“Pathian hnattuantu pawl le Uktu upa pawl zu in lo ding thu”

Rev. Fr. Joseph Ro Nei Thang ih Thuthangtha sim mi (December 19, 2019)

Bawi Khrih ah duhdawt zetmi nu le pa, u le nau pawl, “Emmanuel Bawipa cu nanmah thawn um hram seh” tiah hmaisabik ah cibai ka run lo buk hai. Tuihni cu 2019, December thla ni 19, tlawngkai nilini asi. Kan siar dingmi Bible pawl cu Thutthentu 13:2-7, 24-25 tiang asiih Samson suahnak dingah thuthannak thu asi, cun Thuthang ttha sung ihsin Luka 1:5-25 sung ta asi pei ih tipilnak petu Johan ih suahnak hrang thuthannak thu pawl tla ansi. Kan ruah khawm dingmi cu “Pathian hnattuantu pawl le uktu upa pawl zu in lo ding thu” tiah thulu ka bun asi.

Tuihni kan siarmi Thuthentu 13:3-5 Bawipa ih vancungmi pakhat cu a nupi hnenah a rung langih a hnenah “Nang cu nucing na si ih fate na neilo, sikhalsehla a tu thok ihsin fa na pai dingih fapa na hring ding. Ralring zetin um awla sabitti le zu in hlah aw. Ei thianglomi rawl khal ei hlah aw, ziangahtile nau na pai dingih fapa na nei ding. Cuih na fapa cu a sam na met lo pei, ziangahtile a suahni ihsin Pathian hnenih pumpekmi a si dingih Nazirmi asi ding” tiah kan hmu thei asi. Samson hrangah zu inlo ding, a sam metlo dingin ralrin peknak asi. Thuthang ttha sungah tla “Amah cu Bawipa ih mithmuh ah mimaksak ngaingai asi dingih sabitti siseh, zu siseh a in lo pei. A suahthlak ve tein Thlarau Thianghlim thawn a khat ding” tiah Luka 1:14 ah kan hmu thei asi.

Hlan lai ah Israel ram uktu pawl zu an in, zu an ri ttheu ruangah Bible in ziangtin so in sim ti kha zoh uhsi. 1Siangpahrang 16:8-10 “Israel Siangpahrang Ela cu zuu a ri ringring ruangah a hnatuantu Zimri in a that asi” tin fiang tein thuanthu khummi kan hmu. Zuu ri lo ta sehla maih kuttang menin a that lo ding nain asi lo maw.
1Siangpahrang 20:16,29 “Syria siangpahrang Benhadad cu a ralbawi pawl thawn sun lai ah zuu an ri lai fangah Israel Siangpahrang Ahab ih ralkap pawlin an siim, an that ttheh asi. Minung thawng zakhat (100,000) an thi” tin kan hmu lala. Rapthlakza a si lo maw? Thinnat a um tuk lo maw? Zuu an ri tukih ral an ra rero khal an thei thiam nawn lo, an thei hman ah an do thei nawn lo, an do thei hman ah raldo daan (technique) pawl an ruat ban nawn lo ih minung thawng zakhat an thi. An thi mi sungah mittha tla an um ding, sual neilo pawl an tel ding, nauhak rual tla an um ding, fimthiammi tampi tla thahnak an tuar ttheh asi. Upa pawlih zuu thawn tthatlonak suak tiangin zuu an in ruangah ram a hlo, nunnak an liam. Kannih tla zuu kan ciah tuk le kan thlarau kha Satan in ol ten in neh dingih kan thlarau cu thahnak a tuar ding.

