“Mi thluasuak kan si zia”

Bawi Khrih ah duhdawtmi nu le pa, u le nau pawl, “kan Bawipa Jesuh Khrih ih
zaangfahnak veel, Pa Pathian ih duhdawtnak le Thlarau Thianghlim ih pumkhat
sinak cu nanmah thawn um hram seh” tiah cibai ka run lo buk hai. Kan Bawipa in
nan zate parah cahdamnak thluasuah lo toih hram seh tiah thlaza ka run lo cam
sak hai. Tuihni cu 2020, August thla ni 20, Tlawngkai nilini asi. Cun St Bernard ih
puaini tla asiih St Bernard ih hmin latu pawl hmuahhmuah tla Happy feast day tiah
cibai ka run lo buk. Tuihni ih kan siar dingmi Bawipa ih ttongkam pawl cu prophet
Ezekiel 36:23-28 tiang le Mt 22:1-14 tiang pawl tla ansi pei. Tuihni kan ruah
khawm dingmi cu “Mi thluasuak kan si zia” thu a si pei.
Mithluasuak timi cu Mirang ttong in “blessed” tiah asiih Falam ttong incun
Milungawi, mivanttha, mihmualnei, mithianghlim tiah tla leh thei asi. Tuihni kan
siarmi Bawipa ih ttongkam a voikhatnak ah “Cungnungbik Bawipa Keimah in ka
sim zo. Miphun dang pawl hnenih ka hmin thianhlimnak langtertu dingah
nanmah ka lo hmang ding. Miphun kip le ram kih ihsin ka lo la dingih nanmahih
ramah ka lo kirpi ding. Tidai thianghlim thawn ka lo theh dingih milem biaknak
hmuahhmuah le a lo borhhlawhtertu hmuahhmuah khal ka thiangfaiter ding.
Thinlung thar le nunnak thar la lo pe ding. Lungto vekih a hakmi nan thinlung cu
ka la dingih thinlung neemmi ka lo pe ding. Nan sungah ka thlarau ka khum
dingih kan daan pawl le ka thupekmi pawl nan thlun thei ding. Cuti cun nan
pupa pawl hnenih ka pekmi ram sungah nan um ding; nannih cu ka minung nan
si dingih kei hi nan Pathian ka si ding” tiah Ez 36:23-28 ah Pathian in fiang zetin
hnangamnak thazaang in pek. Pathian ih minung kan can theinak dingah ziangmi
pawl so a ttul? Prophet Ezekiel in Pathian ih minung kan cang theinak dingah Tidai
thianghlim thawn thehnak a ttul asi tiah in zirh. Cumi cu kan sanah tikholhnak
sacrament timi asi. Baptism tiah tla kan ti ttheu. Baptism kan ngah ahcun Pathian
ih minung kan cang dingih kanmah lam ihsin milem le in borhhlawhtertu sual
tuahnak hmuahhmuah hlon ding kan si asi. Baptism kan sang hlante ah “Satan
siseh, satan hnattuan hmuahhmuah siseh khlon ttheh asi” tiah thu kan kamih
Puithiam in Pathian pakhat, Bawi pathum hmin thawn baptism in pek asi.

