Tuahmawh nak a tong tu Kawlram, zumnak, lungrual nak le thu hman ah um uh tiin Pope Francis in forhfial. May 16, 2021

Tuahmawh nak a tong tu Kawlram, zumnak, lungrual nak le thu hman ah um uh tiin Pope Francis in forhfial.

May 16, 2021

            May 16 ah Pope Francis cu Italy ram, Rome khuapi ih a thleng tu Kawlram Catholic mipi pawl thawn St.Peter Basilica Biakinn sung ih St.Peter Missa raithawinak biaktheng ah Kawlram hrangah ahleice mi Missa raithawinak a tuah. Missa raithawi nak sungah Pope in dungthluntu pawl kilkhawi dingah Pa Pathian hnen a dil nak thlacam nak parah bun aw in thuthangtha a sim. Kawlram ih ton rero mi buainak karlak ah zum nakah hnget dingah a hram pi a si. Zumtu pawl cu a tha lo mi lam ah peng lo ding. Tuahmawh tu pawl thawn thil tha lo tuah loin tuahmawh tu pawl ih thinlung thleng dingah, remdaih nak hmu thiam dingah thlacam sak ding.

            A tui tuahmawhnak, harsat nak le hmuahsuam in thah a tuar tu Kawlram in Kawlram sungih Khristian pawl hrang zumnak ah ding thei dingah, lungrualnak nei dingah thuhmai kai nget dingah le Bawi Jesuh zum dingah a forh fial. Zumnak ah ding hnget dingah cun Khristian pawl ih zoh nak cu a dang dang zoh loin vanram lawng cuan dingah, leipar ih um laiah ralbuai nak pial a ngah lo vekin sual nei lo nunnak ih thi pawl a luang. Zumnak ih hnget nak cu huat nak thawn lehrulh duh nak ruah nak hlon a theih ding. Cutivekin kan thinlung ruahnak pawl cu Pathian ih duhdawtnak ah kaihnget ding. Ziangruangahtilel Pathian cu kan zaten ulenau tiin khat le khat duhdawt dingah in zirh.

            Thlacamnak cu kanmah pawl Pathian rinsan thiam dingah, harsat caan khalle rinsan nak mal ter lo dingah a zirh. Ton rero mi thil cang pawl cu ruahsan nak asinan zumnak, ruahsannak hlo ter loin do rero dingah sunglam thazang a khoh ter. Thlacamnak cu harsat nak pawl dungsip in a sung pek a si lo. Relhnak a silo. Thlacam nak cu kan duhdawt nak le ruahsan nak cu thih nakih kutsung ihsin do nak ih a tha bik le pakhat lawng asimi hriamhrei a si.

            A pahnih nakah Pope in “lungrual dingah” a forhfial. Bawi Jeush cu a um nawn lo hnuah dungthlun tu pawl khat le khat lungrual nak nei dingah Pa Pathian hnen ah thla a cam. Cutilawngah anmah pawl cu “hmunkhat ten an um thei ding” Johan 17:21 lungrualnak cu innsang a din ter ih, ulenau thinlung a nung ter. Thleidannak cu “mi that thei tu nat sia” a si. Himi nat sia cu kan thinlung sungah kan tuar. Ziangruangahtile kanmah pawl cu sunglam, innsang, pawlkom, minung khat le khat, Kohhran sungah thleidan nak a um. Lungrual nak a siat suah tu pawl cu thinheng nak, iksik nak, mah hrang lawng ruat ih mi dang hrang ziang ih rello nak, midang thu thensak nak thinlung neih nak pawl an si.

            Kanmah pawl in a fate mi buainak thaten kan thei thiam asile a tum mi buainak cu kan ruat thei ding. Nan ram ih ton rero mi buai nak vek a si. Pawlkom pa khatkhat tha pek ih pom tu pawl cu mah hrang ruat in, thuneih nak kha hman lo zet in lak asile buainak le thenthek ih um nak cu pial ngah lo in a um tengteng ding. Thenthek nak cu thlarau sia ih tuah mi asiih, thlarau sia cu a tum bik mi siat suah tu a si.

            Kan zaten lungrualnak din dingah kawh kan si. Pa Pathian hnen Bawi Jesuh ih zangfah dil nak cu thinlung sungah kilkhawi ding. Leipar ah fam kim ter ding. Innsang khat tiin leng tlang ding. Ulenau thinlung thawn duhdawt nak thawn um thei nak ralthat nak khal neih ding. Tui lai san kan tul mi a thupi bik cu ulenau thinlung nei dingah a si.

            Remdaih nak le ulenau thinlung nei dingah a hram ihsin thok ding a si. Mi pakhat ciar ah a um. Thil fate ih sin a thok. Himi dinhmun ngah dingah nan zaten khal thil fate ihsin thok in tuah a theih. Nan nih khal ulenau thinlung a nei tu nan si ding. Himi thinlung a forh tu nan si ding. Tuahmawh nak ruangih a siat mi himi thinlung din sal ding. Himi dinhmun cu mi pakhat ciar sinak in siseh, Diocese sinak khalin siseh, din ding. Thurelkhawm nak khaisang in tuah cio uh. Khat le khat upat cio uh. Ulenau pawl, kiangkap ngaihsak cio uh.

            Thuhman kilhim nak ah nunram ih ziangvek dinhmun khal siseh profet ih sim cia nak a si. Ti duh san cu Gospel thuthangtha ah nunnak le tettikhan nak cu san ti luan ih hmuhnak ruat nak thawn pial in khal tuah dingah a tul. A tu ahcun kanmah Khrisitan pawl cu pekawk nak phun tuah duh a si. Asinan thuthangtha thawn pehpar in Gospel thuthangtha ah nung ding siloin dingfek dingah le thudik hrangah kan nunnak pe dingah a duh.

            Ralbuainak, tuahmawh nak le huatawk nak karlak ah Gospel thuthangtha pelh loin kilhim dingah, remdiah nak din tu si dingah, kawh kan si ruangah nunphung, ramkhel, dinhmun parah bun aw in, cui hna khal tuan ding a si. Cutiih tuahnak ah kan nunnak khal pe dingah a tul asile pek ding. Hitivekin asile dinhmun a thleng ding. Pathian cu dai le dai lo, sa le sa lo pawl a duh lo. Kanmah pawl thudik, Gospel thawn pehpar aw in raltha zet in pe aw dingah, ding ding ah a duh. Cutilawngah vanram ih lungawi nak midang riahsiat nak khal, thil tha lo neh tik khalah siseh tettikhan thei ding a si.

            Netabikah Missa raithawinak sungah “netabik zanriah Missa” biak theng par tuah duhnak cu amah vekih tuar nak phun a siih, himi sum nakah nan zaten khal tel in thlacam phah in remdaihnak a tul tu thinlung nei tu tiin thleng dingah hmun khat ah thla cam uh. Bawi Jesuh ih thlacamnak vancung um kan Pa cu harsat caan ah zumnak ah hnget dingah, lungrualnak din tu si dingah Gospel thuthangtha ih zirh nak tettikhan dingah in bom. Tui a cang mi dinhmunah nan ruahsannak hlo ter hlah uh. Ziangruangahtile Bawi Jesuh in Pa Pathian hnen thla in cam sak. Kan mah pawl that lo nak in siseh, thudik lo in tuahmawh tu thunei tu pawl ih hmuhsuam, kaih, velh, hrem, thah nak pawl ihsin luat ding thla in cam sak ringring tiin thuthangtha ah sim. Himi thu cu Asia News ihsin kan don mi a si.

https://bit.ly/3v1LDyv