“Mi Nautat Pang Hlah”

“Mi Nautat Pang Hlah”
Thuthangtha sim tu Rev. Fr. Polycarp Thawngte

2021, March 20 (Zarhte)

Thuthangṭha a ngaitu Bawi Khrih ah duhdawtmi nu le pa, u le nau pawl, ziangtimkim tuah theitu kan Pathian in ṭhat lo nak le ṭih nungza ral phun za kip lak in a lo hum him hai hram seh. Tuni kan siar ding mi Gospel thawn pehtlaih in kanmah hnak in thanaunak a nei mi pawl, fimthimnak lam ah siseh, farah ruangah siseh, miphun lam ruangah siseh, culo a dangdang ruangah khal siseh mi nautat nak thinlung kan nei lonak dingah ‘Mi Nautat Pang Hlah’ timi thulu thawn thlarau thazaang kan lak tlang dingin ka lo sawm duh. Kan siar dingmi Gospel cu Johan 7:40-52 tiang a si. Kan ngai tlang ta hrih pei.
Johan 7:40-52

Jesuh ih a ṭongmi kha miburpi lakih ṭhenkhat in an theih tikah, “Hi pa hi profet ngaingai a si,” tiah an ti. A dang ṭhenkhat in, “Messiah a si,” an ti. Midang in, “Messiah cu Galilee in ra ding a si ual lo! Ca Thianghlim in ‘Messiah cu Siangpahrang David tesinfa a si dingih David a rak umnak Bethlehem khua ah a suak ding,’ a ti kha!” tiah an ti. Cutiin Jesuh ih ruangah cun mizapi lakah ṭhenṭhek awknak a um. Mi ṭhenkhat in a kaih an duh, asinain zohman in an kai ngaingai lo.

Biakinn kiltu palik pawl an rakir tikah puithiam upa pawl le Farasi pawl in, “Ziangahso nan ratpi lo?” tiah an sut. Palik pawl cun, “Hi pa bangtukin zohman an ṭong dah lo,” tiah an sawn. Cutikah Farasi pawl in, “Nannih khal a lo bum ngah ve maw si? Judah hotu lakah pakhat tal, asilole Farasi lakah pakhat tal amah zumtu nan theihmi an um dah maw? Hi misenpi sawh lam cu Moses ih Daan an theih lo ruangah Pathian ih camsiatnak hnuai ah a ummi an si!” tiah an ti. Cutawkih a ummi Farasi mi lakah Nikodemas an timi, Jesuh a rak tong dah zotu kha a um ve. Anih in an hnen ahcun, “Kan Daan vekih kan rel a si ahcun mi pakhat cu amah ih hmurka kan theih hlan le a tuahmi kan hmuh ngah hlan ahcun kan hnong thei lo ding,” tiah a ti. Cutikah annih in, “Nang khal Galilee mi na si ve maw si? Ca Thianghlim kha siar awla Galilee ihsin profet an suak dah lo, ti kha na thei ko ding,” tiah an ti.
(Bawipa ih Thuthangṭha a si.)

Tuni ih kan siar mi Gospel sungah siseh, Gospel sung thotho hmun dangdang khal ah siseh mihrek khat pawl asilole puithian upa pawl le Farasi pawl ih thinlung sungah mi nautatnak thinlung an nei mi tete kan hmu thei ṭheu. Tuni kan siarmi sungah Bawi Jesuh cu Galilee ram Nazareth khua ih ṭhangmi a si ruangah Messiah a si thei lo tiah a ruat tu an um. Johan 1: 45 nak khal ah Filip in Nathanael a tong ih a hnenah, “Moses in Daan cabu sungah a thuhla a nganmi le profet pawl khalin a thuhla an ngan mipa kha kan tong zo. Amah cu Josef fapa Jesuh, Nazareth khuami a si,” a ti tikah Nathanael in, “Nazareth khua in thil ṭha a suak thei pei maw?” a rak ti dah ve asi. Bawi Jesuh cu Nazareth mi a si an ti ruangah Nathanael cun Galilee ram Nazareth khua in asile cu tiah zum tuk lemlo in a rak um ve dah. Tuni kan siar mi Gospel a net nak khal ah Farasi pawl in Farasi pakhat a si ve mi Nikodemas hnen ah “Nang khal Galilee mi na si ve maw si? Ca Thianghlim kha siar awla Galilee ihsin profet an suak dah lo, ti kha na thei ko ding,” tiah an ti. Bawi Jesuh cu Nazareth khua mi asilole Galilee ram mi a si ruangah an zoh niam deuh ti hi kan hmu thei. Cu lawng si lo in a nih cu let-ta-maa fa a si lo maw tiah Bawi Jesuh cu mi ih ziang siar lonak khal a rak tong dah a si.

