Ukraine ih nauhak zaten run dingah na ra thei pei maw tiin nauhak pa pakhat in Pope Francis sut. (June 5, 2022)

pope_francis_le_nauhak_pate

Ukraine ih nauhak zaten run dingah na ra thei pei maw tiin nauhak pa pakhat in Pope Francis sut.

(June 5, 2022)

            Ukraine nauhak pate pakhat in zarhte ni ah Ukraine ah Pope Francis tlawngin “cutawk hmun ih harsat tuar rero mi nauhak zaten run dingah” Pope Francis a sut ih Pope Francis cu zangfah nak thawn a thin a na ter. Italy tlangleng lam hnatuan nak le suahkeh in thiam nak a nei tu nunphung lam ih the Pontifical council thawn kom khawm in “Children’s Train” Italy tong in “Treno dei Bombini” program Vatican ah Pope Francis in ralthat nak a nei mi tlawngta nauhak 160 a ton nak ih an biak awk nak a si.

            Vatican thuthang ih an sim nak vekin Pope Francis Ukraine ih tlawng dingah a dilnak a neitu Ukraine nauhak pa cu Sachar asiih harsat tuar dinhmun in Ukraine ihsin an tlan ih a tu Rome ah an um tiin an sim. Nauhak pate in “thusut ding ka nei lo asinan ka lo dil duh, a tu Ukraine ih a tu lai ih harsat tuar nauhak zaten run dingah na feh thei pei maw” tiin a sut. Pope Francis cu leng a nei mi tonak ah to phah in “hi tawk ih na um cu ka lung a awi zet. Ukraine ih um nauhak pawl cu ka ruat zet ih cui nauhak pawl cu mi zaten thawn nel aw dingah le bawm dingah Cardinal thenkhat ka thlah zo” tiin Pope in asim.

            Pope in pehbet in “Ukraine ih feh ka duh, cutiih ka tuah thei ding ka hngak, na theih vekin cutiin thu botcat nak tuah dingah a ol lo. Cutiin tuah nakin leilungpumpi ah thatnak hnakin buainak a cang ter thei” tiin a sim. “Tui a ra lai dingmi zarh ah Ukraine cozah pawl thawn tonawknak kan nei ding. Cutawk ih ka feh thei daan ding ka sim ding. Ziang a cang vivo ding kan zoh pei cu” tiah Pope in asim bet. Pope le nauhak pate ih biak awk nak cu EWTN video ah zoh a theih.

            June 3 cu Ukraine ih ralbuainak a can nak ni 100 kimnak ni a si. Minung covo hrang United Nations High Commission zung ih an sim nak vekin Russia ih an do nak February 24 ihsin thokin Ukraine mipi 4,138 an that ih 268 cu kum kim lo an si. Cuihnu ah mi 5,014 hriamhma an ngah ih kum kim lo nauhak 427 an tel. United Nations High Commission zung ih an tuat daan vekin harsat tuar 7 million cu ralbuainak a thok in ramri ram pawl ah an tlan ih thawng tampi cu an inn le lo tan in Ukraine ram ih hmun dang ah an thawn tiin an sim. Himi thuthangcu Catholic News Agency ihsin kan don mi a si.

https://bit.ly/3Nt83lp

Add new comment

2 + 14 =