“Baptisma thawngin Pathian ih prophet kan si” (sim tu - Rev. Fr. Joseph Ro Nei Thang)

“Baptisma thawngin Pathian ih prophet kan si”

sim tu - Rev. Fr. Joseph Ro Nei Thang

Siarding: Job 19:21-27; Luka 10:1-12

Bawi Khrih ah duhdawt zetmi nu le pa, u le nau pawl, “Kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nangmah zate thawn um hram seh” tiah cibai ka run lo buk hai. Tuihni cu 2020, October thla ni 1 ni, Tlawngkai nilini asi. Cun St Theresa ih puaini tla a rak siih Theresa hmin latu hmuahhmuah pawl cu “Happy feastday” tiah tla cibai ka run lo buk hai. Tuihni ih kan siar dingmi Pathian ih ttongkam pawl cu Job ih thuanthu 19:21-27 tiang le Luka 10:1-12 tiang asi pei. Tuihni kan ruah khawm dingmi cu “Baptisma thawngin Pathian ih prophet kan si” tinak asi pei.  

 U le nau pawl, 1Peter 2:9 “Sikhalsehla nannih cu hrilcia miphun, siangpahrang ih puithiam miphun thianghlim, Pathian ih miphun bulce nansi. Khawthim sung ihsin mangbangza tleunak sungih a lo kotu Pathian in khawruahhar thil a tuahmi pawl tlang-aupi dingih  hrilmi nan si” tiah in kan sinak thu in zirh fiang asi. Ti duhnak cu Pathian ih tlang-autu nan si in timi asi. Pathian ih prophet nan si in ti duhnak asi. Prophet pawlih ttuanvo cu tlang-aunak asi. Kannih tla baptisma sacrament kan ngahnak thawngin Pathian ih prophet miphun, miphun bulce, siangpahrang ih puithiam miphun thianghlim le hrilcia miphun ah kan tel ve asi. 

Pathian ih prophet miphun kan si vekin Pathian nih in fialmi kha ttha le fel tein ttuan ding kan si asi. Pathian in prophet pawl hnattuan a fial tikah hramhram in a fial ttheu asi. Prophet Jonah cu Pathian in “tho awla Nineveh khawlipi ah feh in an sual zia va sim aw, an tthatlo zia hi ka hmu ttheh asi” tiah a ti. Jonah cu Pathian ih hnen ihsin Tarshish khua ah a va tlan tum. Tarshish khawpi ah tinbaw thawn a va feh. Asinain Bawipa in thlipi nasazetin a hranter hrangah a tumtahmi cu a siat ttheh asi. Pathian hnen ihsin zoso a luat thei ding? Pathian ih thlahnak thotho ah a va thleng thei asi. Pathian in Jonah cu Nineveh khawlipi hrangah a hmang asi. Cuti cun Neniveh khawpi cu an sualnak an tansan ih Pathian hnen ihsin humhimnak an ngah asi. Prophet Elijah tla siseh, Prophet Elisha siseh, prophet Jeremiah siseh, prophet dang pawl tla siseh, Pathian in a hmang duh asi ahcun zo hmanin an el thei lo. Pathian in hramhram in a fial, a hmang asi. Pathian ih tirhfial mi kha fel tein le aipuang tein ttuan ding kan si asi.

Rom 10:13-15 “Cathianghlim in zokhal Bawipa ih hmin a kotu hmuahin rundamnak an ngah ding a timi a kim asi. Asinain an zumlo mi cu ziangtinso a hmin an hlam thei ding? A thu hla an theilo ahcun ziangtinso an zum thei ding? A thu phuantu an um lo ahcun ziangtinso an thei thei ding? Palai thlahmi an umlo ahcun ziangtinso thu an phuang thei ding? Ca Thianghlim in Thuthang ttha phuangtu pawlih ke cu ziangtlukinso an mawi” tiah kan hmu thei asi. Rundamnak kan ngah theinak dingah Bawipa Jesuh Khrih cu kan zumih a hmin kan ko ttul hrimhrim asi. Zumnak kan ngah theinak dingah a thuhla kan thei a ttul. Cule Pathian hnenah thlacamnak kan nei a ttul asi. Bible sung ihsin a thuhla cu kan thei thei ko ding; asinain Pathian in zumnak thluasuah in peklo ahcun zumtu kan si thei cuanglo asi. Bible thuhla a liklak in a theitu pawl hi zumtu ansi cuanglo ticu kan thei cio ding. Kannih cu Pathian ih zaangfahnak veel zaarah zumtu ah kan cang zo. Zumtu kan can theinak dingah Pyinthit ram ihsin puithiam pawl cu kan Laitlang ah thlah an si asi. Kan ram ah an thlen tikah dai tein an um men lo ih Pathian ih thuthang ttha in run zirh asi. Kan eimi ti le rawl pawl an ei, an in. Cutincun an vorhmi zumnak thlaici cu kan hnenah a keuh asi. 

