“May thla”  Bawinu Mary thla (sim tu Rev. Fr. Peter Zin)

“May thla”  Bawinu Mary thla

Thuthangtha sim tu Rev. Fr. Peter Lal Zin Thang

May 1, 2021 - St. Joseph the Worker puai ni

Siarding:Tirh. 13: 44-52; Saam 98; Jn 14: 7-14.

          RVA Falam Service in Thuthangṭha ngai in thlarau thazaang a laktu Bawi Khrih ah duhdawtmi nu le pa, u le nau pawl, nan um nak cio ah Bawipa in a lo um pi ringring seh la hnangam daihnak a lo pe hia hram seh. March thla 19 ni ah Bawinu Mary ih innsangpa tiah St. Joseph ih puai ni thupi zet le sunglawi zet in kan tuah ṭheu ih tuni May 1 khal cu St. Joseph ih puai ni a si.Tuni puai cu St. Joseph the Worker tiin mirang in an tiih, kawlin cu St. Joseph a-luk-ta-ma-neh an ti. Lai in cu  Hnaṭuantu St. Joseph tiin kan ti le a sual lo men ding tin ka ruat. Hnaṭuantu pawl kilkhawitu asilole bawmtu St. Joseph ih puai ni a si. Amah khal cu kan thei ṭheu vek in a nun sungah let-ta-ma hna ṭuan in pum cawm mi a si. Cun leitlun ram uknak lam in khal tuni hi Mirang in ‘May Day’, Kawl in a-luk-ta-ma-neh tiah an ko ih hnaṭuantu pawl upatnak pek nak ah hnaṭuan cawl ni le zungpit ni tiah an tathmat sak ṭheu. 

          Kum 1955 ah Pope Pius XII nak in himi Hnaṭuantu St. Joseph puai hi tuah ding ah a tathmat a si. Himi Hnaṭuantu St. Joseph puai ni pope pa in a than hlan ah May 1 ni hi ‘May Day’ asilole ‘a-luk-ta-maa-neh’ tiin tuah cia mi a si. Asinan pope pa in Hnaṭuantu St. Joseph ih puai ni tin a than ih pawlpi sungah puai pakhat in kan hmangnak thawng in hnaṭuannak timi hi leitlun thilri hrang lawng silo in thlarau lam thawn pehtleihnak a nei, thianhlimnak thawn pehtlaihnak a nei ti mi a lang ter. Cun hnaṭha hmuahhmuah hi ziang vek hnaṭuan fate, hnaṭuan nauta tin kan ruat mi khal siseh man a nei ṭheh timi khal a lang ter a si. Hnaṭuannak tel lo in thlarau lam ah ṭhansonak a um thei lo, mithianghlim si a theih lo. Semtirnak 3:19 sungah ‘na nunnak hrangah na thlanhriput in hna na ṭuan ding,’ a ti. 2 Thesalon 3:10 nakah St. Paul in, ‘Hna a ṭuan lotu cu rawl khal ei hlah seh,’ tiah a sim a si. Cun Jeim cakuat sung khal ah zumnak hi tuahnak, asilole ṭuannak a tel lo le a thi tiin a sim mi khal kan hmu thei a si. 

          Hnaṭuan kan ti tikah kan laimi hrek khat in ziangtin kan ruat ṭheu ti sile poh-pia, tu-hmui, thir-fei asilole nam tivek kai ih ṭuan lawng ah hnaṭuan tiin kan ruat dah ṭheu. Kutnem le taksa ṭha nawn mi laimi kan hmu tik ah anih cu hnaṭuan dah lo pi tiin kan ti men ṭheu. Asinan hnaṭuan timi hi a phunphun a um timi cu tusan ah cun a tam sawn in cu kan thei cio zo ko ding tiin ka zum. Kan Bible a thok nak kan zoh a si khal le Pathian i hnaṭuannak, ziangtinkim a sersiamnak in a thok. Tuni kan siar dingmi Gospel cu Johan 14:7-14 tiang a si ih cu mi sung khal ah, ‘Nan hnen ih ka ṭongmi hi keimah palung in a suakmi a si lo; ka sungih a ummi ka Pa ih hnaṭuannak in a si,’ tiah Bawi Jesuh in a Pa ih hnaṭuannak thu a si. Cun a tang deuh ah, ‘Keimah i zumtu cun ka tuahmi hi a tuah ve ding,’ ati; phun dang in kan sim ding a sile ‘Keimah i zumtu cun ka hnaṭuan a ṭuan ve ding,’ tin kan ti thei ding asi. 

          Hnaṭuannak kan ti tikah leitlun kan nunnak le kan thlarau nunnak a pahnih hrang ah a ṭulmi a si ih leitlun hrang hna kan ṭuannak le kan thlarau lam khal pehtlaihnak a nei a si. Leitlun hrang kan hnaṭuan dingmi dingfelnak thawn ṭha tein kan ṭuannak in kan thlarau lam ṭhansonak khal a bawm thei a si. Cuti a si ruangah ziangziang kan ṭuan a si khal le kan taksa le kan thlarau a pahnih hrang ah ṭhathnemnak a pek thei mi a si ding in zuam cio u si ti ka lo forh duh.

          Cun tuni in May thla sung kan lut thlang ih kan thei cia vek in May thla cu Bawinu Mary a cuangce in upatnak pek caan, sunlawihnak pek caan a si. Kan Bawipa Jesuh ih nu, Bawipa Jesuh thawngin kan zate ih nu ah a cangtu Bawinu Mary kha May thla sungah a cuangce in upatpek thei zuam cio u si. Bawinu Mary upatpek nak le sunlawihnak ding ah a ṭhabik le kan ti thei cio mi cu Rosary thlacamnak hi a si. Rosary thlacamnak cu kan thluasuah hmuhnak khal a si. Kan Pope Francis khal in in forh vek in May thla Rosary kan camnak ah a cuangce in a tu leilung pumpi in kan buaipi rero mi Corona virus a cem thei nak ding hrang khal ah thlacam u si. Cun kan kawlram pi ah daihnak a um theinak ding hrang khal ah Rosary thawn thlacam bet hrih ko u si ti tla ka lo forh duh bet a si. 

          A ngaitu nan zate parah lungawinak tampi ka nei. Pathian in lo thluasuah cio hram seh.         

Fr. Peter Lal Zin Thang (Hakha Diocese)