Duhdawt zet mi u le nau pawl thatnak, lungawi nak le daihnak thawn a khat mi Pascha (Thosal) si hram seh tiin cibai ka lo buuk hai a si April 4, 2021

Duhdawt zet mi u le nau pawl thatnak, lungawi nak le daihnak thawn a khat mi Pascha (Thosal) si hram seh tiin cibai ka lo buuk hai a si

April 4, 2021

          Tuini ah leitlunhuap in "Thinglamtah parih an thah mi Jesuh cu a sim cia vek in a thosal zo a si, Alleluia" ti mi Nu Pawlpi ih tlangau aw a khawk ruangro a si.

          Thosal thuthang cu a tak ih a rak cang mi thil thuhla a si. Hi thuthang hi a tuih kan hmuhton rero mi harsatnak ihsin luatnak in khihhmuh sak tu men a si lo.

          Pulhnat khal a karhzai rero lai. A hlei ce in mifarah pawl in khat le khat pehtlaihawknak le pursum leilawnnak lam ah harsatnak an tong nasa. Cui lai lak ah hriamhrei kai ih vuaknak pawl a cem hrih lo, ralkahnak hrangah hriamhrei suahmi a tam deuhdeuh. Hi hi tui san ih fihnungza thil a si.

          Hi ti vek ih awloksongza thil lak ah Thosal thuthang cun kan hrangah ruahnnak in petu thilcang mi a au pi hrih thotho. Cu mi cu 'Thinglamtah parih an thah mi Jesuh cu a thosal zo' ti mi a si.

          Hi thuthang cu Vancungmi thuhla a si lo. Thlarau khuavang thuhla khal a si lo. Jesuh ti mi hmin kengtu tisa le ruh, a nei mi milai pakhat thuhla a si.

          Gospel thuthangtha khal in "Pathian Fapa Messiah  ka si a ti awk ruangih Pontius Pilate kut sungih Thinglamtah parih thah a tuar hnu ah Cathianghlim ih sim cia vek in le a Dungthluntu pawl hnenih a sim cia vek in a nithumnak ah a a thosal mi kan Bawi Jesuh in thuhla a tarlang a si.

          Thihnak ihsin a thosal tu cu zo dang an si lo; Thinglamtah parih an thah mi Jesuh hi a si. Pa Pathian in a Fapa Jesuh cu rundamnak hrangih a lungthlitum kha famkim te ih a theh suak ngah ruangah a tho ter sal a si.

          Jesuh in kan sambaunak, kan dam lo nak le kan thih nak tiangin a mah tein in tuar sak a si. Kan harsatnak tuar in kan sualnak phurrit in phurh sak ruangah Pathian in a khaisang ih a tu ah cun kumkhua a nung mi Bawipa a si.

          Thosal Jesuh Khrih a hmutu pawl in a kut, a ke le a hnak ih hmasii pawl tiangin thil thupi pawl in rak tarlang sak. Hi hma pawl cu kan hrangih a neih mi a duhdawtnak langter tu kumkhua daih hminsinnak pawl an si. Tuar har zet mi hniksaknak a tuar tu hmuh in hi hma pawl sungah beunak an hmu thei ih hi hma pawl thawngin hnangamnak petu ruahsannak tiang an ngah thei a si.

          Thosal Jesuh Khrih cu pulhnat a tuar rero tu pawl, mina pawl le maih duhdawtmi ih tanta mi pawl hmuahhmuah hrangah ruahsannak a si. Cu pawl cu Bawipa in hnem hai sehla siibawi pawl le nurse pawl ih thazaang suahnak khal cak ter ringring hram seh law!

          Mi zo vek khal in,  a hlei ce in harsat a tuar hleice tu pawl in bom nak kan tul ih a cuih a tulsammi bomnak co thei dingah tuanvo kan nei a si.

          Hi mi hi tui tum ih pulhnat kan do rero nak ah a hleice in a langfiang sinsin. Siivai pawl hi hi mi pulhnat donak hrangah lo theih lo ih kan tul mi an si. Curuangah leilungpi hrangah tuanvo ka neih ve nak thei aw in leitlunhuap pawlkom pawl hmuahhmuah hnenah leitlun ih ram farah bik pawl tiangin pulhnat donak siivai an ngah lohli theinak dingah teimak suah co dingin forhfialnak ka nei duh a si.

          Thinglamtah parah a thi ih a thosal mi Bawipa cu hnatuan nei nawn lo pawl hrangah siseh, sumpai lam le ei in ding tlasam pawl hrangah hnemnak a si.

           A mah in ram uktu le mipi hotu pawl hmangin a tlasam bik mi innsang pawl tiangin a tawk mawi mi nuntu khawsaknak an ngah thei leh nak dingah tawlrel sak hram seh law. Hi pulhnat cun riahsiat za in mifarah pawl a pung zai ter ih beidonnak khal minung tampi hnenah a tlung ter a si.

          Mifarah pawl hmuahhmuah in ziang ti vek zawng ih farah an si khal ah ruahsannak an neih sal ringring a tul tiah Pope John Paul II in Haiti ram a tlawn lai ah a rak sim dah. Tu hrawng khal ah ka thinlung ruahnak pawl cu duhdawt mi Haitian miphun pawl hnenah a thleng ve.

          Harsatnak ih namnuai mi si men lo in hmailam hrangih ruahsannak le zumnak thawn ke kar sin ding khal in ka forh duh a si. Haitian miphun u le nau pawl ka lo ruat tuk hai a si. Ka lo tuarpi ih nan tuar mi buainak hrangih a phi dik ngah thei ding khal ka beisei a si. Haitian miphun u le nau pawl hi mi hrangah thla ka lo cam sak rero a si.                    

          Daihnak petu Khrih in minung dinhmun ih ding thei lo mi tampi umnak ralbuainak ih siatsuah mi Syria ram ah siseh, zohman ih ziang ih rel lo mi le ngaih sak duh lo mi Yemen ah siseh, kumhra sung thisen  luangih ralbuainak Libya ram ah siseh, hriamhrei kai ih buainak pawl cem ter lohli hramseh law.

          Ralbuainak ih a tel tu kaphnih ih minung pawl khal in an buainak cawl in an maih ram cio tungding sal dingah le ral tihnak thawn a khat mi mipi pawl hnangam te ih um ter sal dingah zuam cio hram hai seh law.

          Thawhsalnak ih Jerusalem ah kan thinlung in thum ter cih. Jerusalem ah daihnak le himnak um dingin Bawipa cu kan dil (cf. Ps 122); ziangah tile khat le khat unau dinhmun ih tonawknak hmun si dingih kawhnak a ngah mi cohlang dingah a si.

          Hi hmun hi Israel ram mi pawl le Palestine ram mi pawl cu buainak um lo ten um tlang theinak le thanso theinak dingah a hmun mi a phi pakhat ngah thei nak lamzin ong sak tu thuro rel nak suah nak hmun si hram seh.

          Tui Puaipi ni ah, kan dung thla ih ka vehvai mi Iraq khal ka ruat ve a si. Daihnak lamzin parih ke a kar tluan nak ding le Pathian fate pawl hmuahhmuah a cohlang thei tu Pathian ih lungthlitum innsang an din thei nak ding hrangah thla za ka cam sak a si.

          Thosal Jesuh Khrih ih huham in ram sung buainak le leitlun huap mi siatsuahnak terrorism ih hrinhro rero mi Africa mipi pawl hnenah thacahnak pe in kai hnget hram seh.

          A hlei ce in Sahel ram, Nigeria ram, Tigray ram, Cabo Deigado ramthen ih um mipi pawl hnenah Thosal Jesuh Khrih ih huham a tak ih thleng hram seh.

          Buainak cem ter dingih zuamnak pawl khal pehzulh si hram seh la, rualremduhnak le lungrualduhnak thinlung thawn zuam mi a si ding le minung pianvo le nunnak ih sunlawi zia a upat nak thawn zuam mi a si ding khal ka bei sei a si.

          Ralbuainak le siat suah awk nak tamtuk Leilung tlun ah a um hrih lai. Kan daihnak a si mi Bawipa ih ral tho duh nak thinlung neh thei dingin in bawm hram seh.

          Buainak sung ih tlatu, a hleice in Ukraine le Nagorno-Karabakh ih um pawl an innsungsang hnen ah him dam ten Bawipa in thlengter hram seh la, hriamhrei thatha suah ding zuamawknak cawl dingin Leitlun uktu pawl ih thinlung sungah hna tuan hram seh.

          Tui ni, April 4 cu, sualnak nei lo mi mipi pawl kumtin a that ih a siatsuah tu tihnungza thilri pawl ih thatlonak lang ter dingah Leitlunhuap ih thangphawk awk ni a si. Hi tihnungza thilri pawl cun siat suah awknak le thihnak tih lo ten zalen zet ih tlang khawm thei lo dingah in kham. Hi pawl um lo sehla, kan leilungpi hi ziangtluk in um a nuam ding!

          Duhdawt mi U le nau pawl, tui kum khal ah, hmun tampi ih Khrihfa zumtu pawl cu maih duh vek in Thosal Puaipi hmang thei lo in an um; hrek khat tla cu Pathian biak khawm nak ih tel thei lo lawlaw hman an um hrih a si.

          Cutivek ih Pathian biak tlang thei lo ding ih kham awknak siseh, Leitlunhuap in biaknak lam zalen nak um lo dingih kham awk nak pawl khal reh sal in, zo cio zalen zet ih Pathian an thangthat thei ding le a hnen ih thla an cam thei nak ding hrang khal thla za ka cam a si.

          Kan tuar rero mi harsat nak tampi lak ah, Khrih ih hma thawngin ti dam kan si zo timi hi ziang tik hman ah hngilh hlah uh si (1 Pet 2:24). Thosal kan Bawipa ruang ah kan harsat nak khal an thleng aw zo. Thihnak a um nak hmun ah, nun nak a um zo. Tahnak a um nak hmun ah, hnem

 nak a um zo. Thinlamtah a cohlan nak in Jesuh in kan harsat tuar nak cu man a nei ter ih cuih thathnemnak cu leitlun ah karhzai dingin thla kan cam a si.

          Nan zate hrang ah thatnak, lungawinak le daihnak thawn a khat mi Thosal Puai si hram seh!

          Hi mi thuthang cu Vatican thuthang ih kan don mi a si.