Vancungmi in Bawinu Maria hnenih thu a thannak puaini ah Missa Sumnak sungah Pope Francis in thuthangtha sim (March 26, 2022)

Vancungmi in Bawinu Maria hnenih thu a thannak puaini ah Missa Sumnak sungah Pope Francis in thuthangtha sim

(March 26, 2022)

         Pope Francis in mizaan March 25 ah St. Peter Basilica Biakinnpi sungah ‘Vancungmi in Bawinu Maria hnenih thu a thannak puaini’ ah Missa sumnak a rak hoha. Missa sumnak sungah Pope in leitlun ih um Bishop pawl, kohhran mipi pawl thawn tui kan hmuhton rero mi dinhmun a phunphun cu a thianghlim zet mi thinlung hnenah kan ap tiah a thu sim a thok ih cui ni ih siar mi Gospel cu hi tiin a rak sim.

         Vancungmi Gabriel in Bawinu Maria hnenah veithum tiang a rak biak. Hmaisabiknak ah ‘thluasuah thawn a khat mi Nu, Pathian thawn um tlang tu Nu, na lungawi aw’ tiah cibai a rak buuk. (Lk 1:28) Lungawinak ding thuhla cu Pathian cu Bawinu thawn a um ruangah a si. Duhdawt zet mi u le nau pawl Vancungmi ih thuthannak in thu a lo sim rero. Nan nih Pathian ih sual ngaithiamnak a lak tu tinkim in hi cibai buuknak cu nan mah cibai buuknak tongkam ah cohlang uh. Cu tikah Pathian in ‘nan mah thawn ka um’ tiah a lo sim ding.

         Tu le tu sualthlah dingih kan feh tikah Pathian hnenah kan naih tiih ruahnak thinnuam lonak vek thawn kan feh theu. A ngaingai ahcun sualthlahnak Sacramentu laknak cun Pathian hnenah nuamnak a pek. Kan sualnak cu Sacramentu sannak ih a thupi biknak a si le sual ngaithiamnak, ngaithiam lonak cu kan mah par, kan tuar mi natnak, kan zuamnak, kan tlaitluannak parah a bun aw ding. Hi vek a si lo lawlaw. Sacramentu cu Pathian ih thu a si. Pathian in sual ngaidamnak in pek. Kan ke parah ding ten, hngetkhoh zet in in ding ter sal thei.

         Thluasuah ih thupitnak vun mangsal cio uh si. Rualremnak in Pathian thawn in nai awk ter lo thu theih a tul. Thupi tuk mi cu Pathian ih mithmai pan ten cohlannak in in mangbang ter ih in huap ter. Pathian cu Nazareth ih um Bawinui inn ih a feh vekin kan inn khal ah a ra ve. Kan ruahban lo mi mangbangza nuamnak in rak ken sak.

         Hmaisa ah Pathian lam in zoh tlang uh si. Cu lawngah sualthlahnak Sacramentu cohlan daan dikten duh thiam a tul. Sunglam ih hrinthatnak, thlarau lam tharthawh salnak ti vek dinhmun zaten Pathian ih ngaidamnak ihsin thokin kan tul. Hi vek ih sim ruangah rualremnak lam ziang siar lo ti nak a si lo. Hi Sacramentu cu lungawi ten in hmu ter sal ti thei ter dingah a si. Ziang ruangah nuam a theih? Zah thlak zet mi kan sualnak pawl ih in luat ter ruangah a si. Pa Pathian ih mithmai pan ten cohlannak tepnak, kan mah damnak in petu Bawi Jesuih tangdornak tep nak, Thiang Thlarau ih Nu pakhat a si vekin a hmuhton mi pawl cu a nuam tuk ding. Cu vek hmuhtonnak cu sualthlahnak Sacramentu ih thinlung muril a si.        

         Duhdawt zet mi Puithiam pawl, nan nih cu sual ngaidamnak ih riantuantu pawl nan si. Cui sual ngaidamnak thluasuah cohlang dingah nan hnenih a ra tu pawl hnenah nan lungawi uh. ‘Pathian cu nan hnenah a um’ ti mi nuamnak than uh. Hngetkhohnak, sual thlah dingah donkhamtu pawl hrial uh. Nan mah in zaangfahnak hnenih lut suak thei dingah saangkapi ah sualthlahnak Sacramentu cu kau pin ong uh. Tuukhaal tha vekin tuah dingah kawhnak nanngah. Tuukhaal ttha cun a sunsaknak a tul tu pawl cu a kut parah khai in a phum sak theu. Kan nih cu Pathian ih zaangfahnak a cem mi thinlung pawl hnenah kumkhua nunnak a luang ter tu thluasuah ti a phur tu tiva te kan si.

         Hi thuthang cu CNA thuthang ih kan ngah mi a si.

https://bit.ly/3DgPrB6