Pope Francis ih nazi cu lilan tuah in an rak zuar ih leitlunhuap ah a rak lar tiah sim

Pope Francis ih nazi cu lilan tuah in an rak zuar ih leitlunhuap ah a rak lar tiah sim.

Pope Francis in a hruk mi nazi cu a tul sam mi pawl bawm dingah tlawngkai nithum ah lilan tuah in a rak zuar ih cui nazi ih tacik hrangah hmaisabik leitlunhuap ah hminthang ah a rak cang tiah an sim.

          LaViolette tiih kawh mi scholarship foundation hrangah Pope Francis in a hruk mi Swatch Once Again tacik thawn tuah mi a nazi cu Nov 30 ah lilan tuah in a rak zuar. Cui nazi tacik ih zuarnak taktak ahcun $55 (Kawlram paisa in tingkhat luan) thawn lei a theih na in Pope Francis ih lilan tuah ih a zuarnak ahcun nazi man cu netabik ah ($56,250) in an rak zuar ih a hlan nazi man hnak in a let in a khung ih paisa tambik pe in ngah mi Swatch tacik thawn tuah mi nazi ah a rak cang.

          Wisconsin ramthen, Green Bay khuapi ih Bishop David Ricken in Brian LaViolette charity pawlkom thuhla le cui tlawng in nazi finkhawm duhtu kum (15) mi pakhat tidai a leuh ih rin lo pin a thihnak thu cu Pope hnenah ca pakhat thawn a rak kuat ih cui ca sungah Bishop Ricken in tlawngta pawl college kai dingah sumpai hrangah Pope ih man ol bik mi nazi pakhat hlu dingah a rak dil ih Pope in cui dilnak cu lungkim in a nazi cu lilan tuah ih a rak zuar ruangah hminthang zet mi Fred Savage, Joe Theismann, Terry Bradshaw, Condoleezza Rice le Randall Park pawl tla an rak tel ve.

          Pope Francis in lilan puai hrangah a thilri pawl a rak hlu mi hi hmaisabiknak a sin awn lo. A hlan ah khal Pope in hrilnak a ngahnak kumkhat kim hlan ah Harley- Davidson in Pope Francis cu mawtawcycle pakhat laksawng ah a rak pek ih Pope in lethmat a thut hnu ah $285,000 in a rak zuar ih hnatuan nei lo pawl hrangah a ngah mi paisa a rak hmang. 2017, November ah khal laksawng a ngah mi mawtaw cu lilan tuah in a rak zuar ih zaangfah lainatnak hnatuan hrangih a rak hman mi a si.

          Hi thuthang cu catholic news agency thuthang ih kan ngah mi a si.

https://bit.ly/3FiylUJ