“Hremtu in Hremmi Paul” (sim tu - Rev. Fr. Pius Kei Lian Cung), January 25, 2021.

“Hremtu in Hremmi Paul”

Thuthangtha sim tu Rev. Fr. Pius Kei Lian Cung

January 25, 2021.

Siarding: Tirh 22:3-16

          Thuthangtha ngaitu u le nau pawl, Bawipa ih pekmi  damcahnak, lungawinak cu nan zate parah a thar in thleng  hramseh. Nan tumtah mi pawl khal hlawhtling in nan thlacamnak pawl khal famkim hram seh. Jan ni 25, cu Mithiang Paul ih Nun thlengawknak Puaini a si ih kan ruahkhawm dingmi khal Tirh 22:3-16 ih Paul ih lungthlengnak thuhla a si ding. Kan thulu dingah “Hremtu in Hremmi Paul” ti ka hril.

1. A Taksa ah thlengawk nak a tong.

          Tirh 22: 11 ah “A tleu tuk ruangah ka mit a caw ih ka rualpi pawl in ka kut in Damascas khaw sungah in hruai” a ti. Eng in a kap, lamkap ah a tlu, A mit a caw, aw a thei. Jn 8:12 ah “Kei cu leilungih tleunak ka si” Jesuh in a ti. Sem 1:3 ih “Tleunak umseh” titu khal a si. Jesuh tel lo cun thutha le thusia, thudik le thuphan thleidan thiam hi a har zet. Paul cun a tuahmi hmuahhmuah a tha, a hman tiin a ruat. Asinan, Jesuh ih Eng, a thleunak ih a vun kah tluk cun thuhman le thutha ih a a rak ruahmi hmuahhmuah cu thu sual le hman lo ah an cang thluh. Jesuh ih eng in kan nunnak le kan thin lung i tletvaang hram seh la, hmuhdan thar le theihdan thar in, thlengawknak co ve hram u si.

2. A Thinlung a thleng.

          Tirh 22: 8-9 ah “Ka Bawipa zoso na si?” tiih Paul in a sut. A mai theihdah lo mipa cu ziangruangah Bawipa a ti thei si pei. Sun laidir hnakih tleuvar sawn Eng in a sun tikah a thinsung tiang a tleu theh. A cahnak le a thiamnak hnakih caktuk mi a ton cun Bawipa a ti tul si ko. Ka fim, ka thei, ka tuan thei, ka cak, a rak ti awk rero mi pawl cu mitthepah a hlo. I neh tu a um ti a thei aw. A ruangpi a tluk lawng a si lo a thinlung le a ruahnak  le a zumnak khal an tlu thluh. Jesuh in cak zet le fek te ih in din ter hlanah in tlukter hmaisa theu. Kanmah te ka titheinawn lo ka thlin lo ka ti in Amai chnak in in tungding ih tha khohnak in pek a si. Thinlung le ruahnak a thleng awk ta loah cun zumnak ih fekzet si ding a har zet. Thinlung thlengawk ding hi, tipil pet u Johan le Jesuh Bawipa rori khal ih an rak sim rero mi a si. Judah mi tampi vekih, thlengawk duh lo, thinlunghak neitu krifa kan tam hrih. Paul thawn hmunkhat Bawipa parih kan neihmi, kan thinlung, kan ruah dan, pomdan pawl hi a thar in thleng u si. kan zir cia, neih cia, theih cia ring rero men ding kan si lo. 

3. A zumnak a thleng.

          “Nahrem mi Jesuh ka si” tiah Jesuh in a sawn. Paul in “Ziangso ka tuah ding Bawipa” a ti. Voihnihnak Bawipa  a ti mi te hi ka uar tuk. A mawi in, a thlum. Jesuh ti a theih hnu ih Bawipa a ti mi cun nuntharnak cu a co ngah a si. A huat tukmi Jesuh, a hmin sal hman a duh lo zetmi Jesuh, cu a tuah cun Bawipa tin a ko ta riai. A va sunglawi ve. Jesuh cu ka Bawipa a si tiah Paul in a hmu fiang tikah Rundam tu a sizia khal a zumcih thlang Paul cun Lei le van sersiamtu, Abraham ih Pathian cu a zumfek zet tuk ko, asinan, Jesuh Pathian fapa a sinak  cu a zum lo lawlaw. 22:3 ih “Judah mi ka si, Gamaliel ih zirhmi ka si, Kan pupa pawl ih daan felzet le fek zet ih zirhmi ka si” a tiawk mi pawl hin Judah citte a sinak le Parasi pakhat a sinak a langter zet. Farasipawl, daan thiam upa le biaknak hruaitu pawl le Judah mipi a tam sawn hrangah cun Jesuh cu Bawipa a si ti le Pathian Fapa a si ti zum cu zumnak peng, fehsual, zirhnak diklo ih an ti mi a si. Paul ih Eng a hmuh mi cu a mit lawng in a hmu lo, a thinlung, a thlarau , a nunnak  le a ziang kim in a hmu thluh. Cui engvaar ah Jesuh cu Bawipa a si ti a hmu, a zumh ngah. Jesuh cu ka Bawipa a si kan ti mi hin Paul ih hmuhmi engmawi co tu kan si ve. Bawipa a hmin thangthat siko seh, Amen. Paul sun tu Eng hi a mit caw tertu a si nan a thlarau vangter tu tleunak a si sawn. Harnak petu tleunak si lo in thuhman zirhtu tleunak, Bawipa hmuhfiangnak tleunak a si sawn.

