“Na Duhdawt maw na Duh menmen?”

Rev. Fr. Peter Zin ih thuthangtha sim mi (May 29, 2020, Thosal hnu zarh (7) nak Tlawngkai Ninga

“Na Duhdawt maw na Duh menmen?”

Johan 21: 15 - 19
15. An ei ṭheh hnuah Jesuh in Simon Piter cu,
- “Johan fapa Simon, hi midang pawl ih in duhdawt hnakin nang in i duhdaw sawn
maw?” tiah a sut. Simon in, “a si Bawipa, ka lo duhdawt cu na thei,” tiah a ti. Jesuh in a
hnenah,
- “Ka tuunote pawl kilkhawi aw,” tiah a ti.
16. A vei hnihnak ah Jesuh in, “Johan fapa Simon, i duhdaw maw,” tiah a sutsal. Simon in,
- “A si Bwaipa, ka lo duhdawt cu na thei,” tiah a let. Jesuh in, “ Ka tuu pawl kilkhawi aw,”
tiah a ti.
17. Jesuh in, “Johan fapa Simon, i duhdaw maw?” tiah vei thumnak a sut lala. Cutiin vei
thum tiang Jesuh in, “I duhdaw maw?” tiih a sut ruah Piter cu a riah a sia ih Jesuh hnen
ahcun,
- “Bawipa, nang cu ziang hmuahhmuah na thei ṭheh. Ka lo duhdawt ti khal na thei ṭheh ko a
sisi!” tiah a ti. Cule Jesuh in, “Ka tuu pawl kilkhawi aw.
18. Thungaite in ka lo sim: Na no lai ah cun na tim na tuah ih na duhnak hmun poh ah
na feh; a sinain na tar tikah cun na ban na pharh dingih midang in an lo ṭem dingih na
duh lonak hmunah an lo fehpi ding,” tiah a ti.
19. Hitiin a ṭong tikah Piter hi ziangbangtuk thihnak a tuar dingih ziang bangtukin Pathian
hnenah sunlawinak a pe ding, ti kha Jesuh in a langternak a si. Cule Jesuh in, “I thlun aw,”
tiah a ti.
(Bawipa ih Thuthangṭha a si.)

Bawi Khrih ah duhdawtmi nu le pa, u le nau pawl, Bawipa ih hnangam
daihnak cu nan zate hnenah um hram seh. A tu ka siar mi Ca thianghlim cu tuni May 29,
2020 (Tlawngkai ninga) ih kan siar ding mi cathiang hlim – Thuthangṭha Johan 21: 15 – 19 a
si. Himi Bawi Jesuh le Piter te ih a biak aw nak thawn peh par in “Na duhdawt maw na duh
menmen” timi thu lu thawn thlarau thazang kan lak tlang dingin ka lo sawm duh hai a si.
Bawi Jesuh in Piter hnen ah vei thum tiang i duhdawt maw tiah a sut. Piter khal in ka lo
duhdawt, ka lo duhdawt cu na thei ko tiah a sawn. Pathian in kan hnen ih sin ziang si a duh
bik a si pei ti sile kan thinlung, kan duhdawtnak ih a si tiah kan ti thei ding. Ziangruangah ti
sile Pathian thukham lak ih a thupi bik cu “Bawipa na Pathian kha na thinlung zate, na
nunnak zate le na ruahnak zate in na duhdawt pei,” tihi a si. Cun Bawi Jesuh ih a thu zirhnak
pawl kan zoh tikah siseh tuni kan siar mi Gospel khal ah Bawipa Jesuh in Piter hnen ah a tuu
rual pawl zoh khen dingin ṭuanvo a pek hlan ah a sut mi kan zoh tikah siseh Bawi Jesuh in
minung pawl hnen in asilole a mah a zumtu kanmah pawl hnen in a duh bikmi cu kan
duhdawtnak kan thinlung hi a si ti cu a fing ih kan thei cia zo mi khal cu a si ko ding. A thupi
bik ah zumtu lak hman ah biaknak lam ih hruai tu pawl hrangah, kawl in ‘a-yi-a-chin’ kan
timi hruaitu pawl ih neih ṭul le thiam ṭul mi pawl a phunphun cu a um ko ding nan cu mi lak
ah a thupi bik mi cu ‘duhdawtnak thinlung, Pathin duhdawtnak le midang parah ih
duhdawtnak,’ hi a thupi bik mi a-yi-a-chin a si tiah ka ruat, ka zum.

