Pope Francis in Covid-19 natkhamnak-sii dawt cio dingah forhfialnak nei ( Aug 18, 2021)

         Pope Francis in North America le South America ram ih Bishop pawl ih aunak lungkimpi in Covid-19 nat khamnak sii dawt aw cio dingah forhfialnak a rak hlan ve a si. Ad Council pawl thawn video an suahmi sungih a thusimnak khal ah Pope Francis cun rintlak le hmual a nei ngaingai mi Covid-19 nat khamnak sii a hawlsuaktu pawl hmuahhmuah hnen ah upat sunloihnak a pek thu a sim.“Pathian zangfahnak ruangah le minung tampi ih teimak suahnak ruangah Covid-19 natnak ihsin humhual awknak ding hrangah siivai kan ngah thei zo ih lungawi za ngaingai a si” ti khal in tlawngkai nithum ni ih video an suahmi sungah Pope cun a sim. 

         Cuihleiah, ‘Hi natkhamnak-sii in pulhnak a hlo thlang ding timi ruahsannak in pe ko nan, khat le khat kan bomawk ih mi hmuahhmuah hnen a thlen thei ngaingai lawngah pulhnat khal a hlo thei ding a si’ ti’n a sim bet. Natkham-sii dawh hi duhdawtnak hnatuan pakhat a si “Tlunlam upa pawl ih thupeknak thawn nemhnget mi Covid-19 natkhamnak-sii dawhawk cu duhdawtnak hnatuan pakhat a si. Midang pawl khal cuti vek ih tuah ve dingih forhawk khal duhdawtnak hnatuan a si thotho. Cutiih kan tuah tikah, mahlemah siseh, maih innsang siseh, maih rualpi siseh, mi hmuahhmuah siseh, kan duhdawt timi kan langter a si. Duhdawtnak timi cu khat le khat kan pehtlaih awknak pakhat a si ih ramkhelnak pakhat khal a si” tiah Pope cun hi natkham-sii dawhawk ding thawn pehpar in a sim. Cuihleiah, “Himi natkham-sii dawhawknak hi ziang ciamco a si lo vek nan, khat le khat kan duhsak awknak le a hleice in mi tawntai pawl parih kan zawnruahnak lang ter tu thil thupi zet pakhat a si” ti’n khal a sim bet a si.

          Pope Francis ih video sungih thu a simnak ah thlanglam America le saklam America ram tampi ihsin Cardinal le Archbishop tampi in an telpi ve ih leitlun huap in himi Covid-19 natkhamnak-sii dawhawk thei cio ding ih an duhsaknak le Pope Francis ih forhfial mi an lungkim pi nak thu pawl an sim cio ve a si.

Source: Vaticannews (August 18,2021)

https://bit.ly/2Uu1hph