Nunnak cem tu Pope Benedict XVI ih thuanthu tawi.

nunnak_cem_tu_pope_ih_thuanthu_tawi.

Nunnak cem tu Pope Benedict XVI ih thuanthu tawi.

December 31, 2022

          2022, December 31 zarhte ni kum 98 ah a nunnak a cem thu than hnu Vatican thuthang zung in Pope Benedict XVI ih a lang hleice mi pawl an khawm sal. Cardinal Joseph Ratzinger, Pope Benedict XVI cu Germany ram, Passau Parish ih Marktl am Inn hmun ah 1927, April 16 ah a rak suak ih a suah ni rori ah Baptism a ngah cih.

          A pa cu police upa asiih a pai hnam cu sumdawng nak lam ah tawk fang nei tu Bavaria a niam nak lam ih lo hnatuan innsang in a si. A nu cu lake Chiem kiang Rimsting hmun ih kuthiam nak lam innsang mi a si. Amah cu innsang a dinhlan ah hotel pawl ah rawl suang tiin hna a tuan. Joseph Ratzinger a nauhak lai ah Puithiam si a rak duh ih palik upa a pa khal in a tumtah nak ah a rak bawm. Joseph Ratzinger in u George le u nu Maria tei a nei ih an unau khat le khat duhdawt aw zet in an um.

          Joseph Razinger cu anauhak lai ihsin kum hra luan a si tiang Salzbury khuapi ihsin 30km a hlat nak Germary le Australia ramri ih Traunstein khua ah a thang lian. Ramri khuate ih um phah in Joseph cu Christian zumnak hrampi, Germary Bavaria nunphung thu le thanso nak a hrampi thu pawl a rak cohlang ih awnmawi mifim Moze ih tum mi a duh zet ruangah amah le mah “Mozartian” tiin a ko aw.

          Joseph cu ano lai olten a rak hmang lo. Germany ram sung Catholic pawlpi parah a do tu Nazi cozah a um tikah a tuar mi harsat nak pawl cu a nauhak lai ah ramri khua ih angah mi Catholic zumnak le fimthiamnak thawn a pah suak. Missa raithawinak thawh hlan ah parish Puithiam hnen Nazi thenkhat in an vuak mi pawl khal mino te Joseph in a rak hmu dah.

          Cuvek thubuai caan ah Joseph cu Khrist parah hram bun in Catholic zumnak ih mawinak le thu  hman a rak hmu. Joseph ih innsang khal Catholic zumnak fek tu pawl an siih ruahsannak, thu tha pawl zum tu Catholic nupa pawl parah a Catholic zumnak a hram a bun.1944 ah kumhra luan fang Joseph cu veihnihnak leitlun ralpi lakah thi thawn khawm awk nak ralkap pawl ih ralkap thar tiin hman a tuar. Joseph ih kutzung tha a that lo ruangah amah thawn hnatuan tu ralkap paw in an hruai loih veihnihnak leitlun ralpi ah raldo nak ah a tel lo.

Puithiam ordination ngah tu Fr.Joseph

          1946 ihsin 1951 sung Joseph cu Philosophy le Theology fimthiamnak cu Freising khuapi ih Higher School of Philosophy and Theology tlawng ah a zir vekin Munich college khal ah a zir. 1951, June 29 ah Joseph Razinger cu a u George thawn Puithiam oridination an ngah. Kumkhat a rei ah Higher School of Freising tlawng ah ca zirh tu a si.

          1953 ah “People and House of God in St.Augustine’s Doctrine of the Church hmin nei mi zingzoi nak capi thawn Theology ah buaih a ngah. Kumli a rei 1957 ah Fr. Razinger cu milar fundamental Theology mifim Gottlieb Sohngen ih lamhmuh ih zirh nak a ngah ih The Theology of History in St. Bonavantuar” capi thawn phunsangtlawng ah ca zir thie nak a ngah.

          Freising khuapi ih Higher School of Philosophy and Theology tlawngah Dogmatic and fundamental theology a zir hnu 1959 ihsin 1963 sung Bonn khuapi university, 1963 ihsin 1966 sung Munster khuapi ah university le 1966 ihsin 1969 sung Tubingen university a phunphun pawl ah ca a zir. 1969 ah Regensbury university ah university ih a pahnihnak upa tiin tuanvo a lak vekin Dogmatics and History of Dogma zungah hotu tiin hna a rak tuan.

          1962 ihsin 1965 sung Fr. Razinger cu Vatican ih tuah mi aveihnihnak Vatican council ah cologne diocese ih Archbishop, Cardinal Joseph Frings cu Theology ruahnak pe tu tiin riantuan phah in Vatican thurelkhawmnak ah a tel ih Vatican thiamnal pakhat tiin a bawm. Fr. Razinger cu zingzoi tu thiam zet asi ruangah German Catholic Bishop pawl pawlkom le ramtin theology commission pawl ah a thupi mi tuanvo pawl cohlang in rian a tuan. 1972 ah Hans Urs Van Balthasar, Henri de Lubac le a dang theology mifim pawl thawn communion hmin nei theology Journee ngan in a rak suah.

