Mithmai pan nak in nat nak nei pakhat ih nikhat sungruahsannak  pek thei. November 5, 2021

Mithmai pan nak in nat nak nei pakhat ih nikhat sungruahsannak  pek thei. November 5, 2021

              Pope Francis cu kan dung November 5 tlawngkai ni nga zinglamah Rome khuapi Gemelli Catholic phunsangtlawngah a feh ih, tlawngpi ih Bawi Jesuh thinlung hnen ap mi siivai le mikhuainak zung din nak kum 60 kim caanserh Missa raithawinak ah a tel. Siizung le siizung uk tu hnen Fr.Agostino Gemelli hnen hngilh lonak a pek ih cumi ih tumtah mi vekin a tuah taktak. Cui siizung cu Italy ih harhdamnak kilkhawi tu pawl tampi a suah ter ih a tha mi siizung pakhat khal a si.

              Pope cu a thuthangtha kha siizungih hmin asimi Bawi Jesuh thinlung upatnak thawn pehpar in thu a sim. "Bawi Jesuh thinlung upatnak a hmaisabik tlawngkai ninga asi ruangah thu 3 ka lo sim duh. Cui thu 3 cu ruatin man nak, natnak, hnem nak pawl a si.

1. Ruat ih man nak

              "Ruat ih mannak timi cu thinlung thawn dunglam zoh sal nak phunkhat a si. Bawi Jesuh ih thinlungin zangfah nakih langter mi pakhat asiih Pathian ih duhdawt nak pek mi thluasuah pawl cu mang dingah in ko. A tu leilungpi ah thinkung pawl um nak nei lo in an um. A tui dinhmun cu Pathian ih zangfahnak hmuh a tul. Thinlung thawn malte hngak aw. Man mi a um lole a hrampi khal a um lo. A hram a um lo ahcun a thang ding a ol lo. Curuangah duhdawtnak in pe tu, in ngaihsak tu, in khaisang tu pawl von mang uh" tiin Pope in a sim.

              Pehbet in cui siizung ah Pope a mah rori tuamhlawm asi laiah a tuamhlawm tu tinkim khal a dang ten a lungawi thu a sim. Leilungpi ton rero mi hivek caan ah thinbang bik caan von man  a si. Hivek ih von mannak cu mah le mah riah siat ter nak siloin thilcang pawl karlak ah hril ding mi pawl thaten tuah thei ding lawng a si.

              Mai nunram, mai thinlung a tong tu thil pakhat khat siseh, mi pakhat khat khal siseh kan von mang. Bawi Jesuh ih thinlung in a hlan ih nat nak pawl a dam ter. Ziangkhal va siseh la Pathian in in duh timi hngilh a ngah lo. Curuangah a cem zo mi caan man nak nei aw tiin Pope in sawm in thazang a pek.

2. Nat nak

              "Bawi Jesuh thianghlim thinlung cu a nem mi upatnak pakhat lawng men a silo. A nasa zet mi nat nak pawl a lang ter tu Pathian thulam ih tuah daan pakhat asi. Duhdawt nak ruangah nat nak a tuar ih thinglamta par ah khuai theh tiang in a lang ter mi nat nak thinlung pakhat a si. Minung parih a ret mi lungnemnak, duhdawt thiam nak, natnak thinlung in hmuh. Pathian ih thinlung cu minung pawl hrangah a tleu. Pathian duh taktak asile minung pawl hrang khalah tuar thiam ding. Ahleicein natnak tuar pawl hrangah tuar pi ding. Hriamhma le nat tuar tu pawl rian tikah kei khal hnem mi vekin lungawi nak ka nei. Natnak a ummi thinlung cu a famkim. Tampi tong dign a tul lo" tiin Pope in a sim bet.

3. Hnem nak

              "A pathumnak ahcun hnemnak a si. Hnemnak cu minung pawl hnen ihsin a ra mi thazang pakhat asilo. Minung pawl hnenih umtu Pathian hnen ihsin a ra mi thazang pakhat a si. Pathian thinlung duhdawtnakin harsatnak pawl karlakah hnem nak le thazang pawl a pe. Pulhnat a thlen caan ah kan ti thei lo mi pawl kan thei deuhdeuh. Ziangtin a suak mi pulhnat ruangah leitlun siivai lam hman lamzin a hlo vek tluk ah a cang. Dam ter dingah zuamnak khal tampi tuah a si. Minung pawl khal an thinlung a cau thei. Curuangah hnem nak, thazang pek nak an tul. Pathian ih thinlung cang daan tinkim in hnemnak in pe. Na nat nak hnak in Pathian ih duhdawt nak a tam sawn. Pathian cu nan hrangah hnemnak a pe tu pakhat asi" tiin Pope in thazang pek nak thu a sim. Himi thuthang cu Vatican thuthang ihsin kan don mi a si.

Photo courtesy of CBC

https://bit.ly/3ofzweS