Baptism kan ngah ttheh tikah nunnak thar le thinlung thar in petu dingah siseh,
Bawipa ih daan pawl kan zawh theinak dingah siseh, thinlung neem kan nei
theinak dingah siseh Bawmtu Thlarau Thianghlim kan co ttul asi. Cun baptism kan
ngah tikah Puithiam in hriak thianghlim in culhnak thawngin Thlarau thianghlim ih
laksawng kan ngah asi. Ziangtluk in so a sunglawi, ziangtluk in so hmual a nei,
ziangtluk in so thluasuak a um. Mithluasuak kan si zia hi a mak tuk. Cuti cun
Bawipa ih minung kan cannak asi.
Tikholhnak sacrament kan ngahnak ruangah Pathian ih minung kan cangih Bawipa
ih rawl donak puai asimi Missa raithawinak ah sawmnak kan ngah asi. A tlakmi cu
kan silo. Curuangah kan sakmi hla sungah tla “Maw Bawipa, ka inn sungah,
nangmah lut dingah ka tlaklo, kamkhat lawng Bawipa ttong awla, ka thlarau a
thianghlim sal ding” tiah kan sa ttheu asi. Kan tlaklo nain Bawipa ih ttongkam
khat asimi “na sualnak pawl ka lo thlah sak zo” in ti hnu ah Bawipa ih nupi
tthitnak puai, Bawipa ih zanriah puai, tuufa ih zianriah donak puai ah a zawh
tlakmi ah kan cang ding asi.
Duhdawtmi nu le pa, u le nau pawl, tuihni kan siarmi Thuthang ttha sungah Jesuh
in mipi pawl hnenah vancung uknak cu siangpahrang pakhat in a fapa hrangah
nupi tthitnak puai a tuah sakih cumi mopuai ah sawmmi a phunphun a umnak thu
hi tahtthimnak thawn in sim asi. A hnen-um pawlin zo pawl so an sawm? An
sawmmi pawl cu lo hnattuan buaitu pawl an tel; dawr tuahin buaitu pawl an tel;
za-lamzin parih mittha le mitthalo pawl an tel asi. Bawi Jesuh ih sim duhmi pawl
cu Pathian ih kawhmi Israel miphun pawl kha hmaisa ah sawm ansi nain sawmmi
kha zianghman an siarlo; a sawmtu a hnen-um siahhlawh pawl hmanah an hrem,
an that bet lai asi. Kannih Christian pawl cu za-lamzin parih sawmmi mittha le
misia pawl kan si. Kan ttulbikmi cu mopuai hnipuan hruk le hruklo thu asi.
Curuangah Baptism kan ngah lai ah kan lu parah puithiam in puan raangte in khuh
sak asi. Khami kha kan thlarau hrangah mopuai hnipuan asi. Puithiam in kan lu
parah in khuh lai ah “himi puan rangte cu cohlang aw. Mopa a rat hlan lo hruk
ringring awla na balterlonak dingah nangmah le nangmah ralring aw” tiah thu in
tiam aw. Cumi kan mopuai hnipuan cu nitin kan nunnak ah sualnak a phunphun
ruangah siseh, kan daithlang ruangah siseh, kan balter thei ttheumi asi. Mopuai

hnipuan cu kan hruk ko nain a balmi asi ruangah Mopa thawn a tlaklomi ah kan
cang asi.
Baptism kan ngah tikah Pathian ih fa le pawlah in cantermi sanctifying grace timi
thianhlimnak hrangih zaangfahnak veel kan ngah asi. Cumi thawn in tuam asi..
Cumi thianhlimnak hrangih zaangfahnak veel timi cu Pathian ih nun kan
hlawmnak asiih Adam le Eva te in sualnak an tuah ruangah an hloter asi. Asinain
Jesuh Khrih in zonzai a tuarnak, thih a tuarnak le a thawhsalnak thawngin cumi cu
in ngahsak sal asi. Amah kan zumih baptism kan ngahnak thawngin cumi
zaangfahnak veel cu kan ngahih sualnak kan tuah tinten kan hloter salih
sualthlahnak sacrament kan ngah sal tikah cumi zaangfahnak veel cu kan co sal
thei asi.
U le nau pawl, mithluasuak kan si zia cu ruat sal uhsi. Tlaklo nacing in mithlusuak
kan cang asi. Cumi mithluasuak pawl lawngin tufa ih zaanriah rawldonak puai ah
kan zawh thei, siangpahrang ih nupi tthitnak puai ah ka va tel thei asi. In
tlaklotertu fihnungza sualnak pawl cu tansan uhsi. Minung sinak thawn sualnak
kan tuah pang asi khalle sualsirnak thawn sualthlahnak sacrament thawn kan
mopuai hnipuan cu sawp sal ringring uhsi. Kan sualnak pawl kan sawplo ahcun “ka
rual mopuai hnipuan hruklo in ziangtinso hitawk hmunah na luh thei” tiah
siangpa-hrang nih in sut tikah zianghman kan sawn theilo dingih siangpahrang in
“a kutke ttem uhla khawleng thimnak ah hlawn uh. Cutawkah ttap raaknak le
hacang rialnak a um ding” asi tiah Mt 22:12-13 ah in sim fiang.
Nan zate parah Bawipa in a tharin thluasuah lo toih hram seh. Amen.

https://bit.ly/3heFzfc