“Kilkhawitu Vancungmi” (Sim tu - Rev. Fr. Peter Zin)

“Kilkhawitu Vancungmi”

Sim tu - Rev. Fr. Peter Zin

October 2, 2020

            Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. October 2 ni hi kilkhawitu vancungmi pawl ih puai ni a si. Tuni October 2, 2020 (Tlawngkai ninga) ni ih kan siar dingmi Bible pawl cu Suahlannak 23:20-23 tiang, Saam 91:1-6,10-11 tiang a siih a sawnnak ah, ‘na fehnak hmunkip ih a lohumtu dingah le, a lo kilvengtu dingah Pathian in a vancungmi pawl a ret ding,’ ti a si. Gospel cu Matthai 18:1-5, 10 pawl an si ih hi mi pawl sungah kilkhawitu vancungmi pawl ih thu kan hmu thei. Pathian in a sersiammi a milai pawl in duhdawttuk ih kan thlarau le kan ruangpumpi a pahnih in in zoh khen tu ding ah kilkhawitu vancungmi pawl a thlah asi.

            Bible a veikhatnak kansiarmi Suahlannak 23 sungah ziang a ti ti sile, ‘nan lamtluanih a lo hruaitu dingah nan hmaiah vancungmi pakhat ka thlah ding,’ a ti. Cumi vancungmi cu in kilkhawitu tilawng si lo in ziangtin kan nungding, ziangtin kan feh ding tivek in lam hmanah in hruaitu ding khal a si vekin va upat ding le an thu ngai ding khal a ṭul asi. ‘Amah cu nan upat pei ih a simmi thu cu ngia in nan thlun pei. Amah cu kan duh lo tiin nan ralsan lo pei, ziangahtile ka hmin in hna a ṭuan a si. Nan ralsan pang asile a lo ngaidam hrimhrim lo ding,’ ati. Himi hi thiangthlarau tlun ih sualnak ti khal in kan ti thei. A ṭul ti thei na cing in tuah duh lo, a bik in sualsir a ṭul ti thei na cingin sualsir duh lo tivek ih ngaidamnak a um lo a si. Asinan khat lam ah, ‘a thu nan ngai ih ka simmi hmuahhmuah nan tuah asile nan ral pawl cu ka do dingih a lo raltu cu ka ral ve ding a si,’ a ti. Curuangah kilkhawi tu vancungmi hmangin Pathian in kan thinlung sungih hna a ṭuan mi thei na cingin kan tuah duh lo a sile hloralnak a suah pi dingin a thu kan ngai a si le cu humhimnak kan hmu ve ding a si.

            A tlangpi in kan zoh a sile kilkhawitu vancungmi pawl hi minung mit ih hmu thei lo in hna an tuan ṭheu a si. Asinan mit hmuh lo in in bawm lawng siloin mit hmuh thei mi minung pawl hmangin khal kilkhawitu vancungmi pawl ih hna ṭuannak kan hmu/ kan ngah thei ve a si. Kan ṭul samnak ah in bawmtu, kan thanau caan ah thazang in pe tu pawl, kan ninghang lai ah thin in hnem tu pawl khal hi kan hrangah Pathian ih a thlah mi kilkhawitu vancungmi pawl ih hnaṭuannak kan ti thei a si. Kan kiang kap ih a ummi minung pawl hnen in kilkhawitu vancungmi pawl ih hnaṭuan a ra thei vek in kan mah hnen in khal mi dang in kilkhawitu vancungmi pawl ih hnaṭuan an co ngah thei ve a si. Curuangah Pathian in kilkhawitu vancungmi pawl hmangin in bawm in kil khawi vek in kan nih hnen in khal mi hrangah bawmtu, thazang pe tu le mi thinhnem ter thei tu si ding in khal zuam ve uh si. 

            Tuni kan siarmi Gospel Matthai 18 sungah ah dungthluntu pawl cu Bawi jesuh hnenah an ra ih, “Vancung Uknak ah zoso a tum bik?” tiah an sut. Cutikah Bawi Jesuh in nauhakte pakhat a ko, an hmaiah a dingter ih ziang a ti ti sile, “fiang tein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding. Mi tangah a dor ih hi nauhak bangtuk a simi cu vancung Uknak sungah a tumbik mi a si. Cun ka hmin in hibangtuk nauhakte a cohlangtu cu keimah a cohlangtu a si,’ a ti. Cun, ‘hibangtuk nauhakte nan zawmtai lo dingah ralring uh. Anmah kilvengtu vancungmi pawl cu vancung ih ka Pa ih hmaiah an um ringring a si,’ ati. Tuni kilkhawitu vancungmi puai ni a si vek in ‘hi nauhakte bangtuk nan si lo ahcun vancung Uknak sungah nan lut dah lo ding’ timi silo in a netnak ih a simmi vancungmi thu dueh sawn sim rel ka duh. Bawi Jesuh in hi nauhak te hman kha zawmtai lo in upat nak pek ding ah a sim asi. Ziangruangah tile ‘anmah kilvengtu vancungmi pawl cu vancung ih ka Pa ih hmaiah an um ringring a si,’ ati. Nauhakbik sihmansehla kilkhawitu vancungmi kan nei cio ruangah pakhat le pakhat upat nak thawn biak aw le zoh aw kan ṭul a si. Kilkhawitu vancungmi pawl hi in kilkhawi tu an si vek in kan thinlung sungih thil ṭha in sim mi kan thlun duh lo, asilole vancungmi ih an kilkhawi ve mi midang kha ziang siar lo in kan um a si le kilkhawitu vancungmi pawl khal cu an lungawi ve lo ding a si. In kilkhawitu an si vek in an mah lungawi ter tu kan si ve ding khal cu kan ti thei tawk in zuam cio ding kan si. 

            Culawng siloin an mah hnen khal ah rinsannak thawn thlacam ṭheu ding khal kan si. Kilkhawitu vancungmi hnenih thlacamnak kan nei ih cumi thlacamnak te ih ka duh zet, a tawi zet nan a fam kim zet. “Pathian Bawipa ih fialnak in keimah i kilkhawitu aw vancungmi keimah hnen ah sun le zaan cat lo in i kil khawi, i bawm aw. Amen.’ tiah thlacam in kilkhawitu vancungmi pawl in sun le zaan in in kilkhawi ringring cio hram seh.

Fr. Peter Lal Zin Thang (Hakha Diocese)