Pope cu tipi parih khual a tlawng tu pawl hnenah tha pek nak a nei. June 17, 2020

Pope cu tipi parih khual a tlawng tu pawl hnenah tha pek nak a nei.

June 17, 2020

          Pope Francis cu a liam zomi nithum niah tipi parih hna a tuan tu pawl hnenah video in thucahnak a nei. Cumi a thucah nak ah covid-19 pulh nat ruangah harsat a tong mi tipi par ih hnatuan tu pawl a mang thu a sim. Cumi ca sungah pulhnat ih that lo nak tam pi karlakah, minung pawl in le ei ding a remcang thei nak dingah  hnatuan pawl hnen tampi lungawinak a neih thu, hnatuan tu pawl ziang tlukin nan thu pit thu, ziangruangah tile mi zapi hrangih tul sam mi nan khah sil thei thu, Covid -19 pulhnat cu tipi thuanthum parih hnatuan tu pawl ih nun ram a thleng ter thei thu, harsa zetin mah le mah  pek awknak tampi an tuah thu, anmah pawl cu tinbaw, cet tanphawlong pawl par ih um nak, innsang, rualpi, khua le ram thawn hlapi ah um in, pulh nak ngah ding khal an tih thu, himi pawl cu anmah pawl hrangah phurrit a si. A tu ah tipi par hnatuan (150000 le 200000) hrawng cu tipi ih an um thu, UN ih hnatuan pawl ih an simnak in kan thei thei a si.

          Leitlun hnatuan pawlkom (ILO) ih an lang ternak vekin lockdown caan sungah a harhdam zetin tidai par hnatuan tu tampi cu tikap kiang tipi ah an um rero a si. Suak sal dingah a caan a kim nan tinbaw par ih an um ringring nak ruangah taksa, thinlung in harsat nak an tuar rero thu, ILO in a sim. A sim mi sungah harsatnak a tuar rero tu tipi par hnatuan pawl hnen khalah nanmah pawl cu mahte lawngih a um mi, rual pi nei lo mi nan si lo. Nanmah pawl cu hngilh mi khal nan si lo. Tipar hnatuan tu nan si ruangah nanmah pawl cu malte sung leilungpi thawn nan hlat aw mi a si sawn. Asinan nannih pawl cu keimah thawn nan thlarau a lo kilveng sak tu Siangbawi, Stella Maris ih hnatuan tu pawl ih ruah nak, thlacam nak ah nai zet in an um thu a sim. Jesuh ih a hmaisabik dungthluntu pawl cu ngakai tu an si ruangah mah le mah ngaisang aw ding in um uh tiah a sim.

          Pope in tipi thuanthum par hnatuan tu minung pakhat ciar hnenah tong kam thawn ruahsan nak, hnem nak, hahdam ten um thei dingah thla a cam sak. Cutivekin thlarau, taksa lam a kilkhawi sak rero tu pawl hrang khalah tha a pe ih, Pathian cu nan mah pakhat ciar, nan hnatuan nak, nan innsang ciar ah thluasuah lo pe hram seh. Cutivekin tipi thuanthum arsi asimi kan Nu Maria in nan zaten lo kil him seh ti khal in thla a cam sak. Stella Maris cu Catholic zangfah duhdawtnak hnatuannak ah tidai par hnatuan tu pawl hnen a bawm tu Pathian hnatuan nakih lawng pi a si. Cui hnatuan nak cu Scotland ram Glasgow ah kum zabi (20) ah din a si. Himi din nak ih tumtah mi cu leilungpi ihsin tipi thuanthum kap ih hnatuan tu pawlih thlarau kilkhawi dingah asi. Himi hnatuan nakah minung (216) an um ih, Longpi colhnak (301) a umih, ram (30) luan ah hna an tuan a si.

https://bit.ly/314vfRH