“Mi Zangfahthiam Jesuh”

Friday, January 13, 2023

“Mi Zangfahthiam Jesuh”

2023 January 12 (Tlawngkai nili) ni RVA Falam service in thuthangṭha simnak:
‘Jesuh cun a zangfah ngaingai ih a kut in a hei dawh hnuah a tham ih, “Ka lo thiangter duh zet
a si, thiang thlang aw,” tiah a ti.’
RVA Falam service in thuthangṭha a ngaitu Bawi Khrih ah duhdawtmi nu le pa, u le nau
pawl, Bawipa pekmi hnangam daihnak cu nan hnen ah um ringring hram seh. Tuni ah zangfahnak
ih a thupit zia le kan Bawipa Jesuh ih mi zangfahthiam a si nak pawl zoh in thlarau thazang lak
zuam cio uh si taih ka lo sawm duh. A hmaisa ah tuni kan siar dingmi Gospel siarnak kan nei ta
hrih pei. Kan siar dingmi Gospel cu Marka 1: 40-45 tiang a si.
Marka 1: 40-45
Phaarnat in a na mipa pakhat cu Jesuh hnenah a ra ih a khukbil in, “Na duh a si ahcun i
thiangter thei ko,” tiah bomnak a dil. Jesuh cun a zangfah ngaingai ih a kut in a hei dawh hnuah a
tham ih, “Ka lo thiangter duh zet a si, thiang thlang aw,” tiah a ti. Hmakhat teah a phaarnat cu a
dam ih a thiang. Cule Jesuh in cupa cu a fehter ih, fektein thu a tiam, “Ngai aw! Hi thu hi zohman
na sim lo pei.

Puithiam hnenah va feh vurvo awla rak lo zoh seh; cule mi hmuahhmuah in a dam a
si, ti an lo theihnak dingah Moses thupekmi vekin thawinak va pe aw,” tiah fektein thu a tiam.
Asinan cupa cu a feh ih a damnak thu cu hmunkip ah a than vivo. Cuih thu a rel tam tuk ruangah
Jesuh cu khuasung ah mi hmuhhngan in a feh thei nawn lo. Hnarpawn fianhrial sawnah amah
lawng a um ih cutawkah hmunkip ihsin mi in an ra pan.
(Bawipa ih thuthangṭha a si.)
Hi kan siar mi sung in tuni ah ruah pi ka lo duh mi pakhat a um ih cu mi cu ziang a si ti si le
Bawi Jesuh ih zangfahnak thu a si. Phaarnat in a na mipa pakhat in a hnen ah, “Na duh a si ahcun i
thiangter thei ko,” tiah a ti tikah Bawi Jesuh in cu pa cu a zangfah zet i a dam ter a si. Zangfahnak
timi hi duhdawtnak ih theipar pakhat a si kan ti thei. Ziangruangah tile duhdawtnak a nai tu cun mi
par ah zangfahnak a nei ih mi zangfah a thim lo tu cun duhdawtnak khal a nei lo tinak a si.
Duhdawtnak famkim a nei tu Bawi Jesuh cu mi zangfah thiam zet mi a si.
Thuthimnakah Matthai 9:35-38 sungah, Bawi Jesuh in khual a tlawn nak ah misenpi pawl a
hmu tikah khaaltu nei lo tuu bangtuk in an um ruangah an parah zangfahnak tampi a nei ati. Cun a
khual tlawn nak ah thu a va zirh vivo hai. Luka 7: 11-17 sungah, Nain an timi khua ih nuhmei nu ih
fapa nei sun te kha a thi ih vui ding in an feh lai ah Bawi Jesuh in a hmu. A fapa a thi ruangah ning
hang riahsia in a ṭap rero mi nuhmei nu kha a hmu tik ah a zangfah ngaingai ih “Ṭap nawn hlah,” a
ti ih a fapa te cu a nung ter sal. Matthai 5:7 ah Bawi Jesuh in, “Mi zangfah thiamtu pawl cu mi
thluasuak an si; ziangahtile Pathian in anmah a zangfah ve ding” a ti. Tuni kan siar mi Gospel khal
ah Bawi Jesuh in phaarnat a nei mi pa kha a zangfah ih a nat nak a dam ter. Bawi Jesuh in a
duhdawtnak cu mi a zangfahnak ah kan hmu thei a si. Zangfahnak timi hi duhdawtnak cu a si lo.
Asinan a hman mi duhdawtnak a neitu cun mi zangfahnak a nei a si.
Minung tampi kawl ṭong in ‘myinmyin chin chit mi de’ an timi hmu ve ten uar asilole duh
timi hi kan uar zet ṭheu. Mi nih in hmu ve ten in duh asilole in uar le kan lungawi zet ih mi nih in
hmu ih in zangfah a si le cu kan duh lo ih kan thin a heng lehlam ṭheu. Himi hi ṭha deuh thuk deuh
in kan ruat a si le cu mi pakhat kan hmu veten kan duh kan uar cih mi hnak in mi pakhat khan hmu
ih kan zangfah mi hi a fam kim sawn mi duhdawtnak a si. Ziangraungah tile mi pakhat kan hmu ih
kan duh kan uar cih a si le, a mah hnen ah kan duhmi thil pakhat khat a um tinak a si. A hmel mawi
nak maw, a thil neihnak maw, a thil thiamnak maw, asilole pakhat khat kan duh mi a nei ruangah asi. Amah hnen in ngah duhmi kan nei ruangah asilole kan duhmi a nei ruangah a mah kha kan
duhdawt ah kan ruat ṭheu. Mi pakhat kan hmu ih kan zangfah a si le, a hnen in ngah duhmi kan nei
ruangah a si lo, kan duhmi thil pakhatkhat a hnen ah a um ruangah a si lo, a mah kha kan zangfah
ruangah bawm thei mi kan nei a si le bawm lam sawn kha kan duh ṭheu, pek lam sawn kha kan duh
ṭheu ih cu mi hi ‘ka hmu ve ten ka uar cih’ timi hnak in a hman sawn mi duhdawntnak a si.
Kan Bawipa in mi parah zangfahnak a nei i mi a bawm nak in a duhdawtnak a langter vek
in kan nih khal kan hmu mi minung pawl a thupi bik in bawmnak a ṭul mi pawl parah zangfahnak
nei in mi a bawm thei tu si ding kha zuam cio uh si tiah ka lo sawm ka lo forh duh a si. A ngaitu
nan zaten Bawipa in lo thlua suah hram seh.