Pathian hmuh timi cu duhdawt nak hmuh a si tiin Pope Francis in sim. January 17, 2021

pope_francis_in_pathian_hmu_timi_cu_duhdawtnak_hmu_a_si_tin_sim.

Pathian hmuh timi cu duhdawt nak hmuh a si tiin Pope Francis in sim.

January 17, 2021

            Zarhpi ni Angelus thlacam nak ah Pope Francis cu cui ni ih Bible siarnak ah zum tu pawl hnen Pathian ih kawh nak aw cohlang in duhdawt nak thawn lehrul ding ah a forhfial. Zarhpi ni zum tu pawl ton awknak Vatican's Apostolic Library ah Pope cu Bawi Jesuh baptism a san hnu a thaisun Jordan tiva ih thuhla fiangzet in a sim. "Pathian ih tufa zoh uh" timi tong sim phah in a dungthluntu pahnih kha Messiah hmuh in a sim tu cu Baptism a pe tu Johan a si thu a sim. Cui tong a thei tu dungthluntu pahnih khal Bawi Jesuh ih dung an thlun. Bawipa in a dung an thlun kha a theih tikah an hnen ah ziang nan hawl tiin a sut ih, Bawipa cu khui tawk ah a um tiin an sut tikah Bawi Jesuh in "Ra in nan zoh asile nan hmu ding" tiin a ti.

            Cutiih a sim nak cu kawh nak asilo, hmaiton ih tong aw thei dingih sawm nak a si thu Pope in a sim. A dungthluntu pawl cu cui ni cu Bawi Jesuh thawn an um. Bawi Jesuh thawn toin thusuh awk nak, cuihleiah Bawipa ih thu sim mi ngaiin Bawipa ih thusim an ngai caan ah an thinlung cu a hlan hnak in a tleu timi cu ruat dingah a ol lo. Cui caan cu zanlam caan a siih Pathian lawng ih a pek thei mi tleu nak cu an sungah a tleu timi cu an thei. An unau pawl um nak ih an kir tikah an thinlung sung ih an tuar mi lungawi nak cu tiva vekin khat zet in a luang. Anmah lak ah Andrew in a upa hnen "Peter" tiin Bawi Jesuh ih a ko ih "Simon" hnen "kannih cu Messiah kan hmu zo" tiin a sim.

            Amah thawn um tlang dingah kanmah in ko tu Bawi Jesuh, amah thawn tonawk nak cu reilote daiten kan ruat pei. Pathian cu zovek mi tinkim a kawh nak cu a duhdawt nak kha thok in lang ter ding ah a si. Pathian cu nunnak ah in ko. Zum nak um nak ah in ko. Nunram ah a dangten in ko. Kanmah pawl minung nunnak tiin a um ter tu nunnak um nakah kanmah pawl in ko. Cu mi cu a dang ten sersiam mi asilo ruangah a dang ten kawh nak a si. Cui hnuah Pathian cu zumnak um nakah kanmah pawl kawh nak in Pathian ih innsang in si ter.

            Netabikah Pathian cu kutsih nak, Puithiam nunram le Sister nunram ah kanmah pawl nunram a dang ten in ko. Cumi pawl cu duhdawt nak ih pungsan a simi kanmah pakhat ciar hrangah Pathian tumtah mi cu a phunphun in hmuh nak a si. Zumtu tinkim hrangah a sunglawi mi lungawi nak timi cu Pathian ih kawh nak kha lehrul in Pathian le kanmah ulenau pawl ih rian tuan nak in mahlemah hlan awk nak a si.      Pope cu thuthangtha sim nak ih a cemnak ah Pathian kawhnak vei tampi ah Pathian ih kawh nak kan thinlung ih lehrul nak cu el nak khal a si thei. Thenkhat caan pawl ah tih nak ruang khal ah a si thei. Pathian ih kawh nak cu duhdawt nak asi ruangah duhdawt nak thawn lawng san a tul. A thok nak lam ah Pathian thawn tonawk nak asilole a duhdawt nak cu kanmah pawl hnen lang ter mi Pa Pathian ih thu a sim tu Bawi Jesuh thawn tonawk nak khal a si thei. Cuihnuah a mah ten minung pawl hnen kan duh nak thu zem duh nak pawl lang in "duhdawt nak ka hmu zo. Nun nak ih san ka hmu zo. "Pathian ka hmu zo" tiin an sim theu. Netabikah Angelus thlacam nak cam nak cu a cem hlan ah Pope Francis cu Bawinu cu kanmah hnen Pathian duh nak kim in lungawi nak le tangdor nak thawn kawh nak aw cu lehrul in thangthat nak hla thawn lehrul thei dingah kanmah pawl in bawm hram seh tiin sim in Gospel thuthangtha cu a cem ter. Himi thu cu Vatican thuthang ihsin kanngah mi a si.

ဘာသာပြန် Sr. Lucy Lal Nai Ciang,SJA

https://bit.ly/2M9rNzM

Add new comment

1 + 13 =