Tuihni kan siarmi Gospel sungah Bawipa Jesuh in a dungthluntu 72 hi amah a fehnak ding khua le hmunkip ahkhan pahnih, pahnih in a thlah tiah kan hmu. Pahnih timi cu Pathian duhdawt ding le milai duhdawt ding timi duhdawtnak thukham pawl a khihhmuhnak asi. An 2 hman rem te in an um theilo, duhdawtnak an nei aw theilo ahcun ziangtinso duhdawtnak Bawi cu midang pawlin an cohlang thei ding? An fehnak ding hmun cu a har ngaingai asi. Cinghnia hrang umnak hmun ah Bawipa in a thlah hai asi; asinain tufano vekin thinneemte thawn feh a ttul zia tla cu thlahtu Bawipa in a cah hai asi. 

Cun Pathian thuthang ttha phuang dingin nang le kei tla Bawipa nih in ko asi. Ziangtinso kan tuah ding? Pathian ih thuthang ttha phuang dingah mah le mah sim ding, mah in innsungsang pawl sim ding, mah ih miphun pawl sim hnu ah miphun dang pawl hnenah phuang ding kan si asi. Cumi cu Mithianghlim Andrew ih tuah dahmi a rak si asi. Andrew in a rualpi pakhat thawn Bawi Jesuh an dung thlun tikah “ziangso nan hawl?” tiah a sut. Annih in “Rabbi, khuinah so na um?” tiah an let. Jesuh in “Ra uhla zoh hnik uh” tiah a ti. Cuih tikcu cu zanlam nayi pali tluk asi. An feh ih a umnak cu an hmu; cuih ni cu a hnenah an caam ta tiah John 1:38-39 ah kan hmu thei. Amah rori in Jesuh thu a zingzoi ih a hmu ih a thluntu a cang. Amah le amah Bawipa thei dingah a zuam hmaisa ta asi. Cun hma khatte ah a u Simon Peter hnenah Andrew in “Kannih cu Messiah kan hmu zo” tiah a ti ih Simon cu Jesuh Khrih hnenah a hruaita” tiah John 1:41-42 ah in sim fiang. Cumi cu mah le mah Pathian thu thei zuam hnu ah mahih innsungsang pawl thusimnak asi. Cun Jesuh in mipi 5000 tluk rawl a do lai ah Andrew in “Hinah nauhak pakhat a umih sang hlom hlom nga le nga pum hnih a nei” tiah ati. Andrew ruangah Bawi Jesuh in mipi thawng nga tlun cu rawl a dar thei ih amah cu nunnak ih sang thuhla in zirh asi. Cumi cu amah in miphun pawl thu a simnak thu asi. Cule Bawipa ih thil tuahnak pawl ruangah amah Bawipa Jesuh hmu caak zetmi Greek miphun pawl an tel ve. Jn 12:21-22 “Philip hnenah Greek mi pawl an fehih ‘sayapa, Jeush hmu kan duh’ tiah an vat i. Philip cu Galilee peng Bethsaida khuami asi. Philip cu Andrew hnenah a fehih a va sim; cule an pahnih in Jesuh hnenah an va fehih an va sim” tiah kan hmu thei. Miphun dang pawl tla Jesuh hnenah an thlenpi tinak asi.

Tuihni kan tuahmi St Theresa puai ah St Theresa te tla cu Pathian ih thu simnak ah zoh tthim tlak asi. Asinain anih cu a damlo ruangah Pathian thusimtu pawl hrangah nitin in thla a cam sak ttheu asi. Cumi tla a thupibikmi asi ve asi. 

Nan zate parah a zaten a thiamtu Pathian, Pa le Fapa le Thlarau Thianghlim in lo thluasuah hram seh. Amen.