Leitlun mino pawl ni cu 2023 ah tuah ding November 13, 2020

Leitlun mino pawl ni cu 2023 ah tuah ding

November 13, 2020

        2023 kum ih tuah dingmi leitlun mino pawl ni a timtuah tu pawl in Portugal ih Catholic mino pawl hnen ni hnih sung a rei ding mi leilung pumpi thawn pehpar mi Pathian hnatuan nak program ah tel dingah an sawm.

          Mino pawl tel dingin sawm a si nak san cu himi canserh cu Portuguese ram zaten hnen ruah sannak le lungawinak keng sak dingah tumtah mi cangvaih nak tumpi pakhat a si.

Cui canserh cu a ralai ding mi November 28-29 niah tuah ding asi-ih, cui nihnih cu zung pit ni khal a si. Cutivekin Nu Catholic Pawlpi ih 2021 biak khawm nak a thoh nak Adventu a hmaisabik kar khal a si.

          Mino pakhat ciar cu an um nak hmun, nun tu khuasak nak hnatuan phah in Pathian riantuan dingah sawm a si.

Himi cangvaih nak ih tumtah mi vekin 2023 kum "leitlun mino pawl ni" hrangah Pope Francis ih a than mi cu "Bawinu cu zamrang ten a ding ih a feh" timi Bible catlang khi a si. Cui Bible ca tlang cu Mithianghlim Luk Bible Cathianghlim ih lak mi a siih, Bawinu cu an sungkhat a u asimi Elizabeth hnen a thlen nak a si.

          Himi thulu cu 2009 June thla ah an than zo. A tu vekin pulhnat ton caan ah mino pawl sinak in rualpi nei loih a um tu pawl phone thawn biaknak khal in siseh, hlapi ih a ummi inn sang sungtel pawl phone thawn biakin tha pek nak tongkam pawl, thlacam phah in biak awk theih a si thu, cuvek thotho in hmun le ram sungih Diocese sung harsat tuar tu pawl a bom tu karuna hnatuan tu pawlkom pawl thawn khal kom aw in bom a theih thu thu tawlrel tu pawlin ruah nak an pe.

          Pathian riantuan thei nak lamzin cu sim in a cem thei lo. Curuangah mino pawl sawn in thudik a tul mi mai khua le tlang pawl ah thudik thleng nak siseh, hmual a nei mi bom nak khal siseh tuah dingah forh fial nak a si. Himi tuah tuan nak cu pakhat khat siseh, pawl kom in siseh, pawlkom fate phuan in siseh tuah ter a duh.

          Hitivekih tuah nak khalah pulhnat suanawk nak um lo dingah ralrin dingmi thu thawn kaih in tuah ding khal hngilh lo ding a si.

Hitivek in tuah tikah 2023 leitlun mino pawl ni hmuah nakih an suah zo mi angki hruk dingah, cutiin himi cangvaih nak cu ruah san nak pek vek ah a cang timi cu theih thiam ter duh a si thu ruah nak an pe.   

          2023 kum leitlun mino pawl puai ni tacik cu thinglamtah ih hmaiah Bawinu ih zuk cu Portugal aalan a tel mi yawng pawl thawn an tuah. Himi tacik cu leitlun ram 30 ih aiawh tu pawlin an hril mi a si.

Himi tacik cu Lisbon khuapi pehtlaih awknak company pakhat ih a tuantu kum 24 asimi Beatriz Roque Antunes in a suai mi a si.

 Pope in Portuguese ramih khuapi in leitlun mino pawl ni cu inntek dinhmun in tuah ding asi thu cu 2019 ah Panama miphun, leitlun mino ni ah an than. Himi thuthang cu CNA thuthang ihsin kan ngah mi a si.

https://bit.ly/3q3XPfV