Tikulh ram pawl rem dai dingah thlacam sak ding tiin Pope in Syprus President tha rak pe (December 2, 2021)

Tikulh ram pawl rem dai dingah thlacam sak ding tiin Pope in Syprus President tha rak pe

(December 2, 2021)

              Syprus President Nicos Anastasiades in Pope Francis hnen Nicosia ih President innpi ah Syprus awnmawi pawlkok in awnmawi thawn hlunghlai zet in an hmuak. Pope le President cu a hlan Syprus ih Bishop khal a rak siih, Syprus ih ahmaisabik President khal a rak simi Makarios III ih zuk lem a thlen ah hmunkhat ten an colh hnu President innpi ah an feh ih, minute 30 hrawng a dangten an tong aw.

              Pope in hlunghlai zetih hmuaknak, cibai buknak pawl hrangah a lungawi thu, lungawinak langter dingah a thabik lamzin cu ulenau taktak thinlung neih nak asiih, himi lungawinak cu thinlung sung tiang a thleng thu a rak sim.

              Cui hnuah laksawng pawl an pe aw. President in kut thawn thit mi Missa raithawinak ah hman mi thilri pawl le Pope ih thuanthu um tlak fehnak cu sunloih nak thawn  hminsinnak laksawng a pe. Pope in khal President hnen St. Paul le St. Barnabas tei ih khualtlawnnak cu zuk tuah mi thi pia te laksawng a pek. Cui Dungthluntu pahnih cu Syprus tikulh ah Gospel darh dingah zuamnak ah a thupi zet mi pahnih an si. Pope cu President lawng siloin President tong let sak tu pawl khal laksawng a pe ih mangbangza asiih an di a riam zet.

              Syprus President in thunei tu pawl, Pathian hnatuantu pawl hmaiah Pope Francis cu harsat tuar 50 kha Italy ah hruai ding asi thu nemhnget in a sim. Ziangruangahtile atuvekih anemhnget hlan thulengvak men tiin a rak sim thu, President in Pope ih a fiangfai mi thu botcat nak kha Europe ram ih mivai pawl thawn pehpar ih daan pawl von ruat sal dingah thangpork vek a bang thu hitivekih phurrit cu ram pakhat lawng thawn tuar siloin bangranten tuar nak thawn phurrit zang deuh dingin bom dingah theih nak nei ding a si thu, mivai pawl khal Europe pawlkom sungtel pawl hnen um dingah caantha a tam ding thu a sim.

              Pope khalin Syprus cu ramsung buainak a um mi karlak ihsin mivai pawl thinlung thaten an cohlang ruangah Europe pawlkom ram pawl hrang ah upat tlak ram a si thu, zumnak bang lo, nunphung bang lomi mivai pawl cohlang cu a ol lo thu, asinan Syprus ram ih tleunak cu a danglam zet thu, cutivekin Syprus ram thuhla ih elawknak thu khal Pope in a sim. Ziangruangahtile Syprus saklam cu 1974 lai ihsin Turkey pawl ih uk an tuar ih, ramsung um mipawl khal Turkey miphun pawl ukmi ram a siih mah te uk awk nak ram tiin an au rero thu, cui hmun ah hlailai san ihsin a ra mi Khristian pawl hnen cui ram ihsin an hnawh thu, hi tikulh ram ih a tumbik mi nat nak cu a liam zo mi kum 10 lai ihsin thokin mai khua le ram ah tlung thei lo, mai biaknak lam ih inn sung ah an luh thei lo nak a si. Curuangah tikulh ram ih ramdaih nak hrang thla a cam sak ding thu a sim.

              Europe ah remdaihnak um dingah ramkhel ho tu pawl ih tuanvo lawng a si lo. Mi tinkim ih tuanvo asi thu, remdaihnak cu mi upa lawng in ngah thei mi a silo, mi menmen nunau, mipa pawl khal in an ngah thei thu, Europe dinhmun in remawk nak le lungrualnak tuah sal dingah a tul thu, hitivekin tuah ding khalah ralthatnak le hlawp tlo nak a tul thu, cutilawngah hmaiah feh thei ding a si thu a sim. Cui hnu ah Pope cu Franciscan tlawngah a feh. Cui tlawng khal UN ih uk mi ralkap um lo nak hmun a si. Himi thuthang cu Rome Reports thuthang ihsin kan don mi a si.

Photo courtesy of CBCP News/Google Images

https://bit.ly/3IejRWD