4. A tumtahmi a tleng.

          Jesuh hmin hlohral ter ding le Jesuh zumtu pawl cimih ding rori hi a tumtah mi a si. Cang 10nak ah, Bawipa in “Tho aw la Damascas khawsungah va feh aw la na tuah dingah Bawipa in a tumtah ciami hmuahhmuah kha  alo sim ding”  a ti. Zumtu Krifa pawl nu ti lo pa ti lo, an zaten kaih, hrem, thawngthlak le thah thluh ding tiih a tumtah tumpi cu Bawipa ih tumtahmi tuan dingin a lung a kim thlang. Amai thutummi hnakin Bawipaih tumtahmi thupi sawnah a ret thlang. Bawipa ih in tumtah sakmi hmuthei, tuah thei ding in cu kan cahnak le thiam nak pawl parih sin tlak ta a tul. Ka tawk, ka tithei kan timi in kan tluk hmaisa a tul. Kan tuah ding mi in zirh bet rero tu ding Bawipa rinsan u si. Veikhatnak ih theihkim thluh , sim fiangthluh Bawipa in thu a kam lo. Paul khal in a Bawipa ih a tumtah sakmi hmakhat ten a thei fiang thluh hrih lo nain ‘Feh aw la a lo sim ding’ ti rinsan in a pok mai. Raltha in fehhrih ko u si kan hrangah Bawipa in thutummi tampi a nei.

5. A hnatuan a thleng.

          Cang14; ah Anannias in Paul cu hi tiin a sim. “Kan pu kan pa pawl ih Pathian in amah ih duhnak a thei tu dingah le na theih mmi hi mi hmuahhmuah hnenih simtu dingah a mah ih thu thei tu na si ding” a ti. Pathian duhnak theitu ding le mi hmuahhmuah hnenih sim tu ding a si thlang. Judahmi a sinak ngaisang aw zet le porhaw zet pa Paul cu miphunkip hnenih thuthangtha simtu dingah Bawipa in a hril, a zirh ih a thlah a si. Miphun le hrinhnam ttan zetpa Paul cu a tuah cun miphun hmuahhmauah hrangah hna a tuan thlang. Laimi tampi hin Krifa zumtu kan si kan ti cio ko nan, Mai miphun hrangle mai tong hrang lawngih ttang ciamco le cak ciamco kan tam rero lai. Paul ih thlengawk vekih thlengawk dinghi kan va tul ve. Gal 3:28 Judah mi le Zentail mi tiah thleidannak a um nawn lo, sal le miluat karlak ah siseh, nunau le mipa kar lak ah siseh, thleidannak a um nawn lo. Nan zate in khrih Jesuh thawn nan pehzom awknak sungah pakhat nan si, tiah a mah Paul rori in a ngan. Judah miphun cu Pathian  hrangah a si tiih teirial zetih a rak tuan dah rero tu Paul cu atu ahcun miphun kim cu Bawipa hrangah tiin sunzan ih thuthangtha simtu, hna tuantu Paul ah a thleng aw zo.

          Thla kan cam pei: Aw Jesuh kan Bawipa na engmawi in Paul cu na tlet tikah a zumnak a nunnak , a ziangkim a thar ah na thleng sak. Kan nih khal na engvaar in in sun, in kap ve aw. Kan hmuhdan, kan ruah dan, kan zumnak, kan tumtah le kan hna tuan tiangin na duhdan in zirh aw la lam in hruai aw. Kan nunsung kan Bawipa na si nak tlangaupi tu si ding in le mi phunkim hrangih tuanthei tu si ding in thazang le zumfeknak in pek hram aw. Kan sualnak pawl ruangah na thin kan lo nat ternak pawl parah in ngaithiam hram aw. Na miphun pawl harnak pektu si lo dingin le nangmah thinna tertu silo dingin in humhim hram aw. Harnak le hremnak phunkim khal Na hmin in tuar theinak thazang in pe hram aw, Amen.

           Mithianghlim Paul, kan mai hrangah thla in cam sak aw, Pa le Fapa le thiangthlarau hmin in, Amen.