Pakistan ram Multan ah Pope in Bishop thar a ret.

pope_in_pakistan_ram_mutonah_bishop_thar_ret.

Pakistan ram Multan ah Pope in Bishop thar a ret.

December 10, 2022

            Pope Francis in fr.Yousaf Sohan cu Pakistan ih Multan ah Bishop tiin a khai sang timi cu December 9 ah Vatican zung in an than. Bishop tiih hril mi kum 64 asimi Sohan cu Multan diocese ah tui tiang Puithiam a tuan ih The Most Holy Redeemer ih Cathedral ah Parish Puithiam a si. Pakistan ih Catholic pawl in a din hmun thar ruangah sunloih nak an pe. Pathian ih zangfahnak le ngaihsak nak thawn lam lo hruai hram seh.

            Fr. Sohan cu cui diocese ah vicar general khal a si. Amah cu Multan diocese ah 1958 September 2 ah a rak suak. Lahore ih St.Mary Minor Seminary ah tlawng a kaih ih karchi ih Christ The King major seminary ah Philosophy le Theology a zir. 1985 July 3 ah Ordination a ngah. Ordination a ngah hnu 1985-1986 tiang Multan ih Most Holy Redeemer ih Cathedral ah bawm tu Puithiam tiin rian a tuan ih Mion Chanu ih Holy Eucharist ah Parish Puithiam tiinl e 1986-1989 tiang La Salle tlawng ah hotu tiin rian a tuan ih 1990-1991 tiang Khanewal ih St.Joseph The Worker ah Parish Puithiam a tuan.

            1991-1992 ah Rome ih Pontifical Urban Phunsangtlawng ah biblical theology a rak zir. 1992-2000 ah Vehari ih St.Peter ah Parish Puithiam tiin zungah hna  a tuan ih 2001-2002 ah Fatehpur ih St.Joseph ah Parish Puithiam a tuan. 2002 ihsin vicar general a tuan. 2002-2011 tiang Khanewal ih St.Joseph The Worker, 2011-2014 tiang Multan ih Our Lady of Loreto, 2014-2016 tiang Multan ih Most Holy Redeemer ih Cathedral le 2016-2018 tiang Rahim Yar Khan ih Holy Cross pawl ah parish Puithiam a tuan.

            Cui hlei ah Diocese ah pumcawm nak ih hotu tiin, mino pawl hrang lamhmuh tu, diocese caritas ih director, Catechesis le Biblical commissions pawl ah director le thudik remdaihnak commission pawl le National Marian committee sual tel tiin rian pawl a rak tuan. 2018 ihsin thok in Most Holy Redeermer Cathedral ah Parish Puithiam tiin le Multan ih St.Joseph Minor seminary ah saya a rak tuan. 2019 lai Vatian ih an sim nak vekin Diocese ah Parish 18 a um ih Catholic mipum 3,000,500 an um. Diocese cu 1936, December 17 ah an rak din. Cumicu Punjab ram ih thlanglam le Pakistan ram lai hrawng ah a um.

            Pakistan ah Archdiocese cu Karachi le Lahore tiin pahnih an then ih, Faisalabad, Hyderabad, Islamabad-Rawalpindile Multan tiin Diocese 4 le Apostolic Vicariate (Quetta) pawl a um. A ram ah mi pum 220 M an um ih Christian mi malte an tel. Census in 2017 ih cazin an lak nak vekin Pakistan ah Christian cu a pathumnak a tambik an siih zatek 1.27 an um. Himi thuthang cu RVA thuthang ihsin kan don mi a si.

https://bit.ly/3uXei9H

Add new comment

6 + 4 =