Pope Francis in St.Joseph kum than December 8, 2020

Pope Francis in St.Joseph kum than

December 8, 2020

Pope Francis in St.Joseph kum than

December 8, 2020

            St.Joseph cu leitlun pi thawn pehpar mi Catholic kawhhran pi a bawm tu Mithianghlim tiin Pope Pius IX ih than mi kum 150 kim kum hminsin nak tiin December 8, 2020 ihsin December 8 2021 cu "St.Joseph kum" tiin a namhnget thu Pope in a than.

            Pope Francis cu covid-19 nat caan ah Patris Carde "pai thinlung" thawn ca pakhat a ngan. Cumicu mi menmen pawl cu an hmin a thang lonan thinsau nak le ruah san nak pawl nitin pek nak cu fiangfai zet in hmu thei dingah a bawm. Anmah pawl cu rundam nak thuanthu ah hminsin mi an si lonan nitin a thup ten a tel mi St.Joseph thawn an bang aw tiin a sim. Patris Carde ca thar ah St.Joseph cu duhdawt mi pa, a nunnem mi duhdawt nak nei tu pa, tuar thei nak a nei tu pa, cohlang thei tu pa, thil tuah thiam in raltha mi pa, hna a tuan mi pa, puan zar dung in a pe aw tu pa tiina  sunloih. Duhdawt nak nei in tuar thei nak a nei tu pa St.Joseph cu "amai inn ih a thanglain tu Messiah Pathian par ih ret mi duhdawt nak thawn pai nunram felfai zet in a lang ter" tiin Pope Francis in a ngan. "St.Joseph cu Bible hlun le Bible thar pawl karlak ih a um daan ruangah Pa pakhat tiin Khristian zumtu pawl in an sunloih" ringring.

            "Bawi Jesuh in St.Joseph hnenin Pathian ih a tha mi duhdawt nak cu a hmu. Cumicu kan thinlung tih nak pawl, sual nak ih nat nak pawl neih in mai tha mal nak pom dingah in bawm. Duhdawt nak lawng in do tu thang pawl ihsin in run ding. Ahleicein sual thlah nak saramentu thawn kanmah pawl cu Bawipa thudik le zangfah nak cu hmuh a si. Ziangruangahtile Pathian ih thudik in kanmah pawl sual nak ih mawh phur thei loin in hmuak ih in pom ih in ngaithiam ti kan thei.

            St.Joseph cu Pathian thu a ngai tu pa pakhat a si. Amah cu Nu Maria le Bawi Jesuh a kilkhawi ih Pathian ih duh nak tuah dingah a fapa a zirh. Pope St.John Paul (II) in "Joseph cu Bawi Jesuh ih rundam nak hnatuan ah tuan dingah Pathian ih a kawh ruangah a thuk zet mi rundam nak hnatuan a tuan tu asiih St.Joseph cu rundam nak hnatuan taktak a si" tiin a sunloih.

Pathian ih duh nak cohlang nak

            "Cutivek thotho in St.Joseph cu cohlang thiam tu pa a si. Ziangruangahtile amah cu Mary kha fate hman mawhphurh nak um loin a cohlang. Tuisan ahcun nunau pawl parah thinlung lam khal siseh, tong in khal siseh, a leng lam khal in siseh hmuh suam nak pawl tampi kan hmu thei. Asinan Mary ih innsang pa cu Pathian a rinsan ih a nunram ah amai theih thaim lomi thil khal pim in a mai ruah nak pawl hnong in a thuanthu a pom tu khal a si" tiin Pope Francis in a lawm. St.Joseph ih thlarau lam lamzin cu "simfiang nak asilo, pom nak a si". Asinan amah cu kutthlir in a sung pe a ti duh mi a si lo. A thianghlim mi thlarau Pathian hnen in tuar thei nak laksawng a ngah ih ruah san nak nei tu asiih a nunram khal do nak pawl, diriam lo nak pawl le beidong nak pawl thawn a khat nan a si daan vekin a cohlang thei tu a si.

