih hnu ih thawhsalnak le vancungram thu pawl a thar in kan ruat sal dingin ka lo sawm duh. Tuni kan siar dingmi Bible pawl cu 1 Kor 15:12-20, Saam 17:1, 6-8, 15 le Lk 8:1-3 pawl an si.

Gospel kan siar mi sungah Bawi Jesuh in Pathian Uknak Thuthangṭha sim in khua khat hnu khua khat a tlawng vivo ih a khual tlawnnak ah Dungthluntu hleihnih le nunau hrekkhat khal a hruai hai ti kan hmu. Cumi nunau pawl cu a sung ihsin ramhuai pasarih a dawisuakmi Mary Magdalene, cun Herod zung ah bawi a simi Khuza ih nupi Joanna, cun Susanna le a dang nunau hrekkhat pawl an si ih cuih nunau pawl in an neihmi thilri thawn Bawi Jesuh le a dungthluntu pawl an bawm. Khuakhat hnu khuakhat ah an feh ih Bawi Jesuh ih a sim mi cu Pathian Uknak Thuthangṭha a si. Pathian uknak kan ti tikah a tu kan umnak leitlun ah khal a si thei ih, kan thih hnu ih kan fehnak ding vancungram tiih kan ko mi khal a si thei. Tuni ah a cuangce in ka ruat sal dingah ka duh mi cu kan thih hnu ih thawhsalnak le kan fehnak ding vancungram thu pawl a si.

Kan nih Christian pawlin thih hnu ah thawhsalnak le vancungram a um ti cu a tlangpi in kan zum ṭheh a si kan ti a si le kan sual lo ding. Bawi Jesuh in leitlun ih a tlanlen lai ah Pathian uknak, asilole Vancungram thu pawl a sim rero lai ah Sadusi tiih an kawh mi pawl in an rak zum lo dah a si. A tu kannih khal Christian kan si vekin a tlangpi thu in cu kan zum ṭheh kan ti ih, asinan thuk dueh in kan ruat kan zoh a si le a zum ngaingai lo khal cu tan pi kan um ve thei thotho a si. Thuṭhimnak ah kan rual pi pakhat, ka zum zet, ka rin san zet kan ti mi pa in a thim zet ih a tang lam kan hmu thei lomi kua pi pakhat sungah dawp aw zing hman na cang hrimhrim lo ding in ti sehla, kan dawp ngam pei maw? Kan dawp ngam lo a si le ka zum ka rin san kan ti mi pa kha kan zum ngaingai lo kan rinsan ngaingai lo tinak a si ko. Kan zum ngaingai a si le cu kua sungah ziang a um ti kan hmu thei lo hman ah kan dawp ngam ngaingai ding a si. Cu vek thotho in vancungram ka zum kan ti nan kawlṭong kan hlang ding a si a-nit-na-khan in kan ti pei ih a-nit-na-khan in hna kan ṭuan mi, kan tuah mi pawl vancungram a um lo pang le cu ka sung tuk ding tivek in kan ruat ngah pang a si le cu kan zum ngaingai lo ti nak hi a si. Mi hrek khat in copoh vek thungai vek in ‘vancungram khal a um ngaingai lo pang le cu kan sung tuk ding’ ti vekin a ti tu khal cu an um phahphah ṭheu. Cutin zumnak kan nei ngaingai lo tikah kan tuah mi/ kan ṭuan mi pawl hi a thupi bik ah leitlun hrang lawng ah a cang ṭheu.

Bible a veihnihnak kan siar mi ah Paul in a sim mi kan zoh ta hrih pei. “Kan thu phuanmi cu: Khrih cu thihnak ihsin thawhtersal a si zo, tihi a si ih atu ah ziangtinso mihrek khat in mithi thawhtersalnak a um lo tiah nan ti thei? Cutiih nan timi cu a dik sibang sehla Khrih thawhtersal a si lo, tiah a cang ding. Cule thihnak ihsin Khrih thawhter lo a si ahcun thuthang phuan ding zianghman kan nei lo ih zum ding khal zianghman nan nei lo. Cuih tlunah Pathian ih thu ah thuphan per ah kan cang ding, ziangahtile thihnak ihsin Khrih cu Pathian in a thoter zo tiah kan sim ringring a sisi. Asinan a thimi pawl nunnak ah thawhter lo an si ngaingai ahcun Pathian in Khrih khal a thawhter lo a si ding. Ziangahtile a thimi thawhter an si lo ahcun Khrih khal thawhter a si ve lo. Cule Khrih thawhter a si lo ahcun nan zumnak hi a kawlawngpi a si dingih nan sualnak sungah a tang hrihmi nan si ding. Cuih tlunah Khrih a zum ih a thimi pawl khal an hloral ve ding. Khrih sungah ruahsannak kan neihmi hi khuitawk hman thleng lo in hi leilungtlun kan nunnak hrang lawnglawng a si ahcun leitlun khuavelminung lakah hin zangfakza bik kan si ding,” tiah Paul in a ti a si. Thawhsalnak kan zum lo a si ah cun Bawi Jesuh hmin hmangin kan sim mi kan tuah mi hmuahhmuah a lak men a si ding. Ziangruangah tile Christian kan sinak ih a thupi bik mi cu leitlun hrangah silo in kan thi hnu ih thawhsalnak le vancungram kan thlen thei nak ding hi a si. 

Cun Jesuh Khrih kan zumnak khal cu kan thlarau hrangah, vancungram kan thleng theinak dingah tin a thupi bik in kan ruat lo ih leitlun kan nunnak hrang lawng ah kan ruat a si le leitlun khuavelminung lakah zangfahza bik kan si ding tiah Paul in in sim fiang a si. A caancaan ah thilṭha kan tuah mi pawl khal cu leitlun kan nun sung kan lamtlung thei nak ding lawng ruat in a tuah tu khal cu kan um thei pang asi. Mi kan bawm tikah siseh, a hlu kan pek tikah siseh, kan thlarau hrang ruat lo in ka ngah sal ding timi sawn lawng a thupi bik ah ret in kan tuah pang asi le kan zumnak, kan ruahsannak hi vancungram silo in leitlun thilri hrang sawn ah a si ti hi thei theih asi.

Bawi Jesuh in dingfelnak le vancuang uknak kha kawl hmaisa uh la a dang pawl khal cu pek nan si leh ding a ti vek in kan nih in kan tuah dingmi cu vancung uknak ruat in thilṭha tuah ding hi a si. Cutin kan tuah a si le leitlun kan nunnak ding hrang cu Pathian in a ṭha bik in in ṭawlrel sak ding asi. Duhdawt mi nu le pa, u le nau kan thi hnu ah thawhsalnak le vancungram hi ziang tluk tiang kan zum, thilṭha kan tuah mi pawl teh kan thlarau hrang ruat in maw, leitlun hrangah ruat in kan tuah timi pawl a thar in ruat sal u si. Kan zumnak a ṭhang sinsin thei ding in Pathian in thluasuah in pek cio hram seh.

Fr. Peter Lal Zin Thang (Hakha Diocese)