Puithian pawl le Farasi pawl in Bawi Jesuh kaih dingah biakinn kiltu palik pawl an thlah. Palik pawl khal le Bawi Jesuh ih sim mi thu an thei tikah an mang a bang an khuaruah a har ih an kai ngam ngaingai lo. Cutikah Farasi pawl in, “Nannih khal a lo bum ngah ve maw si? Judah hotu lakah pakhat tal, asilole Farasi lakah pakhat tal amah zumtu nan theihmi an um dah maw? Hi misenpi sawh lam cu Moses ih Daan an theih lo ruangah Pathian ih camsiatnak hnuai ah a ummi an si!” tiah an ti. Palik pawl in Bawi Jesuh an kai ngam lo ruangah Farasi pawl in cuih palki pawl cu an mawh thluk hia. Cun hi Farasi pawl in Bawi Jesuh kha profet asilole Messiah tiah a zumtu mipi pawl kha ziang tin an ti tisile, “Hi misenpi sawh lam cu Moses ih Daan an theih lo ruangah Pathian ih camsiatnak hnuai ah a ummi an si!” an ti. An mit hmuh nak ah cu hi Bawi Jesuh a zumtu pawl hi Moses Daan thei lo pawl, Pathian ih camsiatnak hnuai ih a ummi pawl tiah an nautat hai a si.

Hitivakin a nih cu Galilee mi, a nih cu let-ta-ma fa tivek in mi nautat nak thinlung an nei ruangah an hngah rero mi Messiah cu an hmu ngah thei lo. Moses daan thei lo pawl tiah an nautat mi mi menmen pawl sawn hi an hman sawn mi a rak si rero. Mi ih ziang siar lo mi, mi ih nautat mi tivek pawl hi a caancaan ah cu mi ih rinsan mi, mi bawmtu tivek ah an cang thei sal ṭheu a si. Bible hlun in thuṭhimnak pakhat kan zoh ding asi le: David khal cu nauhak raldo dah lo tiah mi ih ziang siar lomi te a rak si nan Israel pawl in an ṭih zet mi Goliat cu a mah in a rak neh ih Israel pawl run tu ah a rak cang dah a si. Ca Thianghlim in ‘inn saktu pawl in santlai lo tiih an hnonmi lungto cu a thupi bikmi lungto ah a cang riangri,’ tiah a sim mi khal a rak um a si.

Kan laimi pawl khal hi kan kawlram ah mi ih nautat deuh mi cazin ah kan tel ve ṭheu a si. Asinan tu cu hi kan rampi ah buainak a um ih harsa in kan um lai ah mipi ih rinsan zet mi, mipi pawl runtu ding tiah an rinsan zet mi cu lawlawse ah kan laipa hi a si. Lai khuate kan mah hman in kan thei dah lo mi khua in a suak ih tuah cu kan rampi ih rinsan mi ah a cang. Cutivekin cumi khua pawl cu, cu mipa cu, cu minu cu tiah kan nautat mi pawl hi a sangbik, bawmtu bik asilole rinsan tlakbik ah khal an cang thei sal ṭheu a si.

Curuangah kan khua kan ram, kan bu sung le kan inn sungsang cio khal ah siseh hi pa cu hi nu cu a ṭawnṭai tuk, ca le a thiam lo, thiamnak le ziang hman a nei lo tivek in nautat phun in mi kan zoh a si le Pathian in a khai sang ding ih in ningzak ter tu ah khal ah a cang leh thei a si. Asilo hman ah in bawm tu ah, kan rinsan mi ah khal a cang leh thei. Kan mah hnak in a thanau mi, a san tlai tuk lemlo mi kan kiang kap ah an um a si le nautatnak, zuamtainak thinlung kan nei pang lo ding hi a thupi zet ih pakhat le pakhat duhdawtnak le upatnak thawn um tlang leng tlang theitu si ding in zuam cio uh si.
Fr. Peter Lal Zin Thang (Hakha Diocese)