            A ngaingai ah St.Joseph hnen ihsin Pathian cu kanmah pawl "tih hlah uh" tiin tuletu sim ringring vek a si. Ziangruangahtile zumnak cu lungawi nak siseh, riahsiat nak siseh, a cang mi tinkim khal san a nei ter ih Pathian cu lungto a tampi leipar ihsin pangpar a par ter nak cu in mang ter. St.Joseph cu a ol zawng hawl loin a cang mi thuhman kha felfai ten a hmu ih a mah rori in tuanto a la. Himi thu ruangah midang khal soisel ding umloin asi dan vekin pom dingah le thanau pawl a hleice in ngaihsak dingah kanmah pawl in forhfial. Thu a ruat thiam ih a ral tha mi pa, duhdawt nak ih zohthim tlak Patris Corde in St.Joseph ih tuahnak le a ralthat nak a hmuh. Pope in "Nazareth mi innsak thiam cu Pathian ih bom nak zumnak thawn harsat nak pakhat kha can tha pakhat tiin a thleng thei. A innsang khal siseh, leipar ih a dang innsang pawl khal siseh, ahleice in a vai ih hnatuan tu pawl ih an ton mi harsat nak pawl a bom" tiin a sim.

            Himi thu thawn St.Joseph cu ralbuai nak pawl, huat nak pawl, hmuh suam nak pawl le farah nak pawl ruangah mai ram ihsin a thlan tu zate pawl a bawm tu a si. Nu Mary le Bawi Jesuh hoha tu asiih St. Joseph lo kawhhran hoha tu cu mi dang asi thei lo. Catholic kawhhran cu Bawi Jesuh ih taksa asiih minung pawl ih Nu a si. Mi farah pawl ralrawng mi pawl, harsat nak tuar pawl, mi thi zik pawl le mi khual pawl, thawng tla pawl, mi dam lo pawl cu St.Joseph hnen in a pe aw tu nauhak pawl an si. "Kawhhran le mi farah pawl duh thiam dingah St.Joseph hnen in kan zir ding" tiin Pope Francis in a ngan.

Hnatuan ih man, sinak le lungawi nak in zirh tu pa

            "Innsang cawm in kilkhawi dingah felfai ten a cawm tu innsak thiam pakhat asimi St. Joseph cu mai hnatuan nak ih ngah mi tiin nitin rawl ei nak ih man, sinak le lungawi nak pawl khal kanmah pawl in zirh. St.Joseph ih himi a danglam mi sinak cu a thang so zomi ram tampi ah nasazt in nunphung buai nak asimi hnatuan thawn pehpar in zangfah dil thei dingah Pope a bawm. Pope in "sinak a nei mi hnatuan ih thupit nak cu hminsin in man ret dingah a tul hleice. Cumi hrangah cawn tlak mi bawm tu cu St.Joseph asi" tiin a ngan.

            Hnatuan timi cu rundam nak hnatuanah tel dingah lamzin asiih rampi din nak a rang ter tu caan tha a si. Kanmah pawl ih kan si nak pawl le thil ti thei nak pawl thang dingah le kan pawlkom le ulenau taktak thinlung thawn kom awk nak hrangah riantuan nak ah hmang dingah lamzin a si. Pope Francis in "hnatuan tu pawl cu Pathian amah thawn tuan asiih, tidaan pakhat khat thawn kan kiangkap sersiam tu pawl an si" tiin a sim fiang. Zohman hnon tuar loin a thar mi um daan rak keng nak ah hnatuan ih man, a thupit daan le tul mi hawl sal cio dinah mi pakhat ciar a forh fial.

            Ahleice in covid-19 pulh nat ruangah hnatuan nei lo pawl an tam vivo ih Pope in mitinkim mai thupit ter mi pawl ruat sal dingah le zovek mino khal zovek mi khal, zovek innsang khal hantaun nei lomi asilo a tul tiin a hnget mi ruah nak cu lang ter dingah a sawm. Puan zar dung ih Pa Polan cangan saya Jan Dobraczynski ih "The Shadow of the Father" cauk kha pehpar in Pope Francis in St.Joseph cu Bawi Jesuh ih "leitlun ih puan zar dung ih vancung thawn pehpar mi Pa a si" tiin a lang ter.

