“Bawipa cu ka tleunak le I runtu asi”

HOMILY FOR SUYNDAY (26/1/2020)

Bawi Khrih ah duhdawt zetmi nu le pa, u le nau pawl, “kan Bawipa Jesu Khrih ih zaangfahnak veel, Pa Pathian ih duhdawtnak le Thlarau Thianghlim ih pawlkomnak pawl cu nanmah thawn um hram seh” tiah cibai ka run lo buk hai. Tuihni cu January ni 26 ni, Zarhpi nithianghlim ni asi. Kum khat sung Zarhkel Zarhpi voi 3 nak asi. Cun St Timothy le St Titus te ih puaini tla asi. Kan siar dingmi Bible pawl tla cu prophet Isaiah 8:23 ihsin 9:3 tiang; Ps 27:1, 4, 13-14; Bible a voihnih siarnak ahcun 1Corint 1:10-13, 17 pawl tla ansi pei ih Thuthangttha sung ihsin cun Mt 4:12-23 tiang pawl tla an si pei. 

Tuihni kan siarmi Thuthang ttha sungah Bawi Jesuh cu tleunak asinak thu ihsin a thok ih cun vancung uknak a nai zo ruangah sualsirnak thu, Dungthluntu pawl a kawhnak thu le Thuthang Ttha a phuangih mina pawl a damternak thu le hla pawl kan siar asi. Saam a sawnnak cu “Bawipa cu ka tleunak le I runtu asi” tiah asi pei. 

U le nau pawl, kannih tla zumtu kan rak si hlanah sualnak ih khawthimnak sungah kan um dah asi. Sihmansehla Pathian in a zaangfahnak in rak co terih Amaih Mangbangza khaw tleunak sungih zumnak khawtleunak tla kan ngah asi. Zumnak khawtleunak ihsin amaih Kohhran dik asimi Catholic Kohhran sungah um thei dingin zumnak khawtleu in pe lala. Curuangah tuihni kan siarmi Bible sungah “khawthim sungih umtu khawvel mi pawlin mangbangza tleunak tumpi an hmu ding timi” kha nang le kei parah a ra kim asi. Lungawi ding ziangtlukin so a um. Amahih Kohhran dik sungah kan um ngah ruangah amahih Sacrament thianghlim pawl cu san theinak kan ngahih amah thawn pehzomnak kan nei thei ringring hi asi.

Bawipa nih in ko ruangah amahih Kohhran member kan rak cang zo ih kanmah lam in teh ziangmi pawl so kan tuah pei? Pathian nih in kawhnak ah na va pan zo maw? A kawhnak cu na sawn sal maw? Bawipa lungawitertu na rak si maw? timi pawl kha ruat in tuihni kan siarmi Gospel sungah “vancung uknak a nai zo ih ruangah nan sualnak sir uhlaw” kan thinlung sungah camcin ternak kan si. Pathian thawn a catmi, Pathian thawn a hla aw mi, Pathian thinhengtertu kan rak si pang ahcun a tu ah lung thlengin sualnak pawl tan sanin Bawipa hnenah kirsal uhsi; Bawipa in dungthluntu pawl a ko vekin nang le kei tla a uknak ram karh zaitertu si dingin in rak ko rero asi. Bawipa in Peter, Andrew, James le John te pawl a ko khawm asi. Annih in tla an nu nu le pa siseh, an inn sungsang le pawl siseh, an neihmi ziangzongza siseh an tansan ttheh ih Bawipa dung an thlun asi. Cun Bawipa in thuthang ttha a phuang ih mina tampi tla a damter asi. Bawipa in thlarau hrangih ttulsammi le ruang pumpi hrangih ttulsammi pawl an tuah hai asi. Kannih tla mi hmuahhmuah hrangah Bawipa vekin an thlarau hrang le an ruangpumpi hrangih ttulsammi pawl kan tuah sak theinak dingah Bawipa hnenah pan ding kan si asi. Bawipa hnenah thluasuah dil kan ttul asi. Bawipa umnak Biakinn ah va pan in Bawipa kha hawl ding le tep ding kan si asi. 

