“Bawi Jesuh cu hnonmi pawlih rualpi asi” (sim tu Rev. Fr. Joseph Ro Nei Thang), February 14, 2021.

“Bawi Jesuh cu hnonmi pawlih rualpi asi”

Thuthangtha sim tu Rev. Fr. Joseph Ro Nei Thang

February 14, 2021. Caan tluang Zarhkel (6) nak, Year B.

Siarding: Pui. 13:1-2, 44-46; Ps 32:1-2, 5, 11; 1Korin 10:31-11:1; Mk 1:40-45.

          Leitlun hmun tinkip ihsin RVA Falam Chin Service a rak ngai ringringtu Bawi Khrih ah duhdawt zetmi nu le pa, u le nau pawl, tuih hrawng boruak tthalo ruangah hnagamnak kan ngah theilo lai fangah “Thlarau Thianghlim in hnangamnak lo pe hram seh” tiah thla za ka run lo cam sak hai. Tuihni cu 2021, February thla ni 14 asiih kum khat sungih Zarhpikel voi 6 nak asi. Cun February ni 14 ni cu St Cyril, St Methodius le St Valentine te ih puaini tla a rak siih Cyril, Methodius le Valentine hmin latu hmuahhmuah “Happy feast day” tiah cibai ka run lo buk. St Methodius le St Cyril te cu unau ansi. St Valentine cu Rome khua ih Christian ralkap pawlih thlarau kilkhawitu Puithiam pakhat asi. Siangpahrang ih thupeknak thawngin Rome ralkap pawl cu tthit umnak a khamih a thup te in tthit-umnak a tuah sak ruangah siangpahrang in Fr Valentine cu a thahnak asi. St Valentine cu fala le tlangval ngai awtu pawlih humhualtu mithianghlim ah a cang asi. Cun hmai Tlawngkai nithumni cu vutcam culhni asi thlang dingih ulh caan ah kan thleng sal thlang asi tiah kan run lo thei ter bet. Tuihni Zarhpini ih kan siar dingmi Bible pawl cu Puithiam hnattuan 13:1-2, 44-46 tiang, Ps 32:1-2, 5, 11 tiang; Bible a voihnihnak ah 1Korin 10:31-11:1 tiang le Gospel ahcun Mk 1:40-45 tiang pawl tla ansi pei. Tuihni ih kan ruah khawm tlang dingmi cu “Bawi Jesuh cu hnonmi pawlih rualpi asi” tiah asi pei. 

          Tuihni ih kan siarmi Thuthang ttha hi siar sal hrih uhsi. Markus 1:40-45 Miphaar pakhat cu Jesuh hnenah a ra ih a khukbil in “Na duh asi ahcun i thiangter thei ko” tiah bawmnak a dil. Jesuh cu a zaangfah ngaingai ih a kut in a hei dawh hnu ah a thamih “ka lo thiangter duh zet asi, thiang thlang aw” tiah ati. Hmakhat ter ah a phaarnat cu a damih a thiang. Cule Jesuh in cupa cu a feh terih  fek te in thu a tiam. “Ngai aw! Hi thu hi zohman na sim lo pei. Puithiam hnenah va feh vurvo awla rak lo zoh seh; cule mi hmuahhmuah in na dam asi ti an lo theinak dingah Moses ih thupekmi vekin thawinak va pe aw” tiah a cah asi. Miphaar pawl cu zaangfah an um ngaingai asi. 

          Tuih lai san ih COVID nat sia tuartu pawl vek ansi. COVID natsia cu suan awk a ol tuk ruangah tuamhlawm ding tla a har ngaingai asi. Covid natsia ruangah biaknak le thlarau lam siseh, sipuazi lam siseh, luhmuhzi lam siseh in siatsuah ttheh asi. Covid ruangah kan khawm theilo ih thlarau lamah daithlannak a suakter. Covid ruangah sumdawngnak le tthansonak hnattuan kan ttuan thei nawnlo. Covid ruangah thih le hlo ah hmanah kan va tel theilo, mipi ton aw khawmnak pawl kan tuah theilo, puai tla kan tuah theilo ih kan luhmuhzi pawl a tthih-khaih ttheh asi. COVID natnak a ngahtu tla kan va vehvai theilo ih a tthi-kyan zetin kan taan a ttul men, a thi pang sehla tla unau sungkhat za in kan va vui thei nawn lo. Hnonnak tuar rori asi ta mai. Bawipa pan uhsi, amah cu kan rualpi asi, in zaangfah ringring tu asi. Bawipa cu midang hnonmi pawl, mina pawl, sual neimi ti ih mipi ih hnonmi hlawhhlang pawl hmanah a komtu asi. Misual pawlih rualpi ah asi nain sual a tuah dahlo ih misual pawl miding ah a her saktu asi.

