Thlacam nak cu kan nunram khaisan nak a si. November 4, 2020

Thlacam nak cu kan nunram khaisan nak a si.

November 4, 2020

              Pope cu kan dung tlawngkai ni thum ih khawm zawh pawl thawn kartin tong aw ih thlacam nak program cu tuah ringring nak St.Peter tualrawn ah khawmzawh mipi pawl thawn a tuah lo. Europe khalah covid-19 a veihnih nak a zai sal ruangah mai ram kilhim nak in mipi thawn tuah mi caanserh cu an kham sal a si. Curuangah Pope khal khawmzawh pawl tel loin Pope ih tirhthlah innpi ah a tuah. Harhdam nak zung le thunei tu pawl ih an suah mi pawl cu thlun dingah khal a forh.

              Covid nat suan a tuar tu pawl le anmah a kilkhawi tu harhdam nak ih hnatuan tu pawl hrangah thlacam sak dingah a forh. Ziangruangahtile anmah pawl cu duhdawt nak hrangah mai nunnak hman ziangah rel loin an thiam mi fim nak thawn nun khua an sak. A tu vekih hla aw ih um nak cu kan zate ih that nak hrang a si ruangah Pathian hnen ap dingah a sim.

A thuk zet mi thuhman

              Tui kar tlawngkai ni thum niih zirh nakah Bawi Jesuh ih zoh thimtlak thlacam nak thu a ruat. Bawi Jesuh ih thlacam nak cu a thuk zet mi thu hman thu dik a si. Cui a thuk zet mi thuhman ihsin kanmah pawl cu malte lawng kan thei. Asinan amai sinak fiangten in hmu ter. Bawi Jesuh cu mitinkim ih an hal mi duhdawt nak ah Pathian thawn a kom.

Thlacam nak cu Bawi Jesuh ih nunram kilhim tu a si.

              Pope cu Mk 1:21,34-48 himi Bible a hrampi ah ret in a ruah nak a hlawm. Cui Bible ah Bawi Jesuh cu zanlam kau nikhat ah midamlo tampi a dam ter nak thu le a thaizing zingten mi um lo nak hmun ah a mahte thla a cam nak thu a si. A dungthlun tu pawl in Bawi Jesuh an hmuh tikah Kapernaum khua zaten in amah an hawl thu an sim tikah amah in a dang khua pawl khal ah feh in Pathian thu a sim lai ding thu a sim. Thlacam nak cu Bawi Jesuh hrangah ziangvek caan ziangvek hmun, ziangtin tuah ding timi a zirh tu lampi a si. Ti duhsan cu Bawi Jesuh cu a nunak ah Pathian ih hruai nak a thlun. Midang ih sunloih porh nak, midang duh nak thlun asilo. Bawi Jesuh ih thlacam nak nunram ihsin Pope cu cawn ding 4 khal a zirh.

Nikhat sung ih nisuah caan

              Kan nun ram ah thlacam nak cu ni khat sungih a hmaisabik tumtah mi si dingah Bawi Jesuh in in zirh. Thlacam nak umloin a cem mi ni nikhat cu ning um ih a car mi ni, asilole bang nak thawn a khat mi ni nikhat ah a cang ter. Kan ton mi a har mi dinhmun pawl cu thluasuah um lo in siseh van siat van that nak par ah an puh mawh theu. Asinan Bawi Jesuh in thlacam nak thawn Pathian ih aw ngai dingah, ziangahtile thlacam nak cu Pathian thawn kom awk nak a si. Cutivekin tuah asile nitin ton mi buai nak pawl cu do kham tu si nawn loin Pathian hnen zangfah nak co nak ah cang in, kan dil mi ngai sak dingahl e kan hmai ih a ummi pawl thawn thil um daan pawl felfai ter dingah dil nak a si.

              Pope ih sim mi a pahnih nak zirh mi cu Bawi Jesuh in kanmah pawl zuam nak nei dingah in zirh. Mi tin in tuletu thla kan cam theu nan thla cam nak neih tikah tidaan thawn tuah dingah, zir dingah le cawl loten thazang suah in tuah dingah a zirh. Khristian pawlih thlacam ank nunram cu a thangso ringring mi thleng awk nak kha a rah ter. Hnik sak nak thawn ton caan pawl ah kan mah pawl in hnget ter. Pathian ih thluasuah thawn hnget zet in nung ter. Ziangruangahtile kanmah pawl in duh. In kilkhawi ringring. Himi thuthang cu Vatican thuthang ihsin kan ngah mi a si.

https://bit.ly/3p8RKyk