Innsanglam buainak pawl cu camsiat mi a si lo caantha a si November 6, 2021

Innsanglam buainak pawl cu camsiat mi a si lo caantha a si

November 6, 2021

         Pope Francis cu November 6 ih rak tuah mi leitlunhuap ih Khristian innsang nei mi pawl komawk salnak cangvaihnak caanserh ah a tel ih tha peknak tongkam a rak sim. Cui tonawknak cu innsang lam ih buainak a tong mi nupa karlak ih pehtlaihawknak a din sak saltu caantha pakhat a si ih nupa pawl dinhmun ih khuasak dingah bawmnak a pek tu caanserh pakhat a si. Pope cu innsang lam ih harsatnak a nei tu nupa pawl a bawm rero tu cui cangvaihnak pawlkom ih pawlkom sungtel pawl thawn an rak tongawk.

         Tui san ah milai pawl hrangah bawmnak a tul tuk thlang. Innsang lam buainak ton mi hi camsiat mi pakhat a si lo. Hi pawl cu innsang nunram lamtluan ih thenkhat lawng a si ih pahsuak a tul mi caantha pawl an si. Bishop pawl le Puithiam pawl khal in hi vekin harsatnak pawl lak ah caantha pakhat ah lak in lamhmuh a tul tiin Pope in thapeknak tongkam a rak sim. Cui Retrouvaille pawlkom in innsang neitu pawl bawmnak petu caanserh cu 1977 ah Canada ram ah Catholic Pawlpi in a rak thok ih miphun, Biaknak thleidang lo in a bawm theu.

         Cui pawlkom ah miharsa bawmtu pawlkom pawl khal an um ih Canada ram, America a lai lak le thlanglam pawl le Africa, Europe ram pawl ah darh in an tuah rero thlang. Retrouvaille ti mi tongfang cu French tong ih ra mi a si ih tongawk salnak ti duhsan a nei. Innsungsang lam ih buainak a tong tu nupa pawl a bawm rero tu cui pawlkom cu Pope in a rak lawm.

         Hi hnatuan cu a thupi tuk. Buainak tih a nung lo. buainak pawl in thanglian dingin in bawm. Thenthek aw deuhdeuh lo dingah ralring ten tuah thiam a tul. Buainak pawl a can a si le thinlung pawl phit, lung pawl a hak ih a phi hawl a har sinsin. Hma ti mi cu neih a si cio ko. A dam ter tu pawl khal in hriamhma thawn an dam thei sal. Buainak nan nei. Hma pawl nan neih a si le Pathian ih bawmnak dil uh. Unau pawl ih bawmnak thawn dam sal uh. Mai nunram ih hmuhton mi pawl ihsin midang pawl a bawm sal thei tu si zuam uh.

         Nunram ih pah tul mi hniksaknak pawl tampi a um. Hi hi nunram a si. Curuangah khat le khat zuam tlang in feh thia dingin Catholic Puithiam pawl khal siseh, mi men men pawl tla Pathian hnenin zir a tul. Jesuh Khrih a thawhsal hnu ah Emmaus ih a va relh tu Dungthluntu pahnih ziangtin an tong aw ih khual an tlawng tlang ti vun ruat sal uh si.

         Bawi Jesuh cu Vancungram ihsin rin lo pin a rung tum lo. Nan nih cu dunglet her sal uh tiin thuneihnak awkam khal a hmang lo. Mi zaraan a si ko. An mah thawn khual a tlawng tlang. An tuar mi harsatnak pawl a ngai sak. A feh pi hai ti tikah harsatnak a tong rero mi dinhmun pawl ih saangkate pawl kharsak ding tikcu caan pek vek a si. Thinsau a tul. Pakhat le pakhat upat awk a tul. Tikcu pek in man cia a tul tiin Pope in caanserh ih a sim mi thuthangtha sungah a rak sim.

         Hi thuthang cu CNA thuthang ih kan ngah mi a si.

https://bit.ly/3Cy9pFh