          Cun Moses ih san lai ah miphaar cu puithiam ih a zoh hliah pei ih a natnak a hmu ahcun ‘“mithiang failo asi’ tiah a than pei. Ziangahtile a lu ah misuan theinak hma a nei asi. Zokhal siseh phaarnat a neimi cu hnipuan tlek a hruk pei, a sam tla hriatlo in a thlah pei ih a hmur hup in ‘mithiangfailo ka si, mithiangfailo ka si’ tiah a au pei. Hi natnak a nei sung hmuahhmuah cu mithiangfailo ringring asi pei ih hnar pawnah amah lawng a um pei” tiah tuihni ih kan siarmi Bible a voikhatnak Puithiam hnattuannak 13:44-46 ah Miphaar thawn pehpar awmi ah kan hmu thei. Khawleng ah an um ttul ruangah a innsangpi pawlin rawl an pek duh asi ahcun rawl kha an ken dingih an ret sak ding. A awn theimi pakhatkhat a tum pei ih miphaar in rawl in kuat asi ti a thei ding asi. Bel le khuat kheng pawl an ret sak cia dingih rawl kha a cuih bel le khuat kheng sungah an sung sak a ttul asi. Miphaar ih tham cia mi khuak kheng pawl kha midam in tham sak a ngah lo. Tham ngah sual asi ahcun a thamtu hi mithiangfailo ah a cang hngal cih asi. Miphaar pawl hi zaangfah an um ngaingai asi.

          A tuih kan siarmi Bible a voikhatnak le thuthang ttha kan zoh tikah Moses sanih Levi puithiam dinhmun le Melchizedeck vekin puithiam asimi puithiam Jesuh te ih dinhmun tla zoh cio uhsi. Moses sanih puithiam hrinsor Levi mi pawlin phaarnat a nei le neilo a check tikah natnak a hmu asile “mithiangfailo na si” tiah a than pei tiah asi. Cun miphaar cu khawleng ah dawi hlo asi ding. Puithiam Jesuh in cun miphaar si cia mi pawl parah zaangfah zawnruahnak tumpi a nei ih “ka lo thiangter duh zet asi, thiang thlang aw” tiah a natnak cu a kuh hai asi. Luka 17:11-19 ah tla Bawi Jesuh in miphaar 10 a damternak thu kan hmu thei asi. Bawipa Jesuh in mipi ih ttul samnak pawl a tawlrel sak ttheu asi ti kan hmu thei asi. Cumi cu mipi parah zaangfah lainatnak a neih ruangah asi. Zaangfah zawnruah nak le duhdawtnak pawl cu upadi parah an um asi. Cumi thinlung kan nei thei ve nak dingah St Paul nih in zirh asi. Tuihni kan siarmi Bible a voihnihnak 1Korin 11:1 ah “Khrih ih nundaan ka cawn vekin ninnih khalin i cawng ve uh” tiah in zirh asi. Paul ih in zirhmi Chrih ih nun dan ziaza lakah “Nannih cu Pathian ih minung nan si; a lo duhdawt hai ih amahih hrangah a lo hrilmi nan si. Curuangah zawnruahnak, zaangfah thinpemnak, tandornak, thinnemnak le thinsaunak pawl cu hnipuan bangtukin hruk uh” tiah Kolose 3:12 ah in zirh asi. Nikhat hnu nikhat Jesuh Khrih ih nundan kha cawng ding kan si asi. Tuihni ah tangdornak malte tal, thaisun ah zawnruahnak malte tal, cun nidang ah thinnemnak malte tal tiah maltete in kan thok vivo a ttul asi. Zu hi kan in dahlo asile kan in thei lo, ka duh theilo, a thawtnak kan thei thei lo, asinain nitin malte malte in kan in asi ahcun neta ah a thawtnak kan thei thei dingih a cuai hmanin kan cuai thei mi ah a cang asi.

          Thatnak kan tuah theinak dingah tla maltete in thok uhsi. St Francis Assisi in “tthatnak cu nitin in maltete in thok awla ttha zetin tuah aw” tiah in zirh asi. Hna kan ttuan ih ttha zetin maltete in thok ding kan si asi. Simanking kan nei ih kan simanking kha ttha zetin nitin maltete in kan ttuan suak vivo asi ahcun a hlawhtlingmi hnattuan ah a cang ding asi. Mi ih hnonmi pawl parah siseh, a hlo mi kan tuurual pawl parah siseh, misual tiih mi ih hnonmi pawl parah siseh, komtu neilo mina pawl le mi ih thleihdanmi pawl parah siseh, mifarah miharsa le mibanglo pawl parah Jesuh Khrih ih zaangfah lainatnak nei cio ve uhsi. Bawi Jesuh thinlung upatnak litany a cemnak ah “Maw Jesuh, thinnem le thinniam tangdornak thinlung neitu nasi. Kan thinlung tla na thinlung bangin in run siter hram aw” tiah kan cam ttheu asi. Jesuh ih thinlung bangin duhdawtnak le zaangfah zawnruahnak thawn khahter uhsi.

          A ngaitu u le nau pawl zaangfahnak thawn a khahtu Pa le Fapa le Thlarau Thianghlim in nan zate lo thluasuah hram seh . Amen.