“Kan Tuahnak hmuin Zum Ve Hai Seh”

“Kan Tuahnak hmuin Zum Ve Hai Seh”

Rev. Fr. Peter Zin ih thuthangtha sim mi (April 3, 2020 - Ninga ni) 

Siarding: Jeremiah 20: 10 -13, Psalm 18:2-7. John 10: 31-42

    Bawi Khrih ah duhdawtmi nu le pa, u le nau pawl, Bawipa ih hnangam daihnak cu nan zate hnenah um hram seh. Tuni 2020, April 3 (tlawngkai ninga) ni ih kan siar ding mi Gospel Jn 10: 31-42 thawn pehparin “Kan tuahnak hmuin zum ve hai seh" timi thulu thawn thlarau thazaang kan lak tlang dingin ka lo sawm duh. Tuni kan siar mi Gospel sungah Judah mi pawl in lungto an sarih Bawi Jesuh den an tum ti kan hmu. Ziangruangah tile Jesuh in Pathian Fapa ka si a ti mi kha an pom thei lo. Judah mi pawlin Bawi Jesuh kha ‘nang mah le nang mah Pathian tluk ah na tuah aw, Pathian na hmuhsuam’ ti tiangin an rak ti. Hi tawkah Bawi Jesuh ih a sim mi kha tuni ah a cuangce in kan ruat tlang dingah ka duh.

Jn 10:37-38_ ‘Ka Pa ih duhmi thil pawl ka tuah lo a si ahcun i zum duh hlah uh! Sikhalsehla ka tuah a si ahcun keimah i zum duh lo hmanah ka tuahmi tal cu zum uh,’ a ti.  “Ka tuah mi tal cu zumuh” a timi te kha tuni ah a cuangce in ka sim duh mi a si. Bawi Jesuh ih a sim mi pawl Judah mi pawl in an zum thei lo tikah a tuah mi pawl sawn kha zoh in an zum thei dingin a sim. Tuahnak a thupi daan zia kan thei thluh ko. Tu kan san hrimhrim ah tla cu a thupi sinsin tiah ka ruat. Ziangruangah tile kan san hi a ṭhangso tuk vekin thil khal hi a ṭuh a dam deuhdeuh, a ṭuh a tam deuhdeuh lawng hman silo in a sit hnak in a ṭuh hman hi a mawi sawn ih a ṭha sawn vek khi a bang vivo. Himi hi lei tlun thilri lawngah si lo in biaknak lamah khal tampi a um thei. Mifim an tam deuhdeuh, thusim thiam tla an tam deuhdeuh ih zo si a hman, ziang si a hman ti hman hi theih theih a si nawm lo.

Thuṭhimnak ah Christian pa in thu a sim tikah Christian hi a ṭhabik a ti, Hindu pa in a sim tikah Hindu hi a ṭhabik a ti, Musilm pa in a sim tikah Musilm a ṭhabik a ti, Budha pa in a sim tikah Budha hi a ṭhabik a ti ve, cun biaknak nei lo pa in a sim tik khalah biaknak nei lo hi a ṭhabik vek a bang lala. Cun kan mah Christian lak lala khalah kawhhran tampi a um ih kan kawhhran a ṭha bik ti cio hi asi. Kawhhran a ṭul lo Jesuh Khrih kan zum ah cun a tawk ti tu khal an um lala. Zo si a hman bik pei? Mipi in cu thu sim thiamthiam kha an uar a si deuh ko. Mah zumnak cio ah mifim le thusim thiam an um cio ih thudik timi hi thei a har zet. A fiangzet mi pakhat cu ziang a si tile an zaten cu a ṭhabik an si ṭheh thei lo ticu a fiang mi a si. Curuangah tuni Jesuh ih in simmi ‘keimah in zum duh lo hmanah ka tuahmi tal cu zum uh,’ a timi hi thudik a lang nak dingah a thupi tuk tiah ka zum. Minung ih fimthiamnak/ thusim thiamnak in thudik a lang thei lo ding ruangah kan tuahnak sawn in kan lang ter a ṭul, asilole Pathian a mah rori in langnak pakhatkhat a tuah lawngah thudik a lang thei ding tiah ka ruat. Curuangah a tu kan san ih a cang rero mi hi natnak (coronavirus) a karhnak thawn in thudik kan hmunak ah cang sehla timi hi kei mah pumpak ih saduhthah te tla sim phah ka duh.

        Bawi Khrih ah duhdawtmi nu le pa, u le nau pawl, kan hmurka in kan sim mi ṭongkam pawl hmual a nei theinak dingin kan nunnak, kan tuahnak in a lang ter theitu kan si cio thei nak dingin zuam cio uh si. Kan ṭul sam mi thazang, thluasuah a phunphun Pathian in kan zate parah in pek cio hram seh. Amen.  

Fr. Peter Lal Zin Thang (Hakha Diocese)