Vatican in July-August hrang Pope ih biakthawinak hman daan ding suah.

Vatican in July-August hrang Pope ih biakthawinak hman daan ding suah.

          The Holy See Press Office in pipu pawl, kum upa pawl le, Portugal le Mongolia ih a Tuukhaal khualtlawnnak ding pawl hrangah a veithumnak World Day hrang Mass sumnak tel in July-August, 2023 hrang Pope Francis ih biakthawinak lam official calendar a rak suah.

          July hi a cangvaihnak tamsawn a hmannak hmun ih a colh thla a si. Tlawngkai nihnih ni ih suah mi calendar vek a si le, Vatican ih tuah ding mi biakthawinak cu July 23, Zarhpi ni, pipu pawl le upa pawl hrang a veithumnak leitlunhuap ni hrang Mass raithawinak a si. Cui caanserh ah, Pope Francis in nazi 10 a.m ah St. Peter Biakinnpi ih Missa Sumnak tuah dingah a rak timtuah.

          Pawlpi in, July thla, Zarhlinak, Zarhpini ah kum tin ten leitlunhuap ni cu Bawi Jesuih a pi le pu a si mi St. Joachim le Anne ih puai ni ah a hmang theu. Pope in tui kum ih thuluu a hril mi cu Lisbon, Portugal ih caan malte sung tuah ding mi, 2023, Aug 1-6 tiang leitlunhuap mino pawl puai ni langsar ter tu, “sankhat hnu sankhat a mah a tihzah tu pawl cu a zaangfah a si” timi (Lk 1:50) sungta a si.

          Cui biakthawinak cu Pope Francis ih a Tuukhaal khualtlawnnak ding hmun ah an tuah ding. August thla hmaisabik zarh ah, Pope Francis in August 2-6 tiang leitlunhuap mino pawl puaini hrangah, Portugal ih a Tuukhaal khualtlawn sungah, biakthawinak caanserh pawl a tuah ding.

          A khualtlawnnak ah Lisbon khualipi a tlawng dingih Fatima ah malte sung a cawl ta ding. Pope dinhmun in a veihnihnak ah, Pope Francis in kumtin ten khawmzawhtu ting zaleng lo feh theunak, Bawinu Maria ih zuk umnak ah a tlawng ding. Pope in Cova da Iria ah the Apparitions of the Blessed Virgin Mary ih centenary hrangah, 2017, May 12-13 tiang Shrine ah a rak tlawng. Cui caanserh ah, Pope in a siatral mi leitlun ih ralbuainak pawl reh dingah thla a rak cam.

          Fatima ah, Thianghlim Bawinu Maria in a liam zo mi kum 100 hrawngah nauhak pathum hnenah langnak a rak hmuh. Lisbon in Rio de Janeiro ah WYD hrang tuah zo mi pawl Brazil, 2013, Krakow, Poland ah 2016, le Panama khuapi, Panama ah 2019 ih rak tuah zo mi ah Pope Francis in a veilinak leitlunhuap mino pawl puaini a tuah tiah a rak tarlang. Vei 37 nak leitlunhuap mino pawl puaini cu 2022 ah Portuguese khualipi ih tuah an tum nan covid-19 pulhnat ruangah a ni an rak thawn.

          Tui kum WYD ih motto cu, Pope Francis in “Mary cu a tho ih zamrang ten a feh” ti mi (Lk 1:39) sungta a rak hril. Biakthawinak lam calendar in Aug 31-Sep 04 tiang Mongolia ih a Tuukhaal khualtlawnnak sungah, thlacem lam ah Pope in biakthawinak a tuah ding tiin khal a rak tarlang bet.

          Mongolia ah Catholic mipi 1,500 hnak ih mal an um ih Pope Francis cu nisuahnak ram ih tlawng tu hmaisabik Pope a si ding. The Holy See Press Office in, a Tuukhaal khualtlawnnak le a ralai ding mi Zarh pawl ih a caan hman daan ding pawl a suah leh ding. August, 2022 ah Cardinal thar pawl ih kom khawm mi ah, Pope Francis in Mongolia ih khualipi, Ulaanbaatar ih Apostolic Prefect a si mi, Cardinal Giorgio Marengo cu ram ih hmaisabik Cardinal ah a tuah.

          Hi thuthang cu Vatican thuthang ih kan ngah mi a si.