Florida ah inn minnak ruangah siatsuahnak a tuar mi pawl hrangah Pope Francis in thla a cam sak June 27, 2021

Florida ah inn minnak ruangah siatsuahnak a tuar mi pawl hrangah Pope Francis in thla a cam sak

June 27, 2021

          Tlawngkai nili ni zingpit te ah Florida ramthen, Surfside ih um dot 12 a sang mi Champlain Towers tikap condominium innpi a rak cim ih minung pali an rak thi ih mipum 159 an hmuh hrih lo tiin Miami-Dade ih khawpi uktu Daniella Levine Cava in a rak sim. Pope Francis in cui inn cimnak ah nunnak a liam tu pawl kumkhua nunuamnak pek hram dingah le thih leh hloh nak hrangih riahsia tu pawl hnem in hi thilcang ruangah natnak a tuar tu pawl zate khal thazaang pe hram dingah thawhnak le cemnak nei lo mi Pathian hnenah thla a rak cam sak.

          Inn nei lo mi innsang pawl le hriamhma a ngah tu pawl a bawm rero tu pawl le mi nunnak a run tu pawl zaten Pope Francis in lungawi thu a rak sim tiin Vatican thuthang in a rak tarlang. Khawpi uktu Cava in Zarhte ni ih thuthang simfiang nak ah mipum 127 an rak thi ih inn cimnak ruangah meisa a kang ih mei khu pawl in hnawmpen pawl an hei kah ih mi nunnak a humhim tu pawl hrangah cu donkham tu pakhat a si ko nain, hawl nak le nunnak humhimnak hnatuan pawl hmaisa ah cawl lo in tuah vivo dingah a rak sim.

          Inn cimnak ah a hlo tu mipum 159 an um ih Zarhte ni zinglam tiang mipum thlengawknak a um lo tiin thunei tu pawl in an rak sim. Cui inn kiangih um St. Joseph Catholic Parish ih Fr. Juan Sosa in Catholic innsungsang pakua an hlo rero lai thu le cui inn min nak ruangah siatsuahnak a tuar tu zate hrangah tlawngkai ninga ni zinglam ah St. Joseph Biakinn ah Missa raithawinak a rak tuah sak.

          Zarhte zaan khal ah a cim mi inn kiangah pangpar pawl le phayawngtaing pawl keng in an vel dingih thla an cam sak ding thu tlawngkai ninga ni sun ah CNA thuthang ah a rak sim. ‘Kei cu Hurricane thawn pehpar in caan reipi ka rak tuah dah ko nain hi tluk ih nasa zet mi thilcang ka tong dah lo. Mitin ih mithmai ah riahsiatnak lawng hmuh a theih. Riahsia za zet a si’ tiin khal Catholic Archdiocese pawlkom ah reipi rian a tuan tu Jackie Carrion in sim phah in cui thilcang hrangah Florida Catholic Diocese khal a rak hnem.

          Hi thuthang cu CNA thuthang ih kan ngah mi a si.

Photo courtesy of National Catholic Register

https://bit.ly/3hg02BG