Europe Bishop pawl commission ih president thar in Pope tong

Europe Bishop pawl commission ih president thar in Pope tong

        Kan dung zarh ah Europe Bishop pawl in president thar hril nak an nei ih an commission president thar tiin Italy Bishop Mariano Crociata an hril. Crociata cu Cardinal Jean Claude ih dinhmun aiawh in Italy ram Lazio hmunih Latina Catholic Diocese uktu a si. Europe diocese pawl ih bishop aiawh tu tiin anmai thal caan plenary assembly March 22 ih an tuah mi ah Crociata vote an pek nak a si.

          Kum 70 a simi Crociata in 2028 tiang Europe ih Bishop pawl pawlkom (COMECE) a hoha ding. Vice president pali in an bawm ding. "Atui can cu Europe le kohhran ih a thupi bik mi caan a si. Lungrualnak le tankhawmnak a tul tuk kan society pawl thleng awknak pahsuak nakah lam in hmuh a tul" tiin amah an hril hnu Crociata in a sim.

          Crociata in EWTN thuthang ah amah an hril nak ih a ruahnak le a tuanvo par ih a ruah  nak pawl a sim. "kanmah cu diocesan bishop pawl kan siih hi mi ah tuanvo kan nei ih pawlkom ih tonkhawmnak a tul" tiin a sim. Bishop in a hlan ih vice president tiin kum 5 lai rian a rak tuannak ih a hmuhton mi a sim ih cumi in a tui tuanvo thar ah mahlemah zumawknak in pe tiin  a sim.

          Crociata in Pope Francis in Europe ih ton mi thu pawl ah nasa zet in ngaihsak ih March 23 ih tuah mi COMECE thurelkhawmnak ah Pope in Bisho pawl hnen ah "Europe lungrualnak hrang le remdiahnak hrang thazang suah dingah" a sawm.

          Italy Bishop cu Sicily tikulh Italy ih thlanglam Castelvetrano khuapi ah a rak suak. Theology thawn doctoract a ngahnak Rome ih Pontifical Gregorian University ih Philosophy le Theology a zir hnu 1979 a kum 26 ah Puithiam ordination a ngah.

          Puithiam tin kum 24 rian a tuan hnu ah Mazara del Vallo Diocese ah vicar general tiin le Catholic cangvaihnak ah diocesan director tin hril a si. Sicily ah Pontifical Theology Faculty ah theology saya tin khal rian a tuan. Mazaradel Vello ih Institute of Religious Sciences ah theology le Christology professor tin khal rian a tuan.

          2007 ah Crociata cu Sicily diocese ah Noto Bishop tiin rian a tuan. A hmaikum ah Noto ih Bishop a tuan  nak tel in kum 5 sung Italy Bishop pawl pawlkom ih secretary general tiin hril a si. 2013 ah Italy ih mainland ah Latina Terrarica Sezze Priverno ah Bishop tiin rian a tuan.

          Europe Bishop pawl commission ih president an hril nak ah Crociata cu kum 5 sung vice president tiin ahmaisabik riantuan tu a si. 2017 ihsin Italy aiawh tu a si. COMECE cu Europe ih ramthen 27 ih Bishop 27 aiawh ih hril mi a si.

          Commission ih hoha nak in Europe ih Catholic man neihnak tha pe dingah le hmuhsuamnak dodalnak le ramdang Christian pawl kilhim dingah a si. Himi thuthang cu CNA thuthang ihsin kan don mi a si.

https://bit.ly/3U07CTQ