Tuni ah a thupi deuh ih lo ruah pi ka duh mi cu ziang a si ti sile Jesuh cu ka
duhdawt maw asilole kan duh menmen? timi a si. Kan Falam ṭong in cu ‘duh’ timi hi
‘duhdawt’ thawn a bang in khal kan ṭong tikah kan hmang ṭheu ih, mirang in le kawl in cu a
fiang dueh tin ka hmu. Tuni ka sim ding mi ah ‘duhdawt’ timi cu mirang in ‘love’, kawl in
‘chit-de’ an timi a si dingih, ‘duh’ timi cu mirang in ‘like’, kawl in ‘kyaih-de’ an timi a si
ding. Himi ‘duhdawtnak’ le ‘duhnak’ ih a lam dang aw nak mal lai kan zoh tlang ta hrih pei.
Dawr ah mi pakhat a feh ih hnipuan mawi te a hmu ih a duh, cu hmipuan kha a duhdawt kan
ti thei lo ding. Cun a dang pakhat a fing deuh mi kan zoh ding a sile mi pakhat ui sa a duh

ruangah uico a lei ih a that ih a ei. Midang pakhat in cu uico kha a duhdawt ruangah a lei ih a
inn ah ṭha ten a cawn ih a rual pi vek in a zoh. Curuangah kan duhdawtmi cu ṭhate in kan zoh
khen ih ka duh menmen mi cu a hmang lawng kan hmang ṭheu tiah a tawi zongin ka ti thei
ding asi.

Simduhmi cu ziang a si tile, minung tampi in Jesuh kan duhdawt an ti
ih a taktak ah cu duhdawt a bang lo ih duh menmen khi a bang ṭheu. A caancaan ah ziang
thawn a bang ti sile, thuanthu sungih “Aladdin meiinn” thawn an bang aw ter ṭheu. Cu mi
Aladdin meiinn cu ‘dawi’ phun deuh a si ih cumi mei in a nei tu pa in a ṭul tiktik ah a duh mi
pohpoh a cang ter, a tuah ter ṭheu. Curuangah cu mi meiinn cu an duh cio. Zumtu tampi khal
in Bawi Jesuh kha cu mi meiinn vek in duhmi poh ngah thei mi thil pakhat vek in an hmu khi
a bang ṭheu. Curuangah ka sim ṭheu mi pakhat cu ziang a si ti sile, thlacam tikah leitlun hrang
lawnglawng, asilole mah nunnuamnak hrang lawnglawng kan dil asile Pathian kan duhdawt
kan ti thei lo a si. Duhdawt timi cu dil hi a ṭul caan tampi a um ko ding nan a thupi bik mi
asilo ih ‘ziang si ka tuak sak ding, Bawipa ziang ka tuah na duh?” ti sawn hi a thupi sawn mi
a si. Jesuh kan duhdawt asile cu “Bawipa cumi cumi ka duh,” ti hnakin “Bawipa in ziang si a
duh” ti hi pakhat nak ah ret sawn ding hi a si.

Bawi Jesuh in ‘Piter, i duhdawt maw?’ tiah a sut ih Piter in ka lo duhdawt a ti
tikah ‘ka tuu pawl kil kawi aw’ tiah hnaṭuan a pek a si. Jesuh in a mah hrangih hna a ṭuantu
ding cu a mah kha a duhdawttu si dingah a duh vekin khat lei in kan zoh asile Bawi Jesuh a
duhdawt tu in cu Bawipa hrangah ziang ka ṭuan ding, ziang ka tuah ding ti hi ruat ve ding hi a
si.

Duhdawt mi nu le pa, u le nau pawl, kan nih teh Bawipa a duhdawttu kan si
maw asilole a duh menmen tu kan si maw ti hi kan ruat cio pei. Bawipa in cu kan thinlung,
kan duhdawtnak kha a duh a si. Piter hnen ah i duhdawt maw ti ih a sut vek in kan nih pakhat
cio khal ‘i duhdawt maw?’ tiah in sut ve a si. Piter vek in ‘Bawipa ka lo duhdawt’ kan ti a
sile, Bawipa hrang ah, Bawipa ih ram hrangah, thil ṭha ziang ka tuah pei ti hi ruat cio u si.
Fr. Peter Lal Zin Thang (Hakha Diocese)