Rah nei mi Theikung le Rah nei lo Theikung (sim tu Rev. Fr. Lucas Sum)

Rah Nei Theikung le Rah Nei Lo Theikung

Thuthangtha sim tu Rev. Fr. Lucas Tha Ling sum

October 24, 2020

Siarding: Lk 13: 1-9

            Zumtu u le nau nan zaten, Pathian in a thar in thluasuah lo pe hram seh. 

Tuittum ah “Rah Nei Theikung le Rah Nei Lo Theikung” timi thu ruat khawm tlang uh si.

Hmaisa ah Pathian ttongkam kan ngai ta pei. Luka 13: 5-9.  

            “Fiang ten ka lo sim: Nan sual nan sir ih nan nundaan nan thleng lo ahcun anmah vekin nan thi ttheh ve ding,” tiah a ti. Jesuh in an hnen ah hi tin tahtthimnak a sim: Hlan laiah mipa pakhat in a hmuan sungah theipi kung pakha a ciing. A rah le rah lo a va zoh ttheu ih a rah a hmuh dah lo. Curuangah hmuan kil tu hnen ahm zoh hnik, hi thei pi hi kum thum tiang rori a rah maw rah lo, tiah ka ra veh ttheu nain a rah zianghman kan hmu lo. Hau mai aw. Ziangah so leiram ttha a ei rero ding, a ti. Sikhalsehla hmuan kil tu in, Bawipa, kumkhat te cu zuah hrih ko aw. A kimvel in leilung k alai dingih dawm ka burh hrih ding. Cule hna kum ah rah a rah a sile lungawiza a si ding, a rah thotho lole hauter leh si seh, a ti, tiah a sim.”

            Zumtu u le nau, mi tui kan siar mi Baibal ka ruah a silen Pathian ih duhdawtnak, zangfahnak, thinsaunak siseh cun ziangtluk in sual sir a thupi timi le rah nei mi theikung bangtuk kan si a thupi timi kan hmu thei.

            Theikung khi, kan zaten kan thei vek in, pung sia le pung ttha tin phun hnih an um. Asinan, Bawi Jesuh ih thah tthimnak in pek mi ah, pung ttha le pung sia thu a rel lo ih rah a nei mi le rah nei lo mi theikung lawng a rel. Rah nei mi thei kung cu pungttha theikung a si ih rah nei lo theikung cu pungsia theikung ti thawn a bang aw ko. 

Punttha theikung cu lo le hmuan dum sungih an um ah siseh, cun lamzin tlangih an um khal asilen, ziangtik hman ah kan hau siang dah lo, kan kil khawi ih kan zuah ringring theu. Kan ril rawn caan ih thei hmin kan ei tik ah kan pum a puar. Milai kan nunnak rawl pakhat a si. Pathian ih in pek mi laksawng pa khat a si.  Asinan, thei pungsia asilolen rah thei lo theikung cu tthat hnemnak an nei lo ih ruangah kan hau ttheu. 

            Zumtu u le nau, Bawi Jesuh in theikung thawn in tah tthim a si. Kan zaten rah ttha theikung vek kan si in duh. Rah nei lo, lolen rah thei lo, a silolen rah ko nan, ei theih lo pungsia theikung vek kan si ding, in duh lo.

            Inn sungsang hrangah, pawlpi hrangah, khua le ramhrangah tthat hnemnak a nei tu kan si ah cun rah ttha a rah tu theikung vek kan si ding. Asinan, inn sungsang hrangah siseh, Kohran hrangah siseh, khua le ramhrangah siseh tthat hnemnak kan neih lo a si ah con rah thei lo thei kung vek kan si ding.

            Bawi Jesuh cun kan zaten rah ttha rah tu thei kung vek si dingih in duh ruangah, hmuan dum nei tu pa ih a thei kung rah thei dingih a kimvel lai ih dawm pek a si vek in, kan nih khal kan zaten rah ttha kan nei thei dingin in nitin in dawm ttha in pe ringring a si. Cumi dawm cu ziang so a si? Thlarau lam ih rah ttha kan rah thei nak dingih a ttha bik mi dawm cu, Bawi Jesuh ih mi tu Baibal sungih in sim vek in, “kan sual sir ih kan nundan thleng ding” hi a si. Bawi Jesuh hi tin in sim: “Nan sual nan sir ih nan nun dan nan thleng lo ah cun nan thi ttheh ding” in ti.

            1 Johan 1: 8 sung ih kan hmuh vek in kan zaten sual nei mi kan si. sual nak kan nei lo a si, kan ti ah cun kan mah le kan mah kan bum aw a si. kan zaten tangdornak thawn rah ttha kan rah thei nak dingin sual sir in kan nuncan thleng zuam uh si.

Zumtu u le nan, rah ttha a rah tu theikung vek nan si asilen, rah ttha nan rah sinsin thei nak dingin siseh, rah ttha a rah tum rero tu theikung vek ih a zuam rero lai tu nan si a silen, rah ttha, rah thei nak ding in siseh, nan zaten Pathian in thluahsuah lo pe hram seh. Amen.