Rinsantlak Hnenum

“Rinsantlak Hnenum”

Rev. Fr. Pius Cung ih thuthangtha sim mi (October 21, 2020)

Siarding: Lk 12:39-48

          Duhdawtmi u le nau pawl, Bawipa ih thluasuah pumsa, thinlung le thlarau ih damcah nak nan zate parah thleng hram seh. Oct ni 21, ih thuthangtha kan siarmi Lk 12:39-48 sung in “Rinsantlak Hnenum” thu ruat khawm ding in ka hril. Bible cangkhat te kan ngai ta pei uh. Lk 12:42, “Zoso rinsan tlak le a fimmi hnenum cu a si? Rinsan thlak le a fimmi hnenum cu a bawipa in a innpi kilkhawitu dingah le a dang hnenum pawl kha a tikcu caan te ih an covo rawl pe dingah a ret dingmi hnen um kha  a si.” 

Minung in Pathian kan rinsan. A hleice in kan thazaang le thiamnak ih kan tlin thei lo miah ‘ziangkim tithei Bawipa a um’ ti in, a hnenih kan rinsannak a tum, a tthang. A thukam mi ah a pelh dah lomi Pathian a siih rinsan a tlak. Sun le zan ih in kilhim tu le kan nunnak nei tu a si ih ruangah kan rinsan ringring dingmi khal a si. Pathian khal in mi nung hi in rinsan zet ih tuanvo a phunphun in pek ve a si. Rinsan tlak hnenum si thei ding in tuanvo pa 2 kan nei.

Tuanvo (1) nak;

          Bawipa in a innpi kilkhawitu dingah tuanvo in pek. Bawipa ih inn cu a tawinak in phun (3) in kan zoh thei. Lei le van, Biakinnpi le kan ruangpum tla an si.  

          Bawipa inn cu lei le van a si. Is 66:1 “Vancung cu ka tohkham a si ih leilung cu ka ke retnak a si’’ Bawipa in a ti. Seem 2:15 ah “Bawipa Pathian in a seemsuah mi pa cu loram tuantu le kilkhawi tu dingin Eden human ah cun a um ter” timi le A bawm tu dingah nunau a sersiam tikhal kan hmu a si. Himi bible ca tlang hin kan kiangkap thingkung hramkung le tiva le rannung pawl tha teih kan kilkhawi ding hi Bawipa pek mi tuanvo a si ti in zirh. Cerhtithiang le zilthlithiang a umnak ah ni le khua, tik le cu a hmanih, boruak a thianghlim. Minung le satil khal tlanlen a nuam, nun a hahdam. Kiangkap, Thingkung le leiram kilhim in rinsan tlak hnenum kan sinak langter u si.    

          Bawipa umnak inn cu biakinnpi a si. Lk 2:49 siseh Jn 2:16 ah siseh, Biakinnpi kha Jesuh in ka pa ih inn a ti. Hab 2:20 ah “Bawipa cu a Biakinn thianghlim sungah a um” ti ka hmu. 1Siang 9:3 ah “Keimah biaknak hrangih na sak mi biakinn cu ka thianghlimter ih hi innah ka hmin ka ret” Bawipa in a ti. Himi bible bungcang pawl in Biakinn pi ih thianhlimzia le a thupit zia a lang ter. Kristian kan si kan ti nain, khawm zaangzel le biakinn pan daithlang pawl cu zumtu hngetkhoh si ding a har zet. Biak inn kan thlen ding hi Bawipa in a duh. Biakinn kan sak tikah thazang, sumpai le thilri suah khawm in, lungrual thatho ten kan tuan. Biakinnpi neih hnu khal ah lungawithatho ten khawmnak ah kan tongaw hram pei uh. Natsia ruangih kan khawm remcang thiam lo mi hi cu ziangaw titha. Biakinn thawn hlatu silo in Biakinn pan tu le khawmtu si thei hram u si. Thlacam le khawmnak ih biakinn thlengtheutu kan sinak in rinsan tlak hnenum kan si nak a lang ter ve a si.        

          Bawipa ih umnak inn cu kan ruangpumpi a si. 2Cor 6:16 ah “kannih cu a nungmi Pathian ih biakinn kan si” ti kan hmu. Efe 2:22 ah “Pathian in a Thlarau a umnak dingih innah a sak cih mi nan si” in ti. Jn 6:56 ah “zokhal ka taksa a ei ih ka thisen a in tu cu ka sungah a nung; cule keimah khal a sungah ka nung” tiah Jesuh in a ti. Kan ruangpumpi hi Bawipa umnak inn a si ih tha zetih kil khawi ding kan si. Harhdam te ih kan kilkhawi ding a thupi ih, thinlung, tongkam le nunzia khal ah tha teih kilven awk a tul. Maih damcahnak hman siatral tiangih eiin, le hmawmzuk hmang krifa kan tam  vivo tla hi Bawipa umnak inn siattertu le rinsan tlak lo kan si zia a lang zet. Natsia le vansan kan toncan ah cun Pathian kan rinsan ih thla kan cam, Sibawi kan rinsan ih damnak kan dil. Kanmah le mah harhdam teih kilkhawi aw dingin tuanvo tumpi kan nei, kan tuah theimi khal tampi a um. Rinsan tlak hnenumtha si dingin Bawipa ih inn kan ruangpi hi harhdam le thianghlim ding in ralringte le thlacamnak thawn kilkhawi u si. Harhdamnak le thianhlimnak kilkhawi awthei ding in Pathin in in rinsan zet so khaw.  

Tuanvo (2) nak:  

          Hnenum dang pawl kha an covo rawl pe dingah Bawipa in tuanvo in pek. Eiin ding ti le rawl kan pekawk ding hi Bawipa in a duh. Mt 25:35 “karil a rawn tikah rawl in pek, ka ti a hal tik ah inding tidai in pek” Jesuh in a ti. “Ka u nau pawl lakah nauta bik parih nan tuah mi cu ka parah nan tuah a si’’a ti. Is 58:7 ah “Nan tirawl cu rilrawng mi thawn ttawm aw uh” in ti. Thu 25:21, le Rom 12:20 ah “na ral a ril a rawng asile ei ding rawl pe aw, a ti a hal a si le inding ti dai pe aw,…Bawipa in tthat man a lo pe ding” tiin kan hmu. Tirawl hmunkhat tei kan ei khawmtik ah duhdawtnak le lung rualnak a fek sin ih lungawinak le remdaihnak a karh. Midangih sawm reromi si hnak in a sawmtu, a do tu si ding khal hnenumtha sinak a si.           

          Thlarau lam khalah tirawl pe awthei kan si. Thuthangtha le sacramentu pawl in siseh, thlacamnak le biaknak lam ih taimak theinak in siseh, thlarau tirawl kan hil thlang ih zumnak thazang kan pe aw ton theu a si. Biaknak lamah pumpak ih zumfek le zuamtheitu ka si a thupi ih midang hrangih thazaang petu le kaihruai tu kan si ding khal hi a tul zet. Thlacamnak , khawmnak le tuannak ih can kan pek nak, kan tel theinak pawl hi midang hrangah thlarau tirawl hlawm rero tu kan si ti thei aw in tuan sin u si, zuam sin ko u si.                    

         Tlawnginnpi khal “fimnak hnawiti thlum kan in nak” tiah kan ko theu. Saya, sayamah pawl in tlawngta hrangah fimthiamnak tha ten an zirh a si le tirawl thaten an pek tinak a si. Sibawi le Nurse pawl khalin thate ih mina an tuamhlawm a si le tirawl thatha an pek tinak a si. Cozah hnatuan pawlkhal in mipi parah, innsang nu le pa khal in fa le te hnenah eiin, fimnak, damnak, thansonak thil a phunphun pawl tha teih tuanvo kan tuan cio tikah Pathian duh mi rinsan tlak mifim hnenum kan si thei ding a si. Bulpak miatnak, hlawknak lawng tuantu, midang hrang zawnruat lo le theihpi lo ih umtu cu tuisun cathiang in “rinsan tlak lo hnenum” a ti. ‘hnenum thalo pa cu a ei a in ih a rii a bah’ a ti, ‘hnenumdang khal a thawi, a vel’ a ti.  Mah lawng puarih kiangkap rilrawn theihsak lo hi hnenum thalo sinak a si. Mifim kan tam nain rinsan tlak hnenum kan mal zet san a si. Fim lawng a tawk lo ih fel khal in zirhtu Bawipa a si.           

          Bawipa ih rinsan tlak hnen um si thei ringring ding in bawipa ih inn, kan leilung le thing le ram le kiangkap kilveng u si. Biakinn pi hi ngaina in pan u si. Kan ruangpum khal harhdam le thianghlim ding in kilkhawi u si. Midang pawlhrang khal ah kan neihmi tirawl hlawm u si. Kan tanpi theiawk dandan in kan tulnak ah silhkhah aw ton in rawlthawbik hlawm aw tlang u si. Rinsantlak le mifim hnenum sisin thei dingin Thlarua thianghlim in lam in hruai in, in kilkhawi  hramseh, Amen.