Pope Francis in Rome ih farah harsa pawl thawn suncaw hil tlang. (November 16, 2022) 

Pope Francis in Rome ih farah harsa pawl thawn suncaw hil tlang

(November 16, 2022)  

          Pope Francis cu Rome ih farah harsa pawl thawn Pope Paul VI Hall ah suncaw an ei tlang. Pope Francis cu the sixth World Day of the Poor ‘leitlunhuap farah harsa pawl ni’ ih Mass raithawinak theh hnu ah Pope Paul VI Hall ah mipi (1300) hrawng thawn suncaw an rak heel tlang.

          Dicastery for Evangelization cu Caritas Italy le St. Egidio Community pawl ih bawmnak thawn sunglawi tak in suncaw an timtuah sak. Italy company ‘d’Amico Societa di Nabigazione’ in ei in a rak hlu. Italy ih um Catholic Charity pawlkom ih Caritas Italiana in Italy ah harsa zet ih um tu mipum taan 5.6 an um ih cu mi sungin taan 1.4 cu nauhak pawl an si tiah a sim.         

         Kumtin tuah theu mi suncaw ei tlangnak cu kum tih zarhpi menmen Zarh (33) nak Zarhpi ni ih tuah mi the World Day of the Poor pawlkom in an tuah theu. Hi leitlunhuap ni ah mipi thawn sumdawnnak tuahnak ah Christian pawl thazaang pe dingah le mai hmuhton rero mi harsatnak pawl thawn hmainor dingah Bawi Jesuh a mah rori ih in rak hmuh mi duhdawtnak, duhdawtnak ih hminsinnak pakhat vekih rian dingah a si.

          Cui ni thotho ah St. Peter’s Square ah harhdamnak lam ih tuamhlawm aw thei lo tu pawl hrangah harhdamnak kilhimnak siikhaan an rak din sak.Hi harhdamnak kilhimnak cu kumhnih sung leitlunhuap pulhnat a can hnu ah volunteer hrekkhat pawl le company hrekkhat pawl ih bawmnak thawn an rak din mi a si.

          St. Peter’s Square ih um Moble Clinic cun HIV, thinthling taksa aihre natnak, le damternak pawl tel in cekawknak le siivai pawl a tuah sak. A dang bawmnak ah farah harsa mi innsang 5,000 lenglo cu Rome khuapi ih um Parish pawl hnenah online ihsin ei in pawl an rak bawm.

          Italy ram ih um Elite Supermarket in pasta tan 10, fang ton 5, sangvut, cini, cite le coffee le site le cawhnawi liter 5,000 a rak hlu. Italy ih aamahkhaan pawlkom ‘UnipolSai Assicurazioni’ in kan dung thla rei lo te sungah sumpai man neih lo ruangah gas man le electric man pe thei lo tu pawl hrangah a rak pek sak.

          Hi thuthang cu RVA thuthang ih kan don mi a si.

https://bit.ly/3gauC34