            Pa pawl cu hring tu ansilo, sersiam mi pawl an si. Mipa pakhat cu nauhak pakhat hnen kha leipar ih rak hruai nak lawng in pa an silo, cui nauhak cu cawm dingah tuanvo aneih hnu lawngah pa tiin a si thu, vansiat nak ah tuini minung pawlkom ah nauhak pawl cu "hngak tah pawl, pa a nei lomi nauhak pawl dinhmun" tule tu hmuh a si.

            Nauhak pawl tul mi cu anmah neh tuk lawng siloin mahlemah thupotcat thei nak nei dingah, zalen ten lungawi thei dingah lamzin thar hawl sal thei tu pa pawl lawng an si. Himi thu ruangah St.Joseph cu hmuah suam ih pehtlaih nak  umloin a felfai bikmi, a thianghlim bik mi pa pakhat tiin sim nak a si. Pope in "St.Joseph cu a dang lam mi zalen nak thawn ziangtin duh ding timi kha theih a si. Amah le mah ziang tin kim a laifang tiin a ret aw lo. Amah hrang ruat loin Nu Mary le Bawi Jesuh ih nunam lawng a ruat" tiin a lawm.

            Pope in hitivekin a ngan "St.Joseph hrangah lungawi nak cu mahlemah pek awk nak a si. Amah ah beidong nak timi hmuh a silo, zumnak lawng hmuh a si. Amah ih thinsau ih tuar nak cu a hnget mi zum nak ih a thoh nak a si. Curuangah thunei tu pawl siloin Pa pawl lawng a tul mi leilungpi ah thu neih nak thawn uk nak, hmuah suam nak, horhhrawl duh nak thinlung thawn zangfah ank hnatuan pawl tuan nak le siat suah thei tu thunei tu pawl cuvdk pawl a hnong tu kanmah pawl ih kiangkap ah St.Joseph cu zohthim tlak pakhat tiin a lang.

            A hman mi pa pawl cu fale pawl in mai hrangah nunpi ding ah an duh lo. Anmah pawl cu fale pawl zalen nak an thupit ter. Himi ruah nak ruangah pa pakhat cu a fa le pawl lawng rinsan loin a nunram ah mai rual pi si dingah a tul nawn lo ti a hmuh tikah a mah cu nun tu daan lamzirh tu pa pakhat asiih, patling asi thu a thei fiang. Pa pakhat sinak cu neih mi thawn pehpar aw loin, "van ih pa Pathian" cu a tum sawn mi pa a si thu a hmauh tu a si.

St.Joseph hnen nitin thlacam nak le sawm nak pakhat

            Pope cu French ram ih kum zabi 19 ih Jesuh le Mary Sister kaing ih thlacam nak cauk ih St.Joseph hnen thlacam nak cam a si nak cu kum 40 luan a si zo thu, himi thlacam nak cu amah hnen ben nak le zum nak a lang ter thu,ka duh dawt mi pa Pathian, Bawipa ka lo duhdawt. Bawipa cu Jesuh le Mary pawl hnen thluasuah tinkim kha in pe thei ruangah Bawipa nang ka lo rinsan nak cu a lak si ter hram hlah aw. Bawipa na that nak cu mangbangza lang nak vekin a tumthu cu in hmuh aw" tiin a cem nak thlacam nak pawl ruangah St.Joseph hrangah sawm nak pakhat a si timi cu hmuh a si thu a hlawm. Pope Francis in a cem nak ah St.Joseph hnen thlacam nak pakhat kha retbet in kan zaten hmun khat ten thlacam ding khal ah thazang a pe.

St.Joseph hnen thlacam nak

            Rundam tu Bawipa kilkhawi tu, thianghlim Maria ih innsang pa asimi, Aw....St.Joseph Bawipa cu pakhat lawng asimi fapa kha na hnen ah kan lo ap. Nu Mary cu nangmah kha a upat. Bawi Jesuh khal na kilkhawi nak tang ah minung si nak a lak. Mi tha asimi St.Joseph, kan par khalah pa pakhat vek in thluasuah in pe aw la nunnak lamzin ah in hruai aw. Pathian hnen thluasuah, zangfah nak le thazang ral that nak pawl lo dil in kanmah pawl harsat nak pawl ihsin in humhim hram aw. Amen. Himi thu cu Vatican thuthang ihsin kan ngah mi a si.   

Source: Vatican News

https://bit.ly/37VlVS6