Covid-19 thawn pehpar in thusuahnak tuah theh hnu hmaisabik nak ah Sistine chapel ah Pope Francis in nauhak pawl Baptism peknak nei. (January 09, 2022)

pope_francis_in_naute_pawl_baptism_pe

Covid-19 thawn pehpar in thusuahnak tuah theh hnu hmaisabik nak ah Sistine chapel ah Pope Francis in nauhak pawl Baptism peknak nei.

(January 09, 2022)

          Pope pawl ih Biakinn ti khal ih mi theih tam zet mi Sistine Chapel sungah covid-19 pulhnat suannak kham thei dingah thuthan rak suah caan ihsin thokin ziang vek caanserh hman rak tuah lo mi Biakinn ah Pope Francis in kan dung baite Bawi Jesuh Baptism a rak lak ni, Zarhpi ni ah nauhak (16) hmaisabiknak Baptism a rak pek. Cu pawl sungin mipa 7 le nunau 9 pawl an si. Baptism peknak caanserh sungah Pope in thuthangtha tawite a rak sim.

          “Nauhak pawl Baptism laknak cu an mai Pathian ih fate sinak laknak a si. Nu le pa pawl, lukaitu nu le pa pawl khal in nauhak pawl ih hminsinnak hlo lo dingah humhim a tul. Hi mi cu nauhak pawl thawn pehpar in nu le pa pawl le lukaitu nu le pa pawl ih nunram tuanvo a si. Nitin ih langter a tul. An rak lak mi Bawi Jesuih tleunak cu nitin ten tleu ter a tul” tiah a rak sim.

          Pope Francis in 2020, February 12 ah khal mipa (17), nunau 15, an zaten 32 Baptism a rak pek. Cui hnu ah March 11 ah leitlunhuap harhdamnak pawlkom in covid nathrik ruangah ziangvek thuhla khal siseh mipi khawmawknak pawl tuah lo dingah thusuah a si. Curuangah cui caan ihsin thok in 2020, March 11 in 2021 sungih a suak mi nauhak pawl cu Sistine Chapel ah Baptism pe thei nawn lo in pehtlaihnak nei mi an mai Parish lawngah Parish Puithiam pawl thawn Baptism an rak lak.

          Pope in 2020 ah tu vek Zarhpi ni ah Cardinal Konrad Krajewski, Arhbishop Fernando Vergez Alzaga pawl thawn ‘Last Judgent’ (netabik thuthennak) tiih hmin pek mi an rak tuah. Kumdang ah khal Sistine Chapel ah Missa Sumnak an rak tuah theu. Asinan, tui kum ahcun Missa sumnak ah kohhran mipi pawl thawn raithawinak an rak tuah. Missa sumnak a thok in a cem tiang nauhak pawl ih tah aw pawl le choir aw pawl theih a si.

          A hlan kumdang pawl ah Pope in Baptism pe dingah an fate pawl thawn Biakinn a fehtu nu le pa pawl hnenah Biakthawinak sungah nauhak pawl an tah khal le thinphang lo dingah a rak sim. Ziangah tile hi Biakthawinak caanserh cu malte a rei deuh. Dai te’i um tul mi nauhak pawl lawng umnak ding hmun le pawlkom cu a danglam tuk ding.

          Tui ni cu an mai puai ni a si. An mah pawl thawsa lo dingah ralring uh. Remcang ten um ter uh. An ril a rawn khal le Pathian hmai ah dai ten rawl pe uh; a poi lo. An tah khal le tap ter men uh. Ziangah tile an mah in community spirit thinlung an neih thu an langter.

          ‘Band spirit’ pawlkom vek a si. An tuah tlang theu. A thupi mi cu mi pakhat khat in a thok sak ding lawng a tul. Zalen zetin um hai seh. Rilrawng ter hlah uh. Bawi Jesuh Baptism a lak ni Baptism a rak lak nak hniglhlonak a si. Catholic Pawlpi ih thuzirhnak ca uk (CCC) ah tarlang mi cu Baptism cu nunram ah suahnak (saangkaa) a si. A dang Sacramentu pawl la dingah saangkapi a si tiah a simfiang.

          Pope St. John Paul II in cui ni ah Sistine Chapel ah nauhak pawl Baptism peknak caanserh cu 1981, January 11 ah a rak tuah thok. Cui caanserh cu a thok lam ah cun Sistine Chapel ah an rak tuah hrih lo. Pope um nak inn tlunta khaan chapel ah an rak tuah thok ih 1983 ihsin Sistine Chapel ah an rak thawn.

          Hi caanserh ih a thok lam ah nauhak tinkim in Baptism pek a rak si lo. Vatican ralkap pawl tiih mi theih tam zet mi Swiss Guard pawl ih fate pawl lawng Baptism pek an rak si. Cui sin Vatican ih riantuantu pawl ih fate pawl tla an telh vivo.

          Hi Biakinn ah Baptism la tu ding nauhak pawl cu kumkhat kim lo mi pawl lawng lak an on. Nu le pa pawl cu Biakinn ah kutsihnak Sacramentu tha ten a lak tu innsang pawl si a tul. Nauhak pawl Baptism lak nak ding Sistine Chapel ah nu le pa pawl, unau pawl, lukaitu nu le pa pawl rehearsal tuah a tul.

          Cui caanserh vek ah nauhak pawl hrangah hnipuan thleng aw thei dingah caanserh tuahnak kiangte ah Vatican in khaan a tuah sak tiah an sim. Hi thuthang cu CNA thuthang ih kan ngah mi a si.

 

https://bit.ly/31TpZTU

Add new comment

3 + 4 =