Tirhthlah pawl le an hnatuan (sim tu Rev. Fr. Pius Cung)

Tirhthlah pawl le an hnatuan

Thuthangtha sim tu Rev. Fr. Pius Cung

October 28, 2020

Siarding: Efe. 2:19-22; Lk 6:12-16                      

          RVA Falam Service ihsin thuthangtha ngaitu u le nau pawl, damcahnak le hngangam daihnak Bawipa in lo pe hram seh. Nan thlacamnak le nan tumtahmi pawl khal hlawhtlinnak le famkimnak  thleng hramseh. October 28, cu Catholic Pawlpi hrangah nisunglawi zet a si. ziangah tile Jesuh dungthluntu 12 lakih  tel  Simon le Judas ih puaini a si. Simon le Judas thianghlimhmin nei tu pawl nan zaten Happy Feastday, tiah ka lo cibai hai. Simon hmin nei cu rualpi le theihban ah an um phah nan Judas hmin nei hi cu ka theidah ngel cel lo. Dungthluntu 12 sungah hminthanglo le milar lo pa 2 an si ih, an thuhla khal tampi theih an si lo. Bible kan ngai tlang pei.            

          Lk 6:12-16 "Culai ah Jesuh cu thlacam dingin tlang parah a kai ih Pathian hnenah zanvar thla a cam. Khua a hung vaan tikah a dungthlun pawl a ko khawmih anmah sungin mi 12 a hril; cu pawl cu ‘tirhthlah pawl’ tiah a ko. An hmin cu Simon (Piter tiah a kawhmi) le a nau Andrew, Jeim le Johan, Fillip le Bartholomeo, Matthai le Thomas, Alfias ih fapa Jeim le Simon (Phunttantu tiih kawhmi), Jeim ih fapa Judas le Jesuh phiar lehtu Judas Iskariot tla an si."  Tirhthlah pa 2 puaini ah hin “Tirhthlah pawl le an hnatuan” timi thuhla hlawmawk tlang ka duh.

1. Tirhthlah pawl

          Tirhthlah 12 pawl hi dungthluntu mitampi sungin Jesuh in a cuangce in a hrilmi pawl an si ti fiangten kan siar. Tirhthlahmi a um ahcun a thlahtu a um a tul. Mahte thlahawk a ngah lo. Naingnganyee le leitlun uk awknak lamah cun keimah i hril uh, mee i pek uh tiah  thukamnak le laksawng a phunphun hmangin hrilmi siding cuhawk celcel a si theu. Pathian uknak, Biaknak lam ah cun keimah i hril uh ti a silo, thlunlam, vanlam ih hril a si sawn.  Mipi in kan duh mimi hril mai a ngah lo. Tuilai kohhran hrekkhat cun  thuthangtha sim tu siseh, kilkhawitu tuukhal siseh mipi in an mai duhmimi an hrilih an duhnawn lo le an hnong, an thlak, mi dang an thleng men. Jesuh ih tirhthlah pawl cu cuvek an si lo. Mipi ih duhdan khal a sutron loih, mipi duhmi khal a hrilsak cuang lo. Hriltu, thlahtu cu Jesuh a si, Thiangthlarau le Pawlpi a si. Judas Isacriot airawl tu ding an hril lai khal ah, Thiangthlarau rinsan le thlacamnakthawn Piter ih hoha nak in  Mattthias an hril. Tuilaisanah tirhthlah tampi leitlun hmunkip ah an tam zet nan a thlahtu zo ha a si tihi zumtu pawlih kan ruahtthat zet a tul a si. Tuisun ih tirhthlah pa 2 Puaini kan tuahnak hin Jesuh ih tirhthlah pawl thawn pehzom aw ringring mi kan sinak a lang ih, Vancung uknak leiparah kan tep ngah rero tinak a si.

           Tirhthlah si dingin dungthluntu si hmaisak a tul. Jesuh in a dung thluntu pawl a kawh veten a thlah cih mai lo. Thuhla tampi a zirh hmaisa. Zumnak thu, nuncan ziaza thu le midang va zirhsin ding thu pawl a sim, a hmuh a si. A zirhngah hnuah a mai aiawh dingah a fialmi le a thlah mi an si. Tirhthlah mi cun maiduhduh ih nun le sim a ngah lo, a thlahtupa ih fialdan nun le sim a tul. Curuangah tirhthlah pawl cun Jesuh duhnak le Jesuh tumtahmi a pakhatnak ih ret ringrign a tul. Pumpek awk le hlanawk thei a tul. Jesuh in a dungthlun dingin in ko ih, a mai aiawh ih feh ding, nung dingin in fial, in thlah a si. In thlah sannak famkim ter thei dingin a hnen ihsin tampi zir hmaisa u si. A tongkam tampi kan siar, kan ngai, kan ruat a si le in fial mi fiang ten kan thei sin ding. A nuncan ziaza zohthim in kan thinlungput le ziaza kan rem, kan theng vivo dingih, in thlahnak sannak khal kan famkim ter thei sin ding a si. Curuangah tirhthlah tha sithei ding in dungthlun tutha si hi kan zuam cio kei uh. Cun dungthluntu si ringringnak ah lungsi men  loin thlahmi kan sinak lam khal theiaw in hmainor u si, raltha u si.                       