Daniel 5:1-30 “Belshazar cu Babylon Siangpahrang asi. A pa cu Siangpahrang Nebukhanezar asi ih Babylon a uk lai ah Israel miphun pawl ral a neh ih Jerusalem biakinnpi sungih Pathian ih thilri thianghlim a phunphun kha a long ttheh. Nebzukhanezar a thi hnu ah a fapa Belshazar in a rolih Pathian ttihzahnak zianghman neilo in khawpi ih lonmi Pathian ih thianghlim thilri pawl thawn zuu a in; a tlangsuak pawl tla zuu a rit terih nuam zetin a um lai ah phar parah minung kutin ca a ngan rero kha a hmu. A cui ca ngannak cu amaih thihnak hrangah degree chiah mi ca asi. Hi hmunah sim dingmi 2 a um. 1. Thianghlim thilri pawl siatsuahnak, balternak sualnak asi. Cumi cu Mirang ttong in “sacrilege” tiah asi. 2. Zuu in nakih tthat lo nak asi. Belshazar cu thihnak tiangah a tuar asi, a hlawh asi, ziangruangah so? Thil thianghlim thawn ZUU a in ruang sokhaw asi. Acuih thil thianghlim pawl cu a Pa Nebukhanezar in a long tla a sual ve ko ding nain zuu in nakah a hmang lo ruangah Pathian ih cawhnak a tuar lo pi. Zuu innak in a hmang tik lawngah sual cawhkuannak ah a cang asi.
Isaiah 28:1-3 “Israel uknak cu a cem asi. A sunlawinak cu an hotu zuuri pawl lu parah pangpar ih tuahmi siangahang lukhum a vuai vekin a vuai asi. An uar zetmi an lu cu ttha zetin rimhmui an hnih nan thi zikih zuu a rit ruangah an ril men. BAWIPA in anmah do dingah a cak zetmi le huham a nei zetmi pakhat a hril zo…..An hotu zuuri pawlih an uar zetmi lu cu ke ih pal cih men mi an si ding”. Uktu, hotu pawl zuu rit ruangah an lennak, an thu neihnak, an thu relnak pawl le an hminthannak pawl cu hnomhne vek men ah a cang.

Tun cu biaknak lamih hotu pawl zuu in lo dingin forhmi Pathian ih ttongkam cu Bible thianghlim sung ta vekin zoh uhsi.

Isaiah 28:7-8 “Prophet pawl le puithiam pawl tla zuu an ri h an sawn ciamco. Sabit zuu le zuureu tam zet an in ih hmunkip ah an luzing in an sawn an rilih an buai hnasa. Prophet pawl cu zuu an ri tukih Pathian in langnak a hmuhmi hman a tican an thei lo. Puithiam pawl khal zuu an ri tuk ve ih a hnenih a thlengmi thurel ding hman an rel thei lo. An tonak cabuai hman ah luaknak thawn a khat ttheh ih a thiannak hmun mal te hman a lawng lo.
* Isaiah 28:1-3 tiang kha uktu pawl hrangah zuu innak thawn ram uk a tthat lo zia thu a simih Isaiah 28:7-8 ahcun Biaknak lam hruaitu upa le pawlih zuuritnak thawn Kohhran upa ttuan lo dingah in kham asi. Pathian in a duhlo. Pathian in a hnong asi. Isaiah 28:13 ah “Kal khat nan kal tin tein nan bah ding. Hriam hma nan pu ding, thang in a lo awk hai dingih ral kaihmi nan si ding” tin fiang zetin kan hmu. Na ukmi, na hruaimi mipi na duhdawt a si le zuuritnak thawn hruai hram hlah aw, uk hram hlah aw, rian hram hlah aw. Pathian in a duh hrimhrim lo. Kan miphun in thluasuah an ngah thei lo, Kohhran mipi khalin le thluasuah ngah lo in buainak a phunphun thawn an ril, an bah, hriamhma ton ringringtu ah an cang ding.

Hosea 7:14-15 Zuu ritnak thawn thlacamnak kha BAWIPA in a duh lo, a sang lo “Thinlung ngai in thlacam lo; thlacam ai ah leilungah an hlon aw ih Pathian thei lo pawl bangin an au an kio. Rawl le sabit hrangih thla an cam tikah Pathian thei lo pawl bangin an sun aw ciam co; ziangtluk in so i dodal. Anmah cawmtu le anmah cak tertu ka sinain keimah zuarthlai tu riangri ah an cang asi….”. -Kha zuuritnak thawn thla kan cam ciamco kha Pathian dodalnak, Pathian zuarthlaitu le Pathan ningzah tertu kan cang asi.

Maw Kohhran hruaitu pawl le ram uktu u le nau pawl, zu in rero, zu ri rero din hmun thawn Kohhran hruai dingah le ram uk dingah cu hrial thlang uhsi. Cu hnakin Thlarau Thianghlim thawn khah sawn uhsi. Efesa 5:18 “Zuu rih hlah uh. Zuu cu a lo siatsuahtu lawng asi. Cu hnakin Thiang Thlarau thawn khat sawn uh.” tiah Paul nih in forh asi.

Kannih Pathian rongbawltu le ram uktu pawl tla in siatsuahtu zuu cu hrial thlang uhsi. Mipi pawl tla Pathian rongbawltu le khua le ram hotu pawl kha zuu pek hlah uh. 

  • Naute Jesuh in nan zatein lo thlawsuah hram seh. Amen.

Add new comment

9 + 5 =