Khawmzawhtu mipi thawn tonawk laiah mi pakhat in a rak hnaihnok nan Pope Francis in cumi hrangih thlacamsak dingah sim (February 2, 2022)

Khawmzawhtu mipi thawn tonawk laiah mi pakhat in a rak hnaihnok nan Pope Francis in cumi hrangih thlacamsak dingah sim

(February 2, 2022)

            Pope Francis in zarhtin tlawngkai nithum tinten zinglam 10:00 AM ah leitlunhuap ih khawmzawh tu mipi pawl thawn St. Peter tualrawn ah siseh, nikhua ruangah asilole a thupi dinhmun pakhat khat a um le Pope Paul VI hallkhan ah siseh an tong aw theu.

            Kan dung February 2 cu tlawngkai nithum ni a si. Curuangah Pope in khawmzawhtu mipi pawl thawn Pope Pual VI hallkhan ah tongaw in thu a rak sim. Culaiah mi burpi lak in mi pakhatkhat cu au ring zet in “Pawlpi ih hnatuan cu Pathian ih duhdaan a silo” tiin miring Spain le Italy tong thawn tu le tu a rak sim. Cumi cu mi burpi ih dungah a ding ih mask khal a kut ah a keng.

            A au aw pawl ruangah khawmzawhtu pawl khal an thla phang thluh. Curuangah Vatican ralkap pawl in an hruai ih hallkhan ih lenglam ah an rak dawi. Cu tiin an dawi ko nan an khit lo. Asinan “Bawipa cun Pathian a el. Bawi pa cu Pathian asilo” tiah a au kel in a au ih an hruai nak ah a rak feh. Ziangtluk ih a hnaihnok hman ah kum 85 a kim zo mi Pope in a thusim mi a sim bet rero ih cutin a au rero tu hrangah thlacam sak dingah khal khawm zawh tu pawl a rak forh.

            Cui au aw au halkhan sungih um tu tinkim in an rak thei. Cupa cu taksa lam, thinlung lam, thlarau lamah pakhat khat tulsam mi, sambau nak a nei men thei. Amah cu kan unau pakhat a si. Harsatnak pakhat khat ruangah khal asi thei thu, a tul mi pawl thei lovekin um loin sunsak uh. A hrangah thlacam sak phahin hi tonawk nak cawl uh si tiah Pope in a rak sim. Cui caanserh cu cuvek hnaihnok tuar ih cawl mi a silo. Cu pai au aw cu caanserh cem lam thlen laiih cangmi a si. Pope ih Kohhranpi pawl thawn tonawk nak cu punghman tuah a si ih a rak cem nak a si. Himi thuthang cu Rome Reports thuthang ihsin kan don mi a si.

Photo courtesy of CNA

https://bit.ly/3LkvxJ0