France ram sung ih Yatih tlawng pawl in sabit hmuan ih hnatuan pawl bom ding ah fund hawl June 5, 2021

France ram sung ih Yatih tlawng pawl in sabit hmuan ih hnatuan pawl bom ding ah fund hawl

June 5, 2021

            St.Benedict Yatih Puithiam pawl le Yatih Sister pawl cu an ram sung ih sabit hnatuan dingah tumtah in "Pope ih sabit hmuan" tiin hmin pek mi sabit hmuan ihsin ngah mi sabitti cu zuar ding asilole an zem thlang ding a si. Cui sabit hmuan cu "Rhone" horkuam kiang ih tlang ah a um. Cu tawk hmun ah Barroux Yatih pawl le cutawk hmun ih a um mi sabit hmuan ih hnatuan pawl an cinmi sabit hmuan ihsin suak mi cu dawr ah an ret ding. Himi sabit hmuan cu "Pope ih sabit hmuan" tiin hmin pek a si nak cu Pope Clement 5 nak san 1309 ah sabit hmuan tiin a tuan thok ter ruangah a si.

         Via Caritatis tiin hmin pek mi sabitti palang 15000 cu zuar thei dingah Yatih pawl in ruahsan nak an nei. An zuar ih an ngahmi paisa cu covid 19 nat nak ruangah hnatuan pawl an cawl ih in ei lam harsa mi sabit hmuan hnatuan pawl ih innsang pawl an bawm ding a si. Cutawkah sabit hmuan ih hnatuan tu innsang 80 hrawng an um ih, cumi hmuan lawng rinsan in in le ei hawl tu pawl an si. Anmah cu hnatuan an zuam nan zuar thei ding kop sabit an suah thei loih an thin a nuam lo. Curuangah a tu Yatih tlawng in an tuah that sal ding. Cuti asilole a tui ton rero mi buainak pah suak a theih lo ding.

         Sabitti le sabitti tuahnak ah a thiam zet mi mifim tiin leilung pumpi hman ih theih pi mi Philippe Cambie ih bom nak in zuar ding mi sabit an suah ding a si. Yatih pawl tuah mi sabitti cu a thawt daan a phunphun in an tuah ih hleiah a man khal a ol thu, cui sabit pawl lei nak in khal sabit hmuan ih hnatuan tu pawl bom a si ding. Sabitti sen, a rang le hninsi wine khal tuah in America le Europe ram pawl ah an kuat ding.

         An suah nak hmin Via Caritatis (karuna hnatuan nak) hmin an hril nak cu a tui tuah mi sumdawn nak hrangah hril asilo. Sabit hmuan ih hnatuan pawl bom ding ah tumtah nak hrimhrim a si thu, cutivekin Bawi Jesuh cu amah le mah pek awk nak lam khal asi thu tuanvo nei tu Yatih in a sim. Yatih pawl khal an in le ei pawl hrangah hnatuan har taktak an tuan. Hitivekin tuan in cawm aw ding khalah an pawlkom a din tu An Yatih pa bik "St.Benedict" in daan a rak pek. Yatih Puithiam pawl cu an in ei mi pawl midang hnen ah beisei nak an nei lo.

         A hleifuan zetin an hawl ih, mi farah zonzai pawl, mi harsa pawl khal hlawm dingah daan khal a tuah sak. Curuangah an cin ih an zuar mi sumpai in kumtin karuna hnatuan pawl a tuan tu pawlkom hnen an hlu thu, Yatih pawl anmah rori hnatuan nak cet pawl an mawng, sabit khal an loh thu, anmah le ciar in hnatuan an neih vekin kum tluan in hnatuan ding an neih ringring thu, sabit hmuan kha an hoha nan thlarau lam khalah an thathnempi in an um thu, sabitti cu minung taksa dam nak lawng ah in asilo. Bawi Jesuh amah rori sabitti cu a thi ih a thlengnak cu  san a um ding. Sabitti cu thilri a si. Asinan thlarau lam hrangah a thupi zet mi thil tiin Bawi Jesuh ih a hman nak vun mang ding tiin Benedict Yatih pakhat asimi America ram mi Fr.Michael in a sim. Himi thuthang cu CNA thuthang ihsin kan don mi a si.

Photo courtesy of National Catholic Register

https://bit.ly/3wcAU56