Rome khuapi ih thaal tikcu caan ih harsatnak a tong rero mi Rome thawnginn ih um thawngtla pawl hrangah Pope Francis in ice-cream (tikhal hmuk) 15000 a rak kuat September 8, 2021

Rome khuapi ih thaal tikcu caan ih harsatnak a tong rero mi Rome thawnginn ih um thawngtla pawl hrangah Pope Francis in ice-cream (tikhal hmuk) 15000 a rak kuat

September 8, 2021

         Pope Francis cu Rome khuapi ih um Regina Coeli le Rebbibbia thawnginn ah ice-cream 15000 a rak kuat thu September 7, Vatican in thuthan a rak suah. Ziangah tile nikhua a sat tuk ruangah a si.

Hi ti a kuat nak cu Pope ih zaangfah lainatnak hnatuan ih tuanvo nei tu Cardinal Konrad Krajewski in a rak timlam sak. Kum tinten nikhua sat tuk nak thaan caan ah ziang hmun hman ah a sa hrial a theih lo mi thawngtla thawng za leng lo pawl hnenah Bible Cathianghlim zaangfah lainatnak hnatuan pawl sungin thaal caan ih tuah thei mi hnatuan pakhat a si.

         Thaan caan ah nikhua sat cu thukhat, man caan ih an feh cu thukhat,rawl dawr tum le fa te pawl, ziang vek hmun hman feh thei lo in inn lawng ah um men tu pawl lawng Castel Gandolfo ih um tipithuanthum a si lo le tili ah feh in nikhat sung khualtlawn nak ah an hruai theu. Cui hnu ah zaanriah ah Pizza an do theu thu a rak sim fiang. Ramsung zaangfah lainatnak hnatuan pawl hlei ah Pope ih zaangfah lainanak zungin thansonak a fung mi ram pawl ah siivai bawmnak pawl khal an rak kuat theu.

           Kan dung August thla Madagascar ram hrangah a tul mi American dollar 600,000 man, tomography cet cu a rak hlu thu, cu vek in siivai tuamhlawmnak phuan dingah, siikhaan pawl rem aw sal dingah, a thar phuan a tul thu dilnak ca thawn famkim ten dil a si le an bawm thu, Africa ah a farah bik mi ram ah a par ih rak sim zo mi dinhmun pawl hrangah euros taan 2.4 an rak bawm. Pope Francis in 2015, tlawngkai nili zaanlam biakthawinak cu Rebibbia thawnginn ah an rak tah ih Bawi Jesuh in a dungthluntu pawl ih ke a kholh sak nk mangsal in thawngtla pawl ih ke a rak kholh sak. Kumthum a rei hnu ah Regina Coeli thawnginn ah cui caanserh an rak tuah sal.

            Tui kum June thla ah khal Pope in thawngtla 20 cu a um nak inn ah a rak tong. Pope le a rak tong tu thawngtla pawl cu a kiltu pawl ih kil tul lo mi pawl an si ih an mah cu Rome khuapi ih nisuah nak lam ih um Rebibbia thawnginn in an si. An mah cu Vatican museum ah zoh dingin kiltu pawl, an mai thlarau lam lamhruaitu Puithiam thawn an rak thleng. 2020 Italy ramsung ah coronavirus a rak karh rero lai ah thawnginn pawl ah thawnginn ih ca kuat an rak kham. Curuangah Rebibbia ih thawngtla hrekkhat in duhphorhnak tuah in an lungkim lo nak an rak langter.

         Italy ram ih thawnginn hrekkhat pawl ah meisa a rak kang ih cu tawk ih hnatuan tu pawl meisa ut tu tiih kaihnak pawl an rak tuah. Cui thilcang pawl ruangah ramhuap ah nithum sungah thawngtla 12 an nunnak an rak liam.Tui kum thaal caan cu Italy ih a sat bik caan a si. A sat tuk ruangah Italy thlanglam ah ram kangnak pawl a rak um. Tipithuanthum sungih a thleng mi Sicily tikulh ah kan dung September 11 ah temperature 119.84, Fahrenheit 48.8 celsius a um. Hi temperature cu Europe ah a sang bik mi a si.

Hi thuthang cu CNA thuthang ih kan ngah mi a si.                                                                                                                                                                                                                     

Ref: Rome Reports

https://bit.ly/3BWAthA