Africa in ‘remdaihnak a tul’ tiin Pope Francis in a sim June 6, 2021

Africa in ‘remdaihnak a tul’ tiin Pope Francis in a sim

June 6, 2021

          Africa in ‘tuah mawh nak a si lo. Remdaihnak a tul. Mi burpi thahnak ih a tel tu pawl ih innsungsang pawl kan riahsiat pi ih an kiang naite ah um in thla kan cam sak ding’ tiin Pope Francis in Africa nitlak nak lam ih khuapi pakhat a si mi Burkina Faso ih a rak cang mi buainak thawn pehpar in Zarhte ni ah a rak sim. Cui buainak cu tlawngkai ninga le Zarhte ni ah a rak cang. Pope in Zarhpi ni ah St. Peter tualrawn ah Angelus thlacam tlang dingih a thleng tu khawmzawhtu pawl hnenah hi tiin a rak sim. Cui buainak ah nauhak pawl tel in mipum 132 an thi ih cui khuapi hrangah tui kum sungih a besia bik mi thilcang a si. Acozah in nazi 72 rei cu riahsiat caan tiah a rak than. Hriamhma ngah tu mipum 40 an um tiah a sim. Ralkap pawl in Nigeria le rampi ih um Solhan khua cu zaan lai fang ah an rak do. Minung pawl an that, inn pawl, dawr pawl an ur.

          Tui doawknak cu Africa ram ih Sahel Muslim ram a din duh tu al Qaeda pawlkom pawl thawn pehtlaih awknak an nei. Hi pawlkom in UN humhimnak zung tiang rori an rak do. Hi pawlkom cu tui kum ihsin thok in a thupibik in Buikina Faso, Mali le Niger hmun pawl ah an cangvaih sal nak a si.Tuahmawh awknak pawl ruangah kumhnih sung mai um nak hmun a tan san tu mipum taan 1.14 luan an rak um. Cu vek in ram kiangkap a si mi Mali ram khal in farah nak, ruahti harnak pawl ruangah an um nak an tlan san ih a ra beu tu miharsa 20,000 luan an um.

          Pope Francis in cu vek ih a sim lai ah ‘Kawlram le Holy Land’ hrangah ‘minute pakhat hrawng dai ten um in’ thlacam sak dingah a rak forhfial.  Hi cangvaihnak cu ram tinkim thawn pehpar mi Catholic pawlkom pawl in hoha in ‘Holy Land le Kawlram hrangah minute pakhat sung dai ten um in’ cangvaihnak cu June 8, tlawngkai nihnih ni ih an tuah ding thu le mi tinkim tel dingah a rak sawm. Biaknak, miphung bang aw lo hman sehla, mai zumnak vek in tel ih thlacam a theih thu sim phah in ‘Holy Land le Kawlram remdaihnak’ hrangah zaangfah a rak dil.

          Hi thuthang cu Vatican thuthang ih kan don mi a si.

Photo courtesy of  (AFP or licensors)

https://bit.ly/3ckGKcw