           Jesuh in a tirhthlah 12 a hril hlanah zanvaar thlacam hmaisa. Ziang ruangah 12 ngelcel a hril ti le Isarel miphun 12, a thar in a din thok sal tinak a si. Thukam hlun ih Israel mi miphun hlei 12 cu Jacob ih fa 12 in hram a rak thok ih pipu thisen le ciruang thlun vivo in tesin fanau tiang Pathian miphun sinak an rak co. Thukam thar ih, tirhthlah12 hmangih hram a ttohmi Israel thar cu Jesuh ih thisen thawngin a si ih, a mah kan zumnak in Pathian miphunthiang ah kan lut, kan tel ngah. Jesuh krih ih zanvaar rori thla a camnak ih rahsuak miphun thar kan si. Curuangah Israel thar, Pathian uknak sungih tel a mi le fa cun thlacamnak rori hi kan thazang le kan cahnak ah hmang u si. Thuhla a tum, a te ti lo in Pathian hnenah thlacam in sut rawn u si, bawmnak dil u si. Pentecostni ih Thiangthlarau a tum khal kha tirhthlah pawl, zumtu umsun pawl lungrual teih nikua sung thla an camnak ih vuirah le thluasuah a si. Thlacamnak ih hram a rak thok mi tirhthlah 12, anmah thawi peh zomaw mi thacamnak ih  hram a bunmi Pawlpi cu,  thlacamnak  loin a fek thei ding maw? a thang thei ding maw? Israel thar pawlpi hrang siseh pumpak cio ih nunah siseh thlacamnak cu kan thlarau le kan zumnak ih nunnak ti le rawl rori a si.

2. Tirhthlah pawlih hnatuan

          Tirhthlah pawlih tuanvo cu Bawipa ih fial vek ih sim ding, tuah ding, Bawipa vek ih nun ding hi a si. Bawipa ih thinlung vek ih mi zawnruahnak le zangfahnak neih ding. Bawipa ih hmuh dan le theih dan vekin midang parih va hmuh ding, va theih ding a si. Bawipa ih thinlung, a mit le hna, a kut le ke kan si. Phuntampi in ruah le sim a theih.       

          Tuisunta Bible veikhat siarnak kan ngai ta pei. Efe. 2:19-22 ah, Nannih zentail mi pawl ramdangmi le khawtluang nan sinawn lo; Pathian ih miphun pawl thawn laikhat le Pathian innsangih sungtel nan si zo. Nannih  cu tirhthlah le profet pawl in a hram an phunsuakmi  parih sakmi nan si ve zoih  a kiil ih lungphum cu Krih Jesuh a si. A mah cu inn pumpuluk a kai khawm tu a si ih Bawipa ih biakinn thiangah cang suak tiangin a ttangtertu a si. Amah thawn nan pehzom awknak thawngin nannih khal amah zumtu dang pawl thawn  Pathian in a Thlarau a umnak dingih innah a sak cihmi nan si.                                            

          Kan hnatuan cu Pathianih umnak Inn sak hi a si. Innhram akilah Lungpi Jesuh a um, a parah tirhthlah pawl an suangaw vivo ih, kanmah pawl khal cuiparah sak cih mi kan si. Kan hram bunnak a fekih, tisuar le thlisia, setanral le minungral cakzet hmansehla a tlu thei lo, a siat thei lomi Pathian pawlpi, innpi kan si. Jesuh le tirhthlah 12 pawl thaw ih peh zom awk lo cun keimah te cun innpi ka si thei lo lawlaw ti hi cingkeng u si. Zumhnak hrampi sungih dungthluntu pawl  thawn a pehzom aw mi Catholic pawlpi ka zum kan timi hin thazaang in pe ringring hram seh. Simon le Judas cu Piter, John le Jame pawl vek in an hmin a thang lo, mi in an uar lo. Langbik, sibik, tengteng a tul lo, Bawipa thawn pehzom aw in Pathian innpi sak khawm ding hi Simon le Judas ih hna tuan cu a si. ‘keimah langbik, laar zet a tul lo’ tihi zir u si. Laitlang lamzinpi tluanah, saklam cang min lo dingin lungto an dawlih a tial tete a phunphun an tuah, zoh an mawi zet. An mawi, an tha tiah hmuhtheihmi lungto pawl lawngin lomhnak an co theu. Asinan Pi1/2 sah pipi an si tikah a lenglamih lungto pawl in a lang lomi, sunglamih lungto pawl thawn kopaw in hngetkhoh ten an ttangrual a si. Mawinak le lomhnak cu a kilih lungpi Jesuh in co ko seh. Cuilungpi parah tirhthlahpawl an siih nang le kei khal kan tel ve.

          Tirhthlah pawl thawn zumtlang, tuan thlang in, Pathian ih Thiangthlarau umnak Innpi (pawlpi) cu saksin u si, fek ter sin usi, mawi ter sin u sih. Mithiang Simon le Judas kan mai hrangah thla in camsak u law. Amen.