Lungkim nak a tul mi daan thawn Missa raithawinak cu Pope Francis in hnget ter sal July 16, 2021

Lungkim nak a tul mi daan thawn Missa raithawinak cu Pope Francis in hnget ter sal

July 16, 2021

            Rome daan tin khal kawh asi vekin, Latin daan ti khal in mi theih tam mi Nu Catholic Pawlpi ih biakkhawm nak thawn a dang aw mi Missa raithawinak cu Pope Francis in (motu proprio) a than ih tlawngkai ninga ah a kham. Cui thuthan mi cu July 16 ah a suah. Cumi thuthan mi cu 2007 ah Pope Benedict 16 in "Summorum Pontificum" capi suah nak rem nak a si. "Summorum Pontificum" ih thuthan nak sungah Catholic Puithiam in 1962 kum ih suah mi Latin tong ih Missa raithawinak nak cauk thawn Missa raithawinak nak tuah a theih tiin a si.

          Cumi thu than mi remsal a si nak cu Pope Francis in leipar ih Bishop pawl hnen ah ca kuat in a sim fiang. Ca sungah "Bawi Jesuh ih taksa cu lungrual na kilkhawi dingah tumtah in a hlan ih ka hnatuan a tuan tu Pope pawl in an tuahmi lungkim nak pawl bal sal nak a si. Cumi thuthan cu 1962 ih ca suah mi Missale Romanum (Roman Missal) daan ca thawn Missa raithawinak nak olten tuah thei nak a cang ter. Pope ih thuthan mi asimi Traditionis custodes "Guardians of the tradition" (hlan lai daan kilkhawitu) sungah 1970 kum ah remsal in suah mi ca "Roman Liturgy" (Roman daan) hmang dingah forhfial a si. Cumi thuthan mi sungah tuah taktak dingah thu 8 thawn a lang ter.

          Hmaisabikih a lang ter mi cu Vatican 2 thurelkhawm nak tuah theh Pope Paul 6 le Pope Joh Paul II te ih ca suah mi "daan" cauk cu "Roman daan" (Roman Riter) hrangah Lexorandi (the law of prayer) daan cauk asi ding tiin a lang ter. A pahnih nak ih a lang ter mi cu 1962 ih suahmi daan cauk hman thei nak le hman thei lo nak cu pehpar awk nak anei mi hmun ih Bishop pawl mai Diocese sungah nemhnget ding tiin a sim.  

          A pathumnak langter nak ahcun hmun tinkim ih Bishop pawl in mai Diocese sungah Nu Pawlpi ih a nemhnget mi daan thawn siloin Missa raithawinak a um le um lo ralring ding ah a si. Himi thu ah pehpar awk nak a nei mi hmun ih Bishop pawl pawlkom in a dang daan thawn tuah asinan  Nu Pawlpi ih zirh thei nak thuneih nak le Vatican 2 ih thil ti thei nak thlun le thlun lo nemhnget ding a si.

          Cuti in Bishop pawl cu Kohhran mipi pawl ih thlarau lam that nak ruat in cumi a danglam mi daan pawl thawn Missa raithawinak tuah thei nak pek asile hmun hminsin dingah a tul. Hi tivekih sim asi ruangah Biakinn thar sak dingah, hmun thar hawl dingah ti duhmi asilo. Puithiam a um nak biakinn ah Missa raithawinak tuah caan a dang ten tuah in Missa raithawinak tuah a theih. Cutivekin cumi 1962 ah Pope John 23 ih a suah mi ca daan thawn tuah ding ni, ziang vek tik cu caan, ziang vek hmun, zo in Missa raithawinak a hoha ding timi khal tuah dingah Bishop pawl in tuanvo an nei.

          Thuthan nak thar ahcun "Roman asilole Latin daan hmang tu Biakinn pawl ah 1962 kum ih daan thawn Missa raithawinak tuah asile Missa raithawinak tuah lai siar mi Bibile pawl cu cu tawk hmun sung hmang dingah Bishop pawl pawlkom in an lungkim mi tong asilole Missa raithawinak ih mipi pawl theih mi tong thawn siar ding. (Hminsin ding, ziangruangah hitin siar ding ti asile 1962 daan ah siar mi Bible pawl Latin tong thawn lawng siar dingah an sim. Latin tong thawn siar ding asile a tui san ah Missa raithawinak a tuah tu Puithiam pawl hman n azaten an thei thiam lo. Mai theih thiam lomi tong thawn ca sair ih Missa raithawinak tuah nak cu zo hman in thlarau thazang an ngah lo.

          Himi daan hman khuan asile cativek daan thawn Missa raithawinak a tuah tu ding Puithiam hnen tuan vo pe dingah a tul. Cumi Puithiam khal daan pawl hman zet in tuah ding siloin mipi pawl ih thlarau thanso nak pawl hrang khal ah tuan vo an lak sak a tul. Cumi tuah daan thawn Missa raithawinak ngah in an thlarau ziang tluk in a thangso, that nak a nei timi khal zoh ding. Cuti asilole midang thawn bang aw lo dingin Pawlkom thar pakhat cu dang aw dingah din asilo ding.

          A palit nak thuthan mi cu (2021, July 16) hnu Siangbawi can nak a ngah tu apwl in 1962 kum ih daan thawn Missa raithawinak tuah an duh asile Bishop hnen lungkim nak dil ding. Cumi ihsin Pope zung in cui thu thawn pehpar aw in tuanvo nei tu hnen thurelkhawm in on ding maw on lo ding thu simsal ding a si. A panga nak cu 1962 daan thawn Missa raithawinak a tuah tu Siangbawi cu cumi daan thawn Missa raithawi nak tuah peh thei dingah Diocese Bishop hnen dil ding.

          Thuthan mi 6 ah cun himi daan thawn Missa raithawinak tuah thei nak, tuah theilo nak cu Nu Pawlpi ih biakkhawm nak, Saramentu thawn pehpar mi upadi pawl a tuah tu pawlkom, Pathian hnautan tu pawlkom pawl thawn pehpar mi pawlkom le pekawk nak nunram ih a nung tu Khristian mi menmen pawlkompawl thawn pehpar mi zung pawl thawn kom in thu pot cat ding a si. Himi thuthang cu The Catholic Telegraph ihsin kan don mi a si.

https://bit.ly/3iiyc8h