Jesuh ih fialmi thu pa (3)

Thuthangtha sim tu - |Rev. Fr. Pius Kei Lian Cung

Siarding: Gal 5:18-25; Lk 11:42-46

Thuthangtha ngaitu u le nau pawl Bawipa ih hnangamdaihnak nan parah thleng hram seh. Damcahnak le thanso, hlawhtlinnak thluasuah Bawipa in lo pe hramseh. October 14, sunih kan siarmi Lk 11:42-46 sungih sin “Jesuh ih fialmi thu pa(3)” hlawm awk tlang ding ka duh. Lk11:42 ih Jesuh tongmi Bible cangkhat te kan ngai tlang pei. “Farasi pawl nan hma khua a va pit so! Hanghnah hangrah sungin putinan le remhmui le aithing le a dangdang tla cu thenhra thenkhat nan pek ko na’n dingnak le Pathian duhdawtnak cu nan daithlan. A dang khal daithlang cuang loin hipawl cu nan tuah ding mi an si.” Himi Bible cangkhat sungah hin Jesuh in thu pa (3) in zirh a si.

1.  Thenhra thenkhat thu:

Bible thukam hlun sungah thenhra then khat thu hi veitampi kan hmu nan Bible thukam tharah cun malte lawng a um. Jesuh krih ih tongmi ah cun hmun2 lawngah a um ih a thuhla le a hmandan khal a bang aw. Catholic pawlpi sungah, thenhra thenkhat pekdan hi ram khat le ramkhat kan dang aw ih, diocese pakhat le pakhat khal kan bangaw lo. Catholic krifa pawl lak khalah hmanzet le felte ih petu thla kan um dingih pe theilo tu khal kan um ko ding ka zum.

Tuisun ih ka sim duh mi khal “Na pek tengteng a tul, na pek lo le sual a si” ti a si loih, Na pek lo khal le a poi lo ti khal a si cuang lo. Kan Bible in in zirhih, Jesuh krih khal in pek in fial ti hi ka sim duh mi a si. Jesuh nih “hipawl cu nan tuah ding mi a si” a timi tongkam kaakhat tehi kan ruattha dah maw. Jesuh ih “hipawl” a ti mi hi ziangha an si? A mai tongmi “thenhra then khat nan pek” a timi te hi a si. Curuangah, Jesuh in thenhra thenkhat Pathianhnen pek ding thu in zirh maw zirh lo kan ti a si ah cun pek ding in in zirh a si. “thenhra thenkhat nan pek..hi pawl cu na tuah dingmi a si” a ti ruangah thenhra thenkhat pek uh in ti mi a si.                    

Bible thukam hlunsungta tampi lakin pa(3) ten vun zohbet u si. Seem 14:20 ah Abram in puithiam Melkhizedek hnenah thenhra thenkhat a pek thu kan hmu. Zumnak ih kan Pa a si lam tla vun mang u si. cawng u si. (Lev)Pui 27:30 ah ‘thenhra thenkhat cu Bawipa ih ta a si. Bawipa ih hrangah a thianghlim mi a si’ tiin fiangzet in kan hmu. Bawipa ta a si ih, maibulta vek in kan ruat ngam ding maw si, ka la ngam ding mawsi. Seherh  lole zaangram lo tein pek u si. Mal 3:10 ah ‘Biakinnah nan thenhra thenkhat cu kim tein rak keng uhla rawl tampi a um ding. Vancung sangka pawl ka ong dingih nan hrangah thiltha a phunphun ka run burh ding’ a ti a si. Bawipa in rak kenguh in ti ih, thiltha a phunphun pek ding khal in thu in kam a si. Lungawi ten Bawipa hnenah pe u si, pek a manhla tuk. Thluasuah tampi luhnak sangkaa a si.  

2.  Dingnak:

Jesuh nih “A dang khal daithlang cuang loin” a ti mi in thenhra thenkhat thu lawng si loin daithlan lo dingmi a dang a um ti a lang ter. Cucu, dingnak le Pathian duhdawtnak a si. Dingnak cu tongkam, thinlung le nuncan ziaza ih dinfel nak a si. Thudik thuhman ih ralsan, linglet cu fir le hrawhhrawl, mibum le thuphanper, depdet le sualnak pawl an si. Miding mifel sihi a har maw. A har cu a si ding. Zohman mi famkim kan um lo kan ti aw theu. Asinan sualneimi kan si cio timen ih daithan ding cu a si hrimhrim lo. Dinfel lonak ih oltei thlu men ding khal kan si lo. Kan zuamdingmi le kan tumtah dingmi a si ringring. Paisa tampi pek thei ruang le Aanaa thuneihnak ruangih a hmanlo lam sawn nih nehnak an co theu tla hi  kan theih, kan ton rero mi a si. A dik le a hman tu farah nauta riangri sawn nih thawngtlak, cawhkuan le hminsiat tuar rero, co rero a si a tam. Tihnungza, fihnungza le Ningzakza a si.

