Pope cu Argentina ram ih Catholic kawhhran mipi pawl ih "Bawinu kum" netabik hrang thu sim nak Decemter 8, 2020

Pope cu Argentina ram ih Catholic kawhhran mipi pawl ih "Bawinu kum" netabik hrang thu sim nak

Decemter 8, 2020

            Kan dung tlawngkai nihnih niah Argentina ram Catholic Diocese cu "Bawinu kum" netabik puai an tuah. Cui biakkhawm nakah Pope cu video in thuthang a kuat. Cui thuthagn sungah Pope in "a tuvekih harhdam nak lam thlun dingmi daan an kai hnget ruangah Bawinu puai pawl cu kumdang vekin ropi zet in tuah a ngah nawn lonan daan thawn kaih in tuah a si. Keikhal mah rori ka tel thei lonan kawhhran mipi pawl hnen thinlung thawn ka tel. Nan hrangih thla ka lo cam sak vekin nan nih khal ka hrangh thla in cam sak uh tiin thla cam sak tlang aw cio dingah zangfah a dil.

            Nu Mary cu "Nu a sivekin, dungthluntu khal a si". Pope cu Nu Mary ih si nak asim fiang. Nu Mary cu "Bawi Jesuh ih nu khal a siih, dungthluntu khal asi kha hngilh hlah uh. Nu Mary cu Bawi Jesuh ih nu a si. Bawi nu cu dungthlun tu pakhat khal a si. Amah cu Bawi Jesuh ih ahmaisabik dungthlun tu a si. Bawi Jesuh ih thu hmuahhmuah a thlun. Pope cu video ihsin thlacam nak a cem nak ah thluasuah pein Pathian ih nu khal a simi, Bawi Jesuh ih dungthluntu khal asimi Bawinu cu nitin kan nunnak ah lamzin in hmuh aw tiin thlacam in a cem ter. Argentina ram ih Bawinu kum tiin namhnget in tuah mi thuanthu, atuvekin Bawinu kum tiin namhnget in tuah mi daan cu tuah ding asile a liam zo mi kum 400 ih thuanthu cahmai kau ding a si. Argentina mi pakhat in rin lopi in Bawi nu zuk a hmu.

            Cui zuk cu lungto ah an ret. Cui hmun khal mipi thawn a nai aw lo. Zuk ih a zawng le a um daan khal cui hmun ih a um tu pawl ih taksa zawng a si. Cui thilcang hmuh a si thok ihsin Bawinu hnen upat pek nak kha a thar in a darh vivo. Cui zuk cu Virgen del Valle (Our lady of the Valley) horkuam bawinu tin hmin an pek. Cuihmun cu Catamarca tin kawh asiih, cui hmun a bawm tu Bawinu tiin an sunloih. Bawinu zuk hmuh nak kum 400 kim hngilh lo nak in Argentina Catholic Bishop pawlin a hlan kum 2019 December 8 ihsin 2020 December 8 ni tiang Argentina ram ih Catholic kawhhran mipi pawl hrangah Bawinu kum tiah an namhnget ih an rak than. 2020 kum cu Argentina ram hrangah thuanthu ih a tang ding mi kum pakhat a si. Ziangruangahtile Argentina ah Nu Catholic Pawlpi a thlen nak kum 500 kim kum khal a si. Bawinu zuk hmuh nak kum 400 kim kum sunloih nak in Argentina ah Bawinu zuk ret nak hmun 400 an tuah. Himi thuthang cu Vatican thuthang ihsin kanngah mi a si.

https://bit.ly/3ns9yn0