U le nau pawl, Bawipa umnak biakinn a thupi zia tla cu ka lo hlawm duh hai asi. Tuihni ih Saam sungah “Bawipa hnenah thil pakhat ka dil, cuih thil pakhat lawng cu ka duhmi asi. Bawipa ih inn sungah ka nun sung hmuahhmuah um ka duh asi” tiah asi. David siangpahrang bawipa cu puithiam tla asilo, prophet sitsit tla asilo, thusimtu saya tla asilo, Sister tla asilo. Asinain puithiam le prophet pawl, saya le Sister pawl hnak hmanin Pathian ih inn asimi biakinn ah um a duh sawn kha. Ziang ruangah so hi tlukin biakinn cu a haal in a haal? 1} Bawipa ih inn ah um hi nuam a ti tuk ruangah asi. Curuangah Saam 84:10 “Maw Pathian, na biakinn sungih nikhatte um cu hmundang ih nikhat um hnakin a nuam sawn asi” tiah kan hmu thei. 2} Biakinn sungih thlacamnak cu Bawipa in a ngai sawn/ a thei sawn asi ti a thei ruangah asi. Ps 18:6 “Harsatnak ka ton ruangah Bawipa ka ko; I bawm dingin ka Pathian cu ka ko. A biakinn ihsin thla ka cam ih ka aw cu a thei. Ka aunak aw cu a hna sungah a lut” tiah Biakinn sung ihsin thlacamnak a thupit zia in zirh asi. Prophet Isaiah in tla “Ka inn cu miphun hmuahhmuah hrangah thlacamnak inn tiah kawh asi ding.” Isaiah 56:7 ah Biakinn cu Pathian thawn kan ton awknak hmun, thlacamnak hmun asi. 

Siangpahrang David in Pa Pathian le a umnak hmun Biakinn thianghlim cu tthal caanih zo tidai vekin siseh, thlatang caan ih meisa hlum siseh a ngai duahdo ttheu asi. Curuangah Saam 84:1-2 ah “Maw cungnungbik Pathian, na biakinn cu ziangtlukinso ka duh. A sungih thlen cu ziangtlukinso ka hiar. Bawipa ih biakinn sung thlen cu ziangtlukinso ka ngai?  Saam 42:3 “A sun a zan in ka ttap ih ka mitthli lawng hi ka rawl ah a cang” tiah asi. Siangpahrang David cu Biakinn a ngai tuk ttheu ruangah midang in biakinn feh dingin a sawm tikah a lung a awi zet ttheu asi, a ready ringring ttheu asi. Saam 122:1 “Bawipa ih inn ah feh uhsi tiah in sawm tikah ka lung a awi ngaingai” tiah kan hmu thei.

U le nau pawl, kannih tla Bawipa ih umnak hmun a inn thianghlim asimi Biakinn ah khawm dingin rak zuam ringring uhsi. Biakinn ih khawmnak ah Pathian kha biak uhsi, Pathian ih hnen ihsin kan ngahmi siar cawklo thluasuah pawl hrangah lungawi thu sim uhsi; kan sual kan palhnak pawl hrangah Pa Pathian kha ngaidam dil uhsi; kan ttul kan sammi thluasuah zaangfahnak dil uhsi. Kanmah hrangah siseh, midang ih hrangah siseh, hell ramte ah thlarau thawngtlatu pawl hrangah siseh thlacam sak ttheu uhsi. Cutin cu midang pawlin kan parah Pa Pathian ih rundamnak le tleunak kha an hmu fiang ding asi. 

Baptism kan ngah lai ah kan kut sungah phayawngdaing in keng terih “meisa van cia mi hi phayawngdaing cu cohlang aw. Na ngahzo mi baptism cu mawhphurh lo dingin kilkhawi aw. Mopa Jesuh Khrih a rat tikah a vancungmi pawl le mithianghlim pawl thawn na meisa vangin na hmuak theinak dingah le vancung ram ih kumkhua nunnuamnak na ngah theinak dingah Pa Pathian ih thukham pawl cu thlun suak aw” tiah baptism in petu puithiam in thu in rak cah asi. 

Tleunak fa kan sinak cu a hlolonak dingah siseh, kan kenmi tleunak cu a hmit lo nak dingah siseh, kilkhawi kan si asi. Kan kenmi tleunak cu leitlun tisa nomnak asi mi thlisia ruangah a hmit thei asi. Kan meisa cu a hmit lo nak dingah thli cu kan kham a ttul asi. Sak lamin thli a ra maw, thlang lamin thli a ra maw, nisuahnak lamin a ra maw, nitlaknak lamin a ra maw? a ratmi thli kha kham cio uhsi.

Pa Pathian in a tharin thluasuah bawmnak in run pe hram seh. Amen.