“Cat banglo in Thlacamnak”

Thlacamnak timi cu ziangso asi?

A tawi zawngin kan rel asile thlacamnak timi cu Pathian thawn biak awknak asi. 

Vanrang thuai um Bawi Khrih ah duhdawt zetmi RVA a ngaitu nu le pa, u le nau pawl, “kan Bawipa Jesuh Khrih zaangfah lainatnak, Pa Pathian ih duhdawtnak le Thlarau Thianghlim ih pawlkomnak cu nan zaten hnenah um hram seh” tiah cibai ka run lo buk hai. Tuihni cu Tlawngkai nilini, October ni 10, 2019 asi. Tuihni ih kan ruah khawm dingmi Lk 11:5-13 tiang asiih a tlangpi thu cu “cat banglo in thlacamnak” athupi zia asi. Taima in thla kan cam a ttul tinak asi. 

Thlacamnak timi cu ziangso asi? A tawi zawngin kan rel asile thlacamnak timi cu Pathian thawn biak awknak asi. 

Tuihni kan siarmi Thuthang ttha sungah Cathianghlim ngantu Luka in catbanglo in thlacamnak a thupi zia in zirh asi. Luka 11:8 “thungai in ka lo sim: a rualpi na si ruangah hung tho in na dilmi sangreu cu lo pe lohli lo hman sehla ningzak lo in na dil rero hrat ahcun a tho pei ih na ttulmi cu a lo pe ko ding” tiah Bawi Jesuh nih tahtthimnak thawn in zirh asi.

• Abraham in Sodom le Gomorah khuami pawl hrangah thin sau zetin thla a cam asi. Seemtirnak 18 ah Abraham in “Hi khua sungah ming 50 a um ahcun Bawipa hi khua cu na siatsuah thluh thotho pei maw?” tiah a ti tikah Bawipa in “Hi mittha 50 ruangah ka siatsuah lo ding” tiah a sawn. Abraham in miding 50 a hawl nain a hmu lo. 45 tla a hmu lo. 40 siseh tiah zaangfah a dil sak nain miding 40 a um cuanglo. 30 hrangah zaangfah a dil nain 30 tla siseh, 20 tla siseh, 10 tla siseh an um cuanglo asi. Sodom le Gomora khua sungah miding 10 hman a um lo ruangah Bawipa in a cuih khua cu a tansan asi. Bawipa ih tansanmi khua, Bawipa in tansanmi miphun, Bawipa ih tansanmi milai cu ziangtlukso ttih a nung. Bawipa in Sodom le Gomora a tansan ih meisa in a siatsuah hai asi.

• Siangpahrang thuanthu ukkhatnak 18:42 in kan siar vivo asile ziangmi kan hmu thei? Prophet Elijah in a ram ah ruah asur salnak dingah thla a cam asi. Prophet Elijah in Karmel tlang zim ah a hung kai ih a khuk le khuk kar larah a lu a retih leilung dai tiangin a kuunih thla a cam asi tiah 1King 18:42 ah kan hmu thei. Cang 43 ahcun voi sarih tiang thla a cam si tiah kan hmu bet lai. Voisarihnak thla a cam tikah cun mero kuttumtia tifingriat ihsin a kai ih a rei hlan ah na pi in ruah asur asi. Prophet Elijah cu Pathian ih milai, hmual a nei zetmi asi, midik asi; cuhman ah voi rsarih tiang thla a cam asi. James 5:17 ah “Miding ih thlacamnak cu a cak zetih hmual a nei ngaingai” tiah kan hmu. Prophet Elijah cu miding asi. Miding hmanin voi sarih tiang thla a cam asi ahcun kannih cu tam sinsin in tangdornak thawn thla kan cam a ttul rori asi.

• Bawipa Jesuh hi Pathian fapa asi ko nain zanvar in thla a cam ttheu asi ti tla kan hmu. Luka 6:12 “Culai ah Jesuh cu thlacam dingin tlangpar ah a hung kai ih Pathian hnenah zanvar in thla a cam” tiah fiang zetin kan hmu. Mithli tlak ko tiangin Bawi Jesuh cu thla a cam asi; aw ring zetin tla thla a cam dah asi. Hebrew 5:7 “Leitlun ah aum lai ahkhan thihnak ihsin a runsuak theitu Pathian hnenah ring zetin a au ih mitthli thawn thla a cam asi. Kannih the mithli tlak tiangin siseh, aw ring zetin siseh thla kan cam dah maw? Zanvar in the thlacamtu kan um maw?

• Monica cu a fapa hrangah siseh, a pasal hrangah siseh kum reipi tiang thla a cam asi. Kha Monica hmin neitu pawl kum ziat so thla na cam zo? St Monica ih nuncan rak cawng zuam aw.

• Luka 2:35-36 “anna anti mi nunau prophet pakhat a um ih amah cu nuhmei asiih Asher hrin Fanuel ih fanu asi, kum 7 sung lawng pasal a nei ih amah cu kum 84 a ti zo. Nitin in Biakinn ah a um ih a sun a zan in Pathian a biakih rawl ulh in thla a cam ringringtu asi. Anna in kum 7 sung lawng pasal a nei. Kum 20 ah innsang nei bang sehla a tu ah 84 a ti zo ruangah a thlacamnak cu 57 a si zo asi. Sun ah cun Pathian hnenah raithawinak petu pawl thawn thla a cam ih zan ahcun amah bulpak ten thla a cam ringringtu asi. Curuangah Messiah hmu theinak a khuan cu Pathian in a pek hai asi. Israel pawlih luatnak a hngaktu pawl hnenah Messiah naute ih thuthang cu a sim ciamco. Mithhu sia rello in Messiah thuhla lawng a rel asi.

• Bawinu Mary in kan zate hrangah cat banglo in thla in cam sak ringring lai asi. Bawi Jesuh a thi lai ah thinglamtah tangah dingin lungsia ninghang zetin a um vekin tuihni tiangah tla leitlun minung pawlih sualnak hrang cawhkuan tuarsaknak dingah thinglamtah tangah a ding rero lai asi.

• Kannih tla nitin in Pathian hnenah catbanglo tein thlacam ringring theitu kan si theinak dingah zuam cio uhsi. Abraham vekin siseh, Prophet Elijah vekin siseh, Bawi Jesuh vekin siseh, Anna vekin siseh, Bawinu Mary vekin siseh, St Monica vekin siseh catbanglo in thla kan cam thei cio nak dingah Pathian in thluasuah in run toih hram seh.