Minung pawl ih thinlung hip in a thleng thei mi duhdawtnak lawng in nei tiah Pope in sim October 28, 2021

Minung pawl ih thinlung hip in a thleng thei mi duhdawtnak lawng in nei tiah Pope in sim

October 28, 2021

         Rundamnak le zumnak ih thupitnak cu Pathian ih thihnak le thawhsalnak a si tiin St. Paul in Galati khua mipi pawl le kan mah pawl ralrinnak in pek thu Pope Francis in tlawngkai nithum ni mipi pawl thawn an tonawk ah a rak sim.Tui sanah khuasa in a dik mi Pathian hnakin Pawlpi ih himnak a hawl rero tu tampi an um lai. Cu pawl cun Pathian ih duhdawtnak cu an mai nunram thawn cohlan ding ai ah daan pawl le thukham pawl an ruat thu Pope in ralrinnak a rak pek.

         Curuangah St. Paul in Galati khua mipi pawl hnenah Thinglamtah parih thah a tuar mi Bawi Jesuh ah, nunnak in petu Bawi Jesuh hnenah a thupi mi thil pawl pek in feh dingah a rak dil. Pope in Pathian thawn pehtlaihnak a nei mi kan thlarau lam nunram hri a cat ding tiih a ruat tikah Bawipai Thi le Sa upatnak tel in Thinglamtah parih thlai mi Bawi Jesuih kehram ah mah le mah ap aw dingah in forhfial.

         Cu mi in a dang kekar pakhat hnenah in hruai. ‘Thinglamtah parih thah a tuar tu Jesuh Khrih kan hmuh tikah Bawi Jesuh in kan thinlung in thleng ter ih Bible Cathianghlim ah caantha a ngah tu mi malte lawng si lo in mitin hrangah a tumtah thu theithiam dingah a si tiin a rak sim. Curuangah Pope in ‘milai pawlkom ih nunram cu a thar ter sal’ tiah sim in ‘Thiang Thlarau thawngin Khristian pawl ah kan nunram cu a thar ah a cang ih Thiang Thlarau thawngin Khrih lawng ti mi kan nunram a thar in a langsar ter ih kan thlarau lam raldonak ah tel ringring thei dingin thazaang in pek’ tiah a rak sim.

         Hi mi ah St. Paul in ‘minung ih ziaza’ le ‘thlarau ih rah’ karlak ih danglamnak a simfiang. Pope Francis in ‘minung ih ziaza’ pawl cu Pathian ih Thiang Thlarau a dodal tu ziaza pawl a si. St. Paul in minung ih ziaza cu a mah ten a siat thu, tumtah lo in, mah le mah, Thiang Thlarau Pathian lut dingah saangka khar in mai duhnak thlun in tuah mi ih dinhmun sim duh san a si ih Thlarau in nunnak a pek lai ah leitlun thilri pawl a hlun ih a hloral’ thu ralrinnak a rak pek.

         Thiang Thlarau ih rah pawl hnen tumtah mi zumtu Khristian pawl cu mai Baptism rak lak lai ih ngah mi kawhnak vek in nung dingih sawm nak a ngah tu pawl kan si. Cu mi cu Thiang Thlarau ih a rah pawl a si mi ‘duhdawtnak, lungawinak, remdaihnak, thinsaunak, lainatnak, thatnak, rinumnak, tangdornak, mah le mah uk awk nak’ pawl nei thei dingah lam in hruai.

         Pope Francis in Khristian pawl hnenah St. Paul ih cakuat siar in a rak sawm ih mai ziaza ah cu mi rah pawl a um le um lo ruat dingin a rak sawm.Pope Francis in dungthluntu pawl ih thuzirhnak cu kan mai nunphung pawlkom hrangah hniksaknak pakhat a si thu a rak simfiang. ‘Bawi Jesuh ah zumnak ih mawinak cu a tam zet mi thukham pawl ih hramthawhnak a si lo le remdaihnak le aipuang in teette khaan nak ih ngah mi duhdawtnak ih rah pawl a hngilh ter thei tu pawl sungin a ra suak mi ziaza lam thawn pehpar mi langnak ah hram a bun ih kaih a theih lo thu a rak sim.

         ‘Thinlung thlengnak a thokih thlarau ih thluasuah ngah dingah a donkham ter tu bureaucracy in Thiang Thlarau Pathian ih nunram a thih ter thei lo thu Pope in a rak sim. Curuangah Pope Francis in ‘Thinglamtah parah thah tuar in a thosal mi Bawi Jesuih thuhla than dingah tuanvo tumpi kan nei. Duhdawtnak cu thlarau ih uknak thawn pumcawm awknak a si. Ziangah tile minung pawl ih thinlung a hip ih a thleng ter thei tu cu duhdawtnak pakhat lawngin a neih ruangah a si tiin a rak sim.

         Hi thuthang cu RVA thuthang ih kan ngah mi a si.

https://bit.ly/3pZqqWj