Pope ih harhdamnak thawn pehpar in tuhrawng ih thuthang leng mi September 21, 2021.

Pope ih harhdamnak thawn pehpar in tuhrawng ih thuthang leng mi

September 21, 2021

            Pope cu kan dung September 12 ihsin 15 tiang Slovakia ah Tuukhal khual tlawn nak a nei. Cutiih a feh laiah ram thu nei tu pawl, pawlkom a phunphun ih thunei tu pawl, Khristian Kohhran pawl ih hotu pawl, Jew pawlkom pawl thawn an tong aw. Cutivekin Catholic Bishop pawl, Siangbawi pawl, Sister pawl, Pathian riantuan tu pawl thawn an tonawkih hleiah Pope ih Nupi pawl pawlkom asimi Slovakia ram ih Pathian riantuan tu Jesuit innsang thawn khal a dangten an tong aw.

            Cutivekin Jesuit innsang thawn an dang ten an tonawk caanah Pope in kan dung July thla ih a rilpi an khuai laiah mi thenkhat cun a thih ding an duh thu, ziang tluk in an duh asikhalle tui tiang a dam cak lai thu, thenkhat cu Pope ih harhdam nak dinhmun cu an ruah hnakin a siat thu pawl thuthang an than. Asinan amah cu harhdamnak a ngah rero ruangah Pathian hnen a lung a kim thu a harhdam nak thawn pehpar in a sim.

            A taksa an khuai nak thawn pehpar aw in Pope cu a harhdam sal nak ding a mal ruangah siseh, Pope ih nat nak cu nat sia asiih, dinhmun sia vivo ding lawng ruahnak in reiloteah a cawl ding tiin tulai ah thuthang a leng. Ziangruangahtile July 4 ih an khuai nak cu nazi 3 a rei. Slovakia ah Pope Francis Jesuit innsang thawn an tonawk nak thu pawl cu Jesuit pawlkom ih suah theu mi La Civilta Cattolica thuthang ih September 21 ih an suah mi ca ah an bet.

            Slovakia khalah mi thenkhat cu Pope Francis hnen "thu hman thawn a hla tu pawl" tiin a ti tu pawl an um vekin, thenkhat cun Pope Francis an zoh thim. Pope Francis in a par ih hmuh thiam lonak, ruahnak banglonak thawn  pehpar aw in tahthim nakih a sim mi cu Catholic thuthang simnak tiin hmin bun in, Catholic Pawlpi ih Pope a soisel rero tu pawl khal an um. Pope dinhmun in sual neilo, a thianghlim mi a silo ruangah soisel nak tuar a tul thu, asinan Kohhran cun cutiin a tuar lo ding.

            Hitiin Kohhran soiselnak cu "khuavang" ih hnatuan nak a si. Thenkhat Pathian hnatuan tu pawl khal Pope thawn pehpar aw in an ka ihsin a suak mi ti hman in zum thei lo ding khop in a sim tu pawl khal an um. Veikhat veihnih ah cun thin a sau lo zet. Ahleice in thuhla thaten zingzoi loin soisel nak pawl ton a si. Zianghman an ruat lo. An ruahnak lawng ah lut loin hrial a si. Ziangruangahtile tikcu a lak in cem ter duh a um lo. Pope dinhmun in asim duh mi pawl lawng caan a neih tawk in a sim duh. Mi thenkhat cun Pope kha thianhlim nak thu relloin nunphung pawl lawng a sim. Comminite mi pakhat asi tiin an soisel. Thianhlim nak thawn pehpar in Gaudete et exsultate capi a suah zo.

            Tunaiteah Latin Missa thawn pehpar aw in ruah nak a banglo mi a phunphun a suak. Asinan a tu ah a dai ih Pope Benedict 16 le St. John Paul II tei ih tumtah nak vekin a rem sal. Himi thuthang mi a suah ihsin thokin Latin daan hlun Vetus ordo (Traditional Latin Mass) thawn Missa raithawi duh asile Rome ah lungkim pi nak dil ding a si. Ziangruangahtile thenkhat Puithiam pawl ih ton mi cu Siangbawi can nak an lak thu thenkhat cu an Bishop pawl in Latin in Missa tuah dingah lam an hmuh thu pawl an pom. Dung kir sal vek a si. A hlan ih thurelkhawmnak pawl ah hi thu thawn pehpar aw in  leilungpi thawn a pehpar aw mi buainak asi lonan thenkhat ram pawl do nak a um. Dungtolh nak thinlung cu a tu Pawlpi sung ton mi pakhat a si.

            Veikhat ah Cardinal pakhat hnen Siangbawi pahnih an ra ih, Latian thawn Missa raithawi nak thaten tuah thei dingah Latin zir thei dingah an dil thu Pope hnen a sim dah. Cardinal in cui Siangbawi pahnih hnen "Kohhran sungah Spain daan tampi a um. Spain tong zir uh. Cutilawngah thuthangtha thaten nan sim thei ding. Spain nan thiam nal hnu ah ka hnen ah ra sal uh. Kohhran sung ah Vietnam daan khal tampi a um lai. Vietnam tong khal ka lo zir ter ding. Cui hnu ah Latin ka lo zir ter ding" tiin a si. Cardinal in cui Siangbawi pahnih hnen tangdor nak nei dingin Pope in a sim. Pope Francis in thlengnak a duh ih hmailam nor tuk nak a silo. Tuah a tul tiin a zum ih a tuah. Thin sau a tul. Thlacam nak khal a tul. Duhdawt nak khal a tul thu a sim. Himi thuthang cu CNA thuthang ihsin kan don mi a si.

https://bit.ly/2XLR75g