Tuukhal Bishop le Cardinal

          1977, March 25 ah Pope Paul VI in Fr. Razinger hnen Munich and Rreising Parish ih Archbishop tiin a rak khaisang. Cui kum March 28 ah Bishop sinak angah. Fr. Razinger cu kum 80 sung Bavaria Archdiocese ah Bishop sinak nah tu a hmaisabik Diocesan Puithiam pakhat khal a si. Bishop tiin tuukhal rian a tuan nak thulu cu “Cooperators of the Truth” – Cooperatores Veritis (thudik hrang tuan khawm tu pawl) timi a hril. Cutiih thulu a hril nak parah Bishop Razinger in a rak sim fiang.

          “Khatlam ah cun university ah cazirh tu tiin rian ka tuan nak le Bishop hnatuan thar karlak pehtlaih nak cu ka von mang. University saya le Bishop karlak riantuan daan a bang aw lo nan thu hman hawl nak le thudik hrang riantuan nak timi thu cu a bang aw lai thotho. Himi thulu ka hril san nak cu tui san ah thudik timi thulu cumi pawl hrangah theih thaim dingah a cang thei lo. tluk in a cang mi thil tiin sim mi khal hmuh a si. Asinan thuhman timi a hloh asile ziang tinkim khal a hlo ve ding tiin ka zum ruangah himi thulu ka hril nak a si” tiin a sim.

          Bishop Razinger tiin Bishop ordination a ngah hnu reilote ah Pope Paul VI in 1977 June 27 ni Cardinal pawl thurelkhawmnak consistory hrang Archbishop Razinger cu “Santa Maria Consolatrite al Tiburtino” Puithiam buaih thawn Cardinal a si thu a than. Pope Paul VI a nunnak a cem hnu 1978, August 25 le 26 ah Pope thar hril nak caanserh conclave ah Cardinal tiin a tel. Hril asi mi Pope Jhon Pul (I) cu Cardinal Razinger hnen Equador ram Guayaquil hmun ah September 16 ihisn 24 sung tuah mi aveithumnak Mario Logical congress ah Pope ih ahleice aiawhtu tiin a rak thlah. September 28 ah Pope Jhon Paul (I) a nunnka a cem ih October ih tuah mi Pope hril nak ah Cardinal Razinger a tel ih Pope John Paul (II) nak an hril.

          1980 ah “san thar leitlun ih Christian innsang pawl ih thuhla hmin in tuah mi avei nga nak Bishop pawl thurelkhawmnak “5th oridinary General assembly of the synod of Bishops) ah Cardinal Razinger cu Pope aiawh tiin thlah asi vekin 1983 ah “tuisan pawlpi ih mission ah remdaihnak le sual cawhkuan nak” hmin thawn tuah mi (Sixth ordinary general assembly) ah Pope aiawh tiin thu relkhawmnak ah thlah a si.

Pawlpi zung ih upa prefect

          1981, November 25 ah Pope John Paul (II) cu Cardinal Razinger ih zumnak lam zung ih upa “prefect of the congregation for the doctrine of the faith” tiin a khaisang ih Bible thawn pehpar mi Pope ih commission zung pawlkom ih president, ramtin theology commission president tiin a khaisang thu a than.1982, February 15 ah Cardinal Razinger cu Munich and Freising Diocese ih tuukhal hnatuan tuanvo pawl ihsin a suak. 1993 April 5 ah Pope in Cardinal Razinger cu order of Bishops ah Suburbicarian see of Velletri – Segni tiin a khaisang.

          1986 ah Cardinal Razinger cu Catholic Pawlpi ih zirh mi thaten ngan tha dingah ramthat nak commission pawlkom ih president tiin tuanvo anpe ih kum ruk a rei hnu 1992 ah Cardinal Razinger cu Pope John Paul (II) hnen New Catechism zirhnak thar an pholang ter thei.1998 November 6 ah order of Bishops ih Cardinal pawl ih thusuah mi thawn Pope cu Cardinal Razinger hnen Catholic Cardinal pawl pawlkom ih vice president tiin a khaisang. 2022 November 30 ah Pope John Paul II in amah cu Cardinal pawl pawlkom ih president (vice dean of the college of Cardinals tiin an hril nak parh nemhnget in an khaisang ih Suburbicarian see of ostia sinak a pek.

          1999, January 3 ah AD 12 ah Germany ram, Paderborn Diocese dinnak hminsinnak puai hrang Cardinal Razinger cu Pope ih ahleice aiawh tu tiin a thah. Rome uk awk nak Kuria pawkom ah Cardinal Razinger cu council of the secretariat of state for Relatians with States the congregations for the oriental churches, Divine Worship and the Discipline of the Sacraments, Bishops, the Evangelization of Peoples, Catholic Education, Clergy and the Causes of the Saints; the Pontifical Councils for Promoting Christian Unity and Culture; the Supreme Tribunal of the Apostolic Signatura, and of the Pontifical Commissions for Latin America, “Ecclesia Dei”, the Authentic Interpretation of the Code of Canon Law le the Revision of the Code of Canons of Oriental Churches pawl ah pawlkom sungtel tiin a tel. 2020 November 13 ihsin thokin Cardinal Razinger cu Pope ih science Academic ah mifim Honorary Academic of the Pontifical Academy of Science tiin khaisang a si.

Calam fimthiamnak

          Cardinal Razinger cu cauk tampi ngan in a suah ih cui cauk pawl ih hminthang ca thenkhat sim asile introduction to Christionity – Christian biaknak cauk, 1968 ah suah mi zumnak thu (Apostolic Creed) lam university ih zirh mi komkhawm mi le 1973 ih suah mi Dogma and Preaching pawl an si. Bavaria Catholic Academy tlawng ih siar mi “ziangruangah Catholic pawlpi ah ka um bet lai” (Why I am still in the Church) timi ca cu a lar zet ih cui ca ah “Catholic Pawlpi sung ah um lawngah Christian si a theih, Pawlpi leng ah Christian si a theih lo” tiin fiangfai ten a sim.

          Razinger cu kum reipi ca ngan in ca a suah ih mifim tampi pawl, ahleice in theology fimnak thuk zet ih a zingzoi tu pawl in ca a ngan mi pawl an hmang. 1985 ah Razinger ih ca the Ratzinger Report hmin nei mi ca le 1996 ah khua vel ci (salt of the Earth) hmin nei mi ca a suah ih cui ca pawl ah Christian zumnak thawn pehpar in thusuh awk nak interview tuah daan vekin ngan in a suah.

          Cardinal Razinger cu a kum 70 kim suahni ah At the School of Truth hmin nei mi ca a suah ih cumi ah amai nuntu sia thawn suah mi pawl parah a zoh pi tu ca ngan saya pawl ih ca pawl a kom khawm. Amah cu pargu buaih tampi a ngah. 1984 ah America ram, Minnesota ramthen, college of St.Thomas college, 1986 ah Peru ram Lima Catholic university , 1983 ah Germany ram Eichstatt Catholic phunsangtlawng, 1988 ah Poland ram Lublin Catholic university, 1988 ah Spain ram, Pamplona khuapi ih Navarre university, 1999 ah Rome ih Lumsa (bibera Universita Maria Santissima Assunta) university, 2000 ah Poland ram, Wroclaw phunsangtlawng, Theology zung cuvek university a phunphun ih buaih pawl  a ngah.

          Pope

          2005 April 19 ah Cardinal Joseph Razinger cu Catholic pawlpi ih 265 nak Pope tiin hril asiih Benedict hmin a lak vekin Pope Benedict XVI tiin hmin a nei. 1730 hnu ih hril mi Pope ah kum upabik asivekin 1724 hnu ah caan rei bik Cardinal tuanvo in rian tuan in Pope cang tu khal a si. 2013, February11 ah Mithainghlim khaisang nak hrang Cardinal pawl komkhawm in mee pe dingah tonkhawm awk nak (ordinary public consistory for the vote on several causes for canonization) caansung St.Peter ih tuanvo ihisn suak dignah thu a bot cat thu Pope Benedict in a than.

          “Pathian hmai ah ka thinlung vei tampi ka check hnu ah ka kum a upat zo ruangah ka thazang cu St.Peter ih rian taun nak famkim ten tuan vet dingah a cang thiam lo thu ka thei fiang. Thlrau lam daan vekin a thupi zet mi St. Peter ih rian ka tuan nak ah tongkam, thinlung lawng siloin thlacamnak le harsat tuar nak pawl a tel thu thaten ka thei. Asinan thleng aw mi a tam tuk lawng siloin zumnakthawn pehpar in a thuk zet mi thusuhnak pawl thawn khal thilcang tampi a um mi tuisan leilungpi ah St. Peter ih lungpi hoha dingah le Gospel thuthangtha than dingah thinlung thazang, taksa lam thazang khal a tul ih a liam zo mi thla sung ah ka hnen ih in ap mi St.Peter ih rian famkim ten tuan suak dingah ka thazang a mal. Himi thu ruangah himi hnatuan ih a thuk nak thaten ka thei ih keimah cu zalennak famkim thawn St.peter ih sinak cohlang tu, Rome ih Bishop rian ka thlah phoih thu ka than” tiin a sim.

          2013 February 28 ah Pope Benedict XVI uknak caan a cem. Pope Benedict XVI cu a rian tuan nak ihsin a colh hnu a nunnak a cem tiang Vatican ih Pawlpi ih Nu hmin nei mi Puithiam tlawng (master Ecclesiae Monastery) ah a um. Himi thu cu Vatican thuthang ihsin kan don mi a si.

https://bit.ly/3vwsK8J

Add new comment

6 + 6 =