Hrilmi Milungawi (Thuthangtha sim tu - Rev. Fr. Peter Zin)

 “Hrilmi Mi Lungawi”

Sim tu - Rev. Fr. Peter Lal Zin Thang

Siarding: Efesa 1:11-14; Saam 33:1-2, 4-5, 12-13; Luka 12:1-7.

            Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. Tuni October 16, 2020 (Tlawngkai ninga) ni ih kan siar dingmi Bible pawl thawn pehpar in ‘kan nih hi Pathian ih hrilmi, man a nei zet mi mi sunglawi, mi lungawi kan si asilole mi thluasuak kan si ti thu’ kan ruat tlang ding in ka lo sawm duh. Kan siar dingmi Bible pawl cu veikhat siarnak ah Efesa 1:11-14, Saam 33:1-2, 4-5, 12-13 tiang a si ih a sawnnak cu, ‘Bawipa in a hrilmi minung pawl cu mi lungawi an si’ asilole ‘mi thluasuak an si,’ ti a si ih Gospel kan siar ding mi cu Luka 12:1-7 tiang a si.

            Kan nih zumtu pawl in ziangtin kim kan nei mi, kan ngah mi hmuahhmuah hi Pathian ih in pek mi, Pathian thluasuah tin kan zum kan pom a si vek in Pathian hnen ah kan lungawinak, lungawi thu kansim ṭulnak thuhla tampi a um. Leitlun kan taksa nunnak le nuamnak ding hrangah kan ṭulmi in pek mi thliri a phunphun tampi a um. Cun fimnak, thiamnak, thil tuahtheinak tivek khal pakhat le pakhat bang aw lo in a phunphun in tam pi in pek. Lungawi thu kan simnak ding thuhla tam pi a um ih cumi pawl lakah ziang mi hrangah kan lungawi bik ṭulnak hi ziang a si pei tin vun sut aw seh la kan lungawibik nak hi ziang bik asi pei. Kan duhdawt mi innsungsang in pek ruangah maw? fimthimnak le sumpainak lam ah hlawhtlinnak in pek ruangah maw? leitlun kan nun sung caan tawi te sungih kan ṭul sammi pawl in pek ruangah maw? asilole taksa harhdamnak in pek ruangah maw? ziang hrangah kan lungawi biknak a si pei?

            Pathian ih sersiam mi pawl hi siar cawk lo le thei cawk lo in an tam zet. Kan hmuh baan lo mi pawl siseh, kan hmuh baan mi Ni, le thlapi le arsi pawl in thok in leitlun kan kiangkap ih kan hmuh thei mi le hmuh thei lo mi sersiam mi a phunphun lak ah kan nih milai pawl hi a man nei bik, a sangbik, a sunglawibik ih sersiam mi kan si. Pathian in a sersiam mi hmuanhmuah parah, thilri, ramsa, minung kan zate parah duhdawtnak a nei ih ṭha te in in zoh khen. Cutin a zoh khen mi hmuahhmuah lak hmanah minung hi a cuangce in, man nei deuh in in kilkhawi, in zokhen ti hi tuni kan siar mi Gospel sung khal ah kan hmu thei a si. Bawi Jesuh in, ‘Ka rualle uh,” tiah a rualpi cazin ah in ret ih, ‘Taksapum lawng a that thei ih cuhnakih besia dang a tuah thei lotu cu va ṭih hlah uh. Zoso ṭih ding sawn ti ka lo sim hai ding: a thah lawng si lo in hell sungih thlak theinak khal thu a neitu Pathian lawng ṭih uh. Fiang tein ka lo sim: Amah hi nan ṭih dangmi cu a si!’ a ti. Cun Pathian siar lo a dang pawl kha va ṭih lo ding in le man kan nei zia khal hi tiin a si. ‘Sunṭam panga kha piahnih ah an zuar a si lo maw? Asinan pakhat hman Pathian in a hngilh lo a si. Nan lu parih samphang hman a siar ṭheh. Curuangah nan thinphang hlah uh; sunṭam tam zet hnakin nan sunglawi sawn a si,’ a ti. Sunṭam tete hman Pathian in a hnilh lo ti asi ih kan nih tla cu sunṭam tam pi hnak in kan sunglawi sawn bet lai tik ah Pathian in in hngilh dah lo ding ti cu a faing mi a si.

            Minung hi sersiammi dangdang hnakin sunglawi deuh in a sinh sang deuh in sersiammi kan si ruangah Pathian hnen ah kan lungawi ṭul biknak a si maw kan ti a si le a si deuh hrih lo. Himi hrangah khal kan lung a awi ṭul zet mi cu a si ko nan cumi hnakin kan lung a awi ṭulnak a um lai.  Tuni Bible a veikhat kan siarmi sungin Efesa 1:11-12 ah ‘Khrih thawn kan pehzom awknak thawngin a minung si dingah Pathian in, in hril zo; cumi cu a mah ih tumtahmi a si ih a hramthok ihsin a rak khaukhih cia mi asi. Curuangah Khrih sungin ruahsannak a nei hmaisabiktu kannih in Pathian hnenah sunlawinak pe uh si,’ a ti. ‘A minung si dingah Pathian in, in hril zo’ a ti. Sersiammi hmuahhmuah lak ah a sunglawi zetmi minung kan si lawng hi a tawk hrih lo ih cumihnak in a thupi deuh hrih mi cu Pathian ih a minung si ding kha a thupi bik, a sunglawibik mi le kan lungawi ṭul biknak a si. Minung kan si hnu ah a thupi bik mi cu Pathian ih minung si ih kan thihhnu ah vancungram thleng ding hi a si. 

            Veikhat lai ah Bawi Jesuh in mi 72 pawl kha a hril ih a mah a fehnak ding khuakip le hmunkip ah pahnih, pahnih in a rak thlah hai. An feh hnuah cumi thlahmi 72 pawl cu lungawi zet in an ra kirsal ih, “Bawipa, na hmin in ramhuai pawl kan dawi tikah kan thu an ngai a si,” an ti. Thu thangṭha an sim, ramhuai khal an dawi suak, hihi thil ṭha a si ih lungawi um zet mi khal a si. Asinan Bawipa in Ziang a ti ti sile, “Ngai uh! Huham neihnak ka lo pe hai: Rul le varngen-meipir pawl parah nan feh thei ding; nan ral neh theinak huham khal ka lo pe ih zianghman in a lo tuahmawh thei lo ding. Sikhalsehla thlarau ṭha lo in nan thu an ngai ruangah nan lungawi hlah uh; nan hmin vancung ih ngan cia a si ruangah nan lungawi sawn uh,’ tiah a ti a si. 

            Curuangah kan nih ih kan lungawi ṭul bikmi, kan lungawi nak ih a hrampi bik a si ṭul mi cu kan neih mi, kan thiamnak le thil kan ti theinak pawl ah si loin Pathian ih minung kan sinak, vancung ah kan hmin ngan a si nak ruangah kan lungawi a ṭul bik nak a si. Khrih kan zumnak thawng in Pathian ih hrilmi, Pathian ih minung kan si zo ih cunruangah Pathian hnen ah lungawi thu sim in a net nak tiang a mah a thlun thei tu si ding in zuam cio uh si.

Fr. Peter Lal Zin Thang (Hakha Diocese)