Remdaihnak (Thuthangtha sim tu Rev. Fr. Peter Zin)

 Remdaihnak

Thuthangtha sim tu Rev. Fr. Peter Zin

Siarding: Efesa 4:1-6; Saam 24:1-6; Lk 12:54-59

            Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. Tuni October 23, 2020 (Tlawngkai ninga) ni ih kan siar dingmi Bible pawl thawn pehpar in kan zaten kan thi hnu ah kan thlarau thuṭhennak hmun a thleng hlan ah ‘remnak’ tuah ta kan ṭulnak thu mal lai kan ruat tlang dingin ka lo sawm duh. Missa raithwinak ah kan khawm/ kan tel tik ah Bawipa thisa kan san hlan te ah siangbawipa in ‘pakhat le pakhat remdaihnak hmuh aw uh si,’ tiah a ti ṭheu. A si, Bawipa Thisa kan sang hlan ah, Bawipa thawn pum khat ah kan kom aw hlan ah, asilole Bawipa thawn kan tong aw hlan ah remdaihnak kan tuah ding cu a ṭul tengteng mi a si. Tuni kan siar ding mi Bible a veikhat siarnak ah Efesa 4:1-6 tiang, Saam 24:1-6 tiang le Gospel cu Lk 12:54-59 tiang pawl an si.   

            Kan siar ding mi Gospel sung ah kan san, kan tik cu le caan kha zoh thiam le thei thiam nak ding thu le remdaihnak kan tuah ṭulnak thu tin a tlang pi in ṭhen hnih ah kan ṭhen thei ding. Himi ṭhen hnih sung in a ṭhen hninnak sawn kha ka lo siar sak ta ding. Lk 12:57-59 tiang, “Ziangah so thil dik tuah dingah nan thinlung nan ṭhen cat thei lo? Mi pakhat in a lo khiing ih zung a lo thlenpi tum a si ahcun zung a lo thlenpi ngah hlanah amah thawn remnak tuah dingah va zuam aw. Cuti na tuah lo ahcun thuṭhentu  hmai tiang a lo dir dingih ṭhuthentu in palki kut ah a lo pe dingih cuticun thawng ah tlak na si ding. Fiang tein ka lo sim: Na kuan dingmi a netabik piakhat tiang na kuan ṭheh hlan lo cutawk ihsin na suak hrimhrim lo ding,” tiah a ti.” 

            Kan zaten kan thei ṭheu vek in ni khatkhat ah kan thi cio dingih, kan thih hnu ah kan thlarau thuṭhennak a um ding ti a is ih, cu mi thuṭhennak hmun kan thleng hlan ah pakhat le pakhat remdaihnak kan tuah tengteng ding in kan Bawipa Jesuh in ralrinnak in pek a si. Caan a um lai ah cumi remnak kan tuah lo a si le thuṭhennak ni ah palki cut ah pek kan si dingih cuticun thawng ah thlak kan si ding ti a si. Cumi thawng thlaknak a timi khal cu kan thih hnu ih kan thlarau hrangah harsatnak ram asilole hell ram ti duhnak a si tin kan hmu kan thei cio ko ding. Minung cu kan thei vek in zo hman a famkim mi, sual dah lo mi kan um lo a si vek in thuṭhennak kan ton hlan ah amah Pathin thawn siseh, kan mah milai pakhat le pakhat kar lak ah siseh remnak kan tuah ding cu a ṭul ringring mi a si.

            Cun “Fiang tein ka lo sim: Na kuan dingmi a nerabik piakhat tiang na kuan ṭheh hlan lo cutawk ihsin na suak hrimhrim lo ding,” a timi kan zoh a si le kan thlarau thawng tlaknak a thlen hnu ah kan kuan dingmi kan kuan ṭheh hnu ah suak sal nak a um ti kha kan hmu thei. Cumicu mirang ṭongin ‘purgatory’ tiah an ko ih kan nih in ‘hell ramte’ tiah kan ko mi kha a si. Vancungram ah direct in thleng ding, um dingah kan tlak lo tikah hell ramte ah thian fainak tuah kan si ding ih kan kuan dingmi kan kuan ṭheh in vancungram nuam ah kan thleng sal ding tihi kan nih ih kan zumnak a si.

            Leitlun kan nun sungah rem te le ṭha te ih kan nung tlang thei nak dingah St. Paul in forhnak, thazaang peknak asilole zirhnak a nei ih tuni kan siarmi Bible a veikhatnak khal ah kan hmu thei a si. “Pathian kawhmi nan si bangtukin nan nunnak ah amah ih kawhmi nan sinak kha langter uh tiah ka lo forh,” a ti. Kan nih cu Pathian ih kawhmi asilole hrilmi kan siih Pathian ih milai kan si vek in Pathian thei lo tu pawl hnak in ṭha deuh le zoh mawi deuh ih nung kan zuam ding a ṭul ve a si. Cutin Pathian ih kawhmi kan sinak kan lang ternak dingah St. Paul in ziangtin in forh in zirh a si tile, ‘thinlung neemnak nei uh; tangdor le thinsau in um uh,’ in ti. Himi hi kan Bawipa Jesuh khrih ih lung put khal a si. Matthai 11:29 ah Bawi Jesuh in ziang ati ti sile, “ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding,’ ati. Kan Bawipa ih in pek dingin in kam cia mi colhdamnak kan hmu ding ah cu thinlung neemnak, tangdor le thinsaunak nei kan ṭul ve a si. Himi ‘thinlung neemnak, tangdornak le thinsaunak’ nei ding hi minung kan sinak ah a caancaan ah cu a har zet caan khal a um ko ding, asinan hi mi pawl hi Pathian ih cawi san mi, khai san mi kan si theinak ding hrangah um lo theih lo, tuah lo theih lo mi pawl khal a si ih kan thluasuah hmuh nak ding ih a harmpi pawl khal a si.

            Cun St. Paul ih simmi kan zoh bet hrih ding asile, ‘duhdawtnak nan neihmi kha pakhat le pakhat nan zawi awk theinak in langter uh. Thlarau in a lo pekmi pumkhat sinak kha ṭunghmun dingah hmun khatih a lo ṭemkhawmtu ih remnak in hmunter uh. Pathian in a lo kawh tikah a lo kawh sanmi ruahsannak cu pakhat a si vekin ruangpum pakhat a um ih Thlarau khal pakhat a um. Bawi pakhat a um, rinnak pakhat a um, baptisma pakhat a um. Pathian pakhat a um ih mi hmuahhmuah ih Pa asi,’ a ti. Pakhat le pakhat le remte in le duhdawt in um ding kan ti tikah kan zumnak, zumnak thawn pehpar in kan ruahnak le lung rual te ih pumkhat sinak pawl khal hi a thupi zet ti kan hmu thei.

            Duh dawtmi nu le pa, u le nau pawl, kan Bawipa hmai ih thuṭhennak hmun kan thlen hlan ah Pathian le kan mah kar lak ah siseh, kan mah milai pakhat le pakhat kar lak ah siseh, remnak a tuah thei tu kan si ringring thei nak ding in zuam cio uh si. Cun remnak kan ruah tik khal ah Pilat le Herod te ih remnak an tuah mi vek si lo in Pathian duhnak lam zawng in remnak tuah thei tu kan si thei nak ding khal in zuam uh si. Pilat le Herod cu an rem aw dah lo nan Bawi Jesuh thah nak ding thu ruang ah an rem aw ti a si. An mah ih remnak vek si lo in Pathian ih duhnak vek in thinlung nemnak, tangdornak, thinsaunak nei in le duhdawtnak thawn a hman mi lam ah pan in remnak a tuah thei tu si ding zuam cio uh si ti kha ka lo forh, ka lo sawm duh mi a si. A ngai tu nan zaten Pathian in lo thluasuah hram seh. 

Fr. Peter Lal Zin Thang (Hakha Diocese)