Fratelli Tutti capi ah Pope Francis ih covid-19 . October 12, 2020

Fratelli Tutti capi ah Pope Francis ih covid-19. October 12, 2020

              Ruahban loin covid-19 cu leilung killi ah ton a si. Ahlanah minung pawl in mah le mah kan him tiin an ruah nak cu a hman lo timi cu pulhnat in a lang ter. Leitlun ram a phunphun ah mah tuah daan thawn pulh nat kham rero asinan kan zaten hmunkhat ten kai aw in tuah a theih hrih lo timi cu pulhnat in a lang ter. Leilungpi cu pehtlaih thei nak fim nak hyper-connectivity pawl a um nan, minung zaten ton mi harsat nak cu hmunkhat ten felfai ter dingah hmunkhat ten um dingah a har ter deuhdeuh. Himi pulhnat ihsin zir dingmi tiin pulhnat a cem tikah a tui a um cia mi dinhmun pawl cu thangso deuh ding in tuah ding, a um cia mi ti daan pawl, thlun ding mi daan pawl kha tha deuh in tuah ding tiin zir nak kan neih asiahcun a um mi pawl hnon nak, ziang ih rel lonka ah a cang ding.

              Covid-19 vek leitlun pulhnat pi cu leilungpi in ton asi ruangah minung pawl cu leilung pakhat khua khat Global community hmunkhat ah kan um. Lawng pakhat to in khual tlawng mi pawl kan si. Mi pakhat ih buainak cu kan zate ih buai nak a si ti-in theih nak malte sungin in ngah ter ticu a hman. Pakhat vial bom a ngah lo. Kan zaten hmunkhat ah bawm ding timi khal theih a si thlang. WHO khalin a than. Mai ram vial dokham nak sii pe in a dang ram pawl ah lockdown tuah nak cu ziang ti zawng khal in a kaih thei lo. A hmin a thang mi siivai company pawl khal veikhat hman tuah dah lo mi fim nak hlawm awknak an tuah ruangah Remdesivir cu India vekin, a dang ram ah tuah atheih cu thluasuah pakhat a si. Kanmah pawlih nitin kan caan pawl, kan tumtah mi pawl, kan paih mi pawl, kan thupit ter miah, tibuai awk nak a um lo. A hmunhnget, fumfe tiin kan ruah mi thil pawl, a tha lo mi a hnget lomi thil pawl an si. Kanmah pawl cu na ol mi pawl kan si timi cu hi leilung ih thiltha lo in a lang ter.

              Mai duhham nak thawn din mi a lenglam thil pawl parah kan thinphang ringring nak pawl a hlo ih, kanmah pawl cu pakhat le pakhat kan pehtlai aw. Ulenau kan si nak in thei ter. Mi malsawn ih that nak lawng zoh a ngah lo. Mi pakhat hman tan a ngah lo. Mi tin hrangah zoh ding a si. A rang ih, a cekci mi thusuak kha hawl ringring asinan a tui caan ah cun thin tawi nak, tihphan nak ton a si. Leitlun pulhnat ruangah ton rero mi natnak pawl, thudik lo pawl, thin phannak pawl thawn minung pawl in ziangkim an ti thei lo, rikhiah mi um nak an theih thiam nak ihsin minung pawl hrangah a thupi sawn mi cu mai thuanthu kah zoh sal dingah, minung pakhat le pakhat karlak pehtlai awknak cu zoh sal dingah, minung kiangkap pawlkom awk daan, a thupi bik mi cu minung sinak ih san cu the meaning of existence zoh sal dingah asi. Pathian in in hrem tiin ka ti lo.

              Kiangkap par ih kan mah minung pawl ih an tuah mi pawl ruangah kan kiangkap in nat nak in pe sal tiin ti a ngah lo. Leilungpi in a do rero a si. Ziang tinkim khat le khat an pehpar awk asile mah cu mai nunram sersiam tu tiin, a um rero mi ziang tinkim uk tu tiin au nak cu hi leilungpi pulhnat thawn pehtlai ih a um dah lo ruangah ruat dingah a har. Ca ngan tu saya Virgil ih a hmin a thang mi ca tluan pakhat cu in von mang ter. The tears of things, the misfortunes of life and history kiangkap ih mitthli, minung thuanthu ih thil sia paw, minung pawl in thuanthu ih zir mi pawl, nunnak ih zirhtu saya cu olten hngilh a si theu.

              Himi pulh nat a cem asile a cang thei mi kanmah pawl ih a tha lo zet mi kan lehrulh nak in tampin tuah, tampin hmang, daan sungah kilkhawi tu um lo vekah a cang ding a bang. Duhham nak thinlung thawn mah le mah hi mi hnakih tam humhim nak a pe tu lamzin pawl an tuah pei maw. Pathain hnen thla ka cam. Himi pulhnat a cem asile anmah le anmah pawl them and those timi a hlo dingih kan mah us timi lawng um hram seh. Ziangzir mi hman ngah lomi leilungpi thuanthu ih ton mi nehhnu thil thalo pulhnat pakhat ti lawng in cem ter hlah uh. Kanmah pawl pakhat le pakhat kan tul timi cu hmu thei sal hram uh. Cuti asilole mi malsawn lawngin leilungpi cu an uk asile thil tha lo tuah nak a cang ding, kap hnih in a siat ding.

https://bitly.com/