Thuhman lo zawngih thuthentu le tetti tuan pawl hi Pathian ih a huat tuk mi a si. Adik lo zawng le hrawkhrawl mibumphah ih ngahmi thilri, sumsaw, lennak , miatnak hlawknak le hminthannak pawlhi rei a daih hrimhrim lo. A hloral mai sokhaw. Ngahmi hnakih tumsawn le tamsawn in tlaksiatnak a si.     Mibumnak, firnak,  nawhthuh einak le a dang thiltha lo phunphun ih ngahmi sumpai le thilri sungin thenhra thenkhat Pathian hnenih pek hi san a tlai lo. Pathian nih cun kan neihmi hnakin kan minung hi in duh sawn ringring. Thenhra thenkhat hmante ih pek hnakin thinlung, tongkam le nunzia ih mifel, miding si cu thiltha sawn le Pathian duh sawnmi  a si.

Thu 24:15 ah “miding cu voi sarih tiangtlu hmanseh la, a thosal ding” a ti. Miding mifel cun sualnak palhnak an tuahpang khal ah sirawknak an nei. Minung hmaiah siseh, Pathian hmaiah siseh tang an dor thei, ngaithiam an dil ngam. Midingfel lo cun paisa le hlawnthil le Aana hmangin an sualnak le  mawhnak cu khuh le thuh thei an zuam. Minunghmaiah cun thuh a theih men dingnan sung muril tiang hmutu Pathian hmaiah cun bualrawn laifangih kuk relh hnakin a fiang keukeu a lang. Adingfelmi Pathian cun dingfel nun in zirh, in forhfial. Kan lungput, kan tongkam le kan nunzia hi dikfel dingin rem rero u si, zuam rero u si. Thasin dingin thlacamnak le Pathian Tongkam cathianghlim thawn kilkhawi u si, lam tha hruai u si. 

3. Pathian duhdawtnak:

Pathian cu duhdawtnak a si ih minung pawl in duhdawt zet. Kan sim thiamzat hnakih thuk sawn le kan ruahbanzat hnakih kau sawnin in duhdawt. Anih khal in minung pawlih Amah kan duhdawt ding cu a duh ih, in hngak, in hmuak, in cuan a si. Farah lakih farah bik cu miduhdawt thiamlo a si. Mi duhdawt thiamlo cu nung cingih thi a si. Duhdawtnak a umnak ah cun innsang ah siseh rualpi hnenah siseh tlanlen a nuamih, rualremnak le lungawinak in a khat. Krifa pohpoh zokhal, pathian na duhdaw maw tiah sut aw seh la ‘duhdaw ee’ kan ti cio ding. Minungteh na duhdawtmaw tiah sut aw bangsehla ‘mitam pi ka duhdawt ko nan mihrek khat pawl cu ka duhdawt lomi an um’ kan ti phah ding hi ka zum. Duhdawtnak thu cu a kau a thuk ih simcawk lo ruah cawk lo a si. Thuhla dang tampi ruatbet lo in mituteih kan sim cia mipawl khaikhawm seh la. Pathian a duhdawt tu cun Pathian hnenah thenhra thenkhat pek a siang. Pathian a duhdawt tu cun Pathian hmuihmel cuang minung pawl a duhdawt ih midang parah thinlung thalo, awkam thalo a pe dah lo. Midang zawn a ruat ih tangdor nun a nei. Nuncan ziaza felten miding si a duh, a zuam a si.

Pathian kan duhdawtnak cu thanglian ter sinsin in, A hnenah thenhra thenkhat khal lungawi ten pek u si. Pathian kan duhdawtnak cu midang parah langter in felnak, dingnak le zawnruatnak thawn khat le khat bawm aw ton cio u si. Kan neihmi sumsaw, thilri, satil le ciciin pawl thenhra thenkhat Pathian hnenah pe in, kan thinlung, kan tongkam le kan caan le  nunnak ih thenhra thenkua khal Pathian duhdawtnak le midang duhdawtnak ah pe in, hmang cio u si. Pathian tongkam thianghlim sunloih, ngaina tu kan zate parah Thlarau Thianghlim ih thazaangcahnak, lam huainak, lungawinak le hnangamnak catbanglo in um